7 Ìh hadai jìp mòeq jàt mòeq toq bai prình xi xàc bubi, đòeq broq ngè po enh qnhèq ka hnim ranòh kùh waiq đò. 8 Mòeq blah yôh piq jàt hagat, dang gat pôn hagat, rìm blah ep mòeq maneh ka dabau. 9 Ìh jìp đòeq crài padam blah kô, èh tadràu bla tau hanoh đòeq crài; mahaq ep cajùh broq baiq blah ma tadràu oe enh ngèa hnim ranòh kùh waiq đò. 10 Broq padam jàt toq gwiang roc nòe haqmai da blah kàn ma baxèm trùh ta nòe lùch da haq, èh padam jàt toq tanòe haqmai da blah kàn ma atìq; 11 Hanoh broq padam jàt toq glêh xi đùng, gwac qmùt ta gwiang, đòeq tadùng baiq blah kô loh moeq. 12 Mahaq ma oe rah, aih la moeq qne da blah ma po, aih caqnaih haq cadrai loh enh rù ka hnim ranòh. 13 Dang yôh ma oe i rah enh ƀài blah ma po, enh kô moeq hagat, enh tau moeq hagat, aih èh caqnaih cadrai tù baiq ƀè hnim ranòh kùh waiq. 14 Ìh yŏc moeq lòp akia trìu calô nhum gòh đòeq tù enh qnhèq kùa po hnim ranòh kùh waiq, èh jìp lòp akia habuàt tù tam enh qnhèq hòm. 15 Ìh hanoh ep broq panàt hnim ranòh kùh waiq xi long ban sitim. 16 Rìm capiac dang yôh mòeq jàt hagat, dagat moeq hagat qne, 17 i baiq toq calêh tacap dabau; dìq dŏng ƀài long ban panàt hnim ranòh kùh waiq ìh dìq broq qmang aih. 18 Enh pah qma da hnim ranòh kùh waiq đò, ìh ep broq baiq jàt capiac long ban. 19 Enh qneq ka baiq jàt capiac long ban ep broq pôn jàt toq jo xi ƀac; hi baiq toq jo enh qneq hu đòeq tacap ka baiq toq caloeh da rìm capiac long ban. 20 Èh hadai ep broq baiq jàt toq capiac long ban enh ƀè qngeo da hnim ranòh kùh waiq đò 21 xam pôn jàt toq jo xi ƀac, enh qneq rìm capiac long ban dìq i baiq toq jo. 22 Ìh hadai broq tadràu toq long ban enh ƀè rù da hnim kùh waiq đò, aih la ƀè mahì clìh. 23 Ajang baiq toq mùm enh rù hnim kùh waiq đò, ep broq baiq capiac long ban, 24 hatin ka dabau dabau enh qneq trùh taqnhèq xi moeq toq gwiang oe jang gàu; baiq toq mùm dìq broq qmang aih. 25 Aih èh, i rahem capiac long ban xam mòeq jàt tadràu toq jo xi ƀac; enh qneq ka rìm capiac long ban dìq i baiq toq jo. 26 Èh hòm, ìh ep broq padam toq pang xi long sitim ka ƀài capiac long ban pah kô, 27 padam toq pang ka pah tau xam padam toq pang qnoeq hòm ka enh rù da hnim kùh waiq đò, aih la ƀè mat mahì clìh. 28 Long pang ma taqne èh jah oe qne chac ƀài long ban, hloe enh haqmai kô trùh haqmai tau. 29 Hadai yŏc wang lom ƀài capiac long ban xam ƀài pang, èh broq ƀài gwiang xi wang đòeq trôp ƀài long pang. 30 Ìh ep dèch paqnàng hnim kùh waiq đò troq tiaq dua ma khoe patô am ka ìh tabui wang.

31 Ìh hadai atênh mòeq blah bai prình xi brai nget, brai gòh ngùi, brai gòh yrùng xam caxi brai lan ma habuàt, i thèu ma geo ƀài qmù chêrubim. 32 Khoe aih atua bai prình aih enh qnhèq ka pôn toq long jrang broq xi long sitim, glom wang, paqnàng enh qnhèq pôn toq jo, ƀài glêh long jrang dìq broq xi wang. 33 Ìh atua bai prình aih taƀài glêh, khoe aih enh dalam ka bai prình đòeq hom tajao; bai kô đòeq broq hagan ka pì nòe hadròeh xam nòe dìq jaq hadròeh. 34 Khoe aih, dèch calàp baxon yiniq lui enh crŏng hom tajao, đòeq tanòe dìq jaq hadròeh. 35 Enh gùng ka bai prình, oe ƀè qngeo ka hnim ranòh kùh waiq đò roh đòeq mòeq toq cabŏng; jo đen aih đòeq apah qma tangèa jang ka caƀŏng. 36 Qmang da haq ìh yŏc mòeq blah bai prình atênh xi brai nget, gòh ngùi, gòh yrùng, brai lan habuàt, i thèu qmòe calem, 37 khoe aih broq ka bai prình kô padam toq jrang xi long sitim, glom wang; glêh da haq hanoh xi wang, èh broq padam toq jo jrang xi đùng.