1 Chuaq Jêhowa doe ka Môise: 2 Anoe ka mangai Isorali đòeq wì haq dèch ramènh ka au, pì dì yŏc ramènh da rìm ngai ma lem manoh dèch am. 3 Kô èh ramènh pì ma dì yŏc enh wì haq: wang, ƀac, xam đùng. 4 brai nget, bai gòh ngùi xam gòh yrinh xam bai lan habuàt, xàc bubi, akia trìu calô nhum gòh. 5 akia lem habùat qnoeq, long sitim, 6 dàu ôliu đòeq bùh qngah, dahwèq đòeq broq dàu xùt xam gahnàu xua thùm.

7 hmu ngŏc mainao xam ƀài ngŏc qnoeq đòeq pacap qmùt ta êphot xam capiac bac ajang rada. 8 thê wì broq ka au mòeq toq ranòh kùh waiq hadròeh aih èh au hi oe taqne wì haq. 9 pì ep broq ranòh kô xam ƀài ranac ta aih tiaq wop qmang ka dua au hu patô am ka ìh.

10 Thê wì haq broq moeq toq hom xi long sitim, dang yôh baiq hagat qne, dang gat mòeq hagat qne, ƀè yàng hanoh mòeq hagat qne, 11 Yŏc wang lem glom enh dalam xam enh gùng èh broq grôi xi wang dudan ƀè qnhèq ka hom. 12 Ìh hadai broq pôn toq rawiang xi wang đòeq ajang pôn toq jo hom: Baiq toq pah kô baq toq pah tau. 13 Hadai broq baiq toq long tanòng xi long sitim, yŏc wang glom tanòng. 14 khoe aih qmùt baiq toq long tanòng mùt ta rawiang baiq pah hom, đòeq tòng hom.

15 Long tanòng oe hloe ta rawiang aih ùh khòh doeh. 16 Khoe èh tah ta hom Capiac Tajao au padon am ka ìh. 17 Ìh hadai ep broq Calàp baxon yiniq lui xi wang lem, dang yôh baiq hagat qne, dang gat moeq hagat qne. 18 rai broq baiq toq chêrubim xi wang đòeq baiq ƀè gàu Calàp baxon yiniq lui. 19 mòeq chêrubim oe gàu ƀè kô, moeq gàu ƀè tau, baiq chêrubim ep hatop ka Calàp Baxon yiniq lui. 20 Baiq chêrubim yòng tangèa ka dabau xi baiq toq panan hlìa tŏc taqnhèq taqnhèq rai tù ta calàp. 21 Gùp calàp enh qnhèq ka ngah hom rai tah ta hom capiac ranenh tajao au padon am ka ìh. 22 Enh qnhèq ka calàp baxon yiniq lui, qne adreo baiq toq chêrubim xam enh qnhèq ka hom tajao aih la nòe au glàm ìh đòeq am ka ìh dìq dŏng ƀài ranenh da au đòeq ka mangai Isorali.

23 Ìh hadai broq mòeq toq caƀŏng xi long sitim, dang yôh baiq hagat, dang gat mòeq hagat, dang haqnhèq mòeq hagat qne. 24 glom xi wang lem, rai broq mòeq trong grôi dudan ka cabŏng; 25 broq canap dudan ka mat cabŏng, haqnhèq jah toq capiang tì, grap wang dudan ka canap. 26 Broq pôn toq gwiang wang, qmùt ajang pôn toq mùm nòe jènh caƀŏng. 27 ƀài gwiang kô qmùt jang khuàn đòeq trôp tanòng tòng caƀŏng. 28 Ìh raxoh tanòng xi long sitim, glom xi wang, đòeq tòng caƀŏng aih. 29 èh yŏc wang ma lem đòeq broq dòt, achông, cabi xam doe đòeq tah ramènh diac lŏc. 30 Ta caƀŏng aih ìh hi đòeq ƀênh hadròeh dôq i yôt ƀênh enh ngèa au.

31 Ìh hadai broq moeq toq jènh đen xi wang lem. Enh jo haq trùh chac haq, riang da haq tìah ka doe mŏng, bôp ramot xam riang haq dìq broq xi wang tùq ka ratang. 32 Baiq pah chac đen plôh loh tadràu toq hamenh, piq hamenh pah kô piq hamenh pah tau. 33 Ta tadràu toq hamenh ma plôh enh qnhèq ka jo đen, tamòeq hamenh i piq toq doe mŏng tìah ka riang apriac xam bôp ramot xam riang. 34 Ta chac đen hanoh i pôn toq doe mŏng tìah ka riang apriac xam bôp ramot xam riang. 35 Ta tadràu toq hamenh loh enh chac đen, hi baiq toq hamenh aih enh qneq hi i mòeq toq bôp ramot. 36 Bôp ramot xam hamenh da jo đen dìq broq xi wang capiac lem tùq ratang. 37 Ìh hadai broq tapèh toq đen, đòeq hi bùh aih haq hi sreo qngah enh ngèa jo đen. 38 Rawìt tìm đen xam dòt haqnac loc đen hanoh broq xi wang lem. 39 Wì yŏc moeq talàng wang lem đòeq broq jo đen kô xam ƀài ngè khop khip da jo đen. 40 Qmang aih ìh ngan, ep broq tiaq wop troeq dua au khoe patô ka ìh tawang.