1 Chuaq Jêhowa doe ka Môise qmang kô: 2 Drah anoe ka Isorali rameh: Kô ƀài hì ramènh au khoe patô qnoh, ƀài hì ramènh Chuaq Jêhowa khoe patô qnoh pì ep anoe qnoh aih la ƀài hì ramènh hadròeh

3 Pì abroq ta tadràu hì, mahaq trùh hì tapèh aih la hì sabat, mòeq hì padài, aih la hì tagop hadròeh; ùh dùh abroq qmòe moeq yiniq cleq; yac ka pì oe taleq; aih la ramènh sabat da Chuaq Jêhowa.

4 Kô ƀài ranènh da Chuaq Jêhowa, aih la ƀài hì tagop hadròeh, pì ep anoe qnoh waq ka troq dèh jò ma khoe pachì. 5 Trùh hì mòeq jàt pôn khê mòeq, jò xèq clam, aih la ramènh Pan cwa da Chuaq Jêhowa; 6 Trùh hì mòeq jàt padam khê kô, aih la hì ramènh ƀênh ùh wàt blo đòeq ta-iu ka Chuaq Jêhowa; pì acaq ƀênh ùh tah blo ta tapèh hì. 7 Hì baxèm pì ep wèq moeq yàng tagop hadròeh ti dabau, ùh dùh abroq bìac ma xan abroq qmang ka hì qnoeq. 8 Ta tapèh hì pì ep dèch ka Chuaq Jêhowa ƀài ramènh bùh; trùh hì tapèh, èh i tam moeq yàng tagop hadròeh ti dabau hòm, pì apaq abroq moeq bìac cleq qmang ka hì qnoeq.

9 Chuaq Jehowa doe ka Môise: 10 Doe ka mangai Isorali qmang kô: Jò pì mùt gùng au ma padon am ka pì, èh trùh jò gat, aih ep aràng trùh ka pajàu moeq ha-om qmau ma ramua da pì. 11 Khoe ka hì ramènh sabat, mangai pajàu hi yŏc ha-om qmau aih dèch lam dèch hlài enh ngèa Chuaq Jêhowa, waq ka ha-om qmau aih jah dì yŏc.

12 Wop hì ha-om qmau jah dèch lam dèch hlài aih, pì ep dèch ka Chuaq Jêhowa mòeq toq kon trìu jap mòeq hanam, ùh i ka xìt habau, đòeq broq ramènh bùh ka Chuaq Jêhowa,

13 rai dèch tam ka Chuaq Jêhowa moeq ramènh xep broq xi baiq phàn mòeq jàt dàc habuàt i ùc dàu, broq ramènh bùh, i kan xua thùm ka Chuaq Jêhowa, xam mòeq phàn pôn hin alac, broq ramènh diac lŏc.

Hãy xem LeLv 14:10 và LeLv 19:36.

14 Pì paq acaq yac ka ƀênh, yac ka qmau adrênh, ùh meh qmau oe raq ta hadròc trùh wop hì kô, aih la hì pì aràng dèch ramènh dèh ka Boc Plình. Yac ka pì oe taleq, aih raq ranenh mòeq đòe ka ƀài kon xau pì. 15 Pang hì atìq ka hì sabat, aih la hì pì ma aràng dèch ha-om qmau broq ramènh dèch lam dèch hlài, pì hi rènh dôq jah wop tapèh tuàng: 16 Pì rènh padam jàt hì trùh hì atìq ka ramènh sabat yàng ma tapèh, aih ep dèch moeq ramènh xep neo ka Chuaq Jêhowa. 17 Pì aràng dèh enh hnim baiq toq ƀênh đòeq broq ramènh dèch da-arù lam da-arù hlài; ƀênh aih broq enh baiq phàn mòeq jàt dàc qmau mì ma dìq jaq habuàt lem i wàt blo: aih raq ramènh agàu mùa dèch ka Chuaq Jêhowa.

18 Pì ep dèch pajùm ti ƀênh kô tapèh toq kon trìu bu mòeq hanam, ùh hìaq i xìt habau, mòeq toq ƀo calô hadròng, xam baiq toq trìu calô xam ramènh xep hloe xam ramènh diac lc, đòeq dèch broq ramènh bùh, i kan xua thùm lem ka manoh Chuaq Jêhowa. 19 Atìq ka aih, pì hanoh ep dèch moeq toq bubi calô đòeq broq ramènh baxon yiniq lui, xam baiq toq kon trìu bu mòeq hanam, đòeq broq ramènh waiq kan catèm. 20 Mangai pajàu dèch hnhu lam hnhu hlài baiq toq kon trìu aih broq ramènh hnhu lam hnhu hlài, xam baiq toq ƀênh broq xi qmau plì agàu jò gat, ƀài ramènh aih jah wìh wìa hadròeh ka Chuaq Jêhowa aih la hadròeh am ka mangai pajàu. 21 Pì ep lam creo anoe đòeq i moeq kan tagop ta hì aih; ep i moeq kan tagop hadròeh, ùh jah broq qmòe yiniq cleq pì ma xan broq. Aih ranenh mòeq đòeq am ka xinoe pì yac ka pì rìh oe taleq.

22 Jò pì gat dèh qmau ta taneh ruàng pì, apaq gat waq qmòe ka hreo trùh roc haqmai ruàng, apaq toch gop hlài qmau ma gat ùh hreo, ep đòeq ma aih ka mangai pa xam mangai diac wì ma rìh oe đeh tapì: Au kô raq Jêhowa Boc Plình pì.

23 Chuaq Jêhowa doe ka Môise: 24 Thê anoe am ka Isorali qmang kô: Hì moeq khê tapèh, i moeq hì am ka pì padài, aih la moeq hì đòeq tagop xam kan hadròeh xam bàu ken hlui. 25 Apaq abroq qmòe cleq; ep dèch ƀài ramènh bùh ka Chuaq Jêhowa 26 Chuaq Jêhowa doe ka Môise: 27 Hì mòeq jàt khê tapèh kô aih la hì baxon yiniq lui; pì ep creo ka dabau tagop xam kan hadròeh ti dabau, ep apàm ka acaq rai tàt deh manoh rai dèch ramènh bùh ka Chuaq Jêhowa. 28 Ùh khòh abroq qmòe cleq ta hì aih; majah qmang aih, aih la hì baxon yiniq lui, hì aih kan baxon yiniq pì jah broq enh ngèa Chuaq Jêhowa, Boc Plình pì 29 Hì aih waq toq mangai leq ùt tàt dèh manoh cliac, ep qnoh đac enh gùng ka mangai da wì haq. 30 Èh hòm waq toq cabô abroq moeq yiniq cleq, aih èh au hi palùch đac wì haq khoe ka mangai da wì haq. 31 Pì ùh dùh abroq mòeq cleq, aih la ranenh mòeq đòeq am ka xinoe pì, yac ka pì oe taleq.

32 Aih la hì sabat, mòeq hì đòeq ka pì padài; pì ep tàt deh manoh. Enh dixèq hì hachìn khê aih trùh xèq clam hì atìq, pì ep wèq deh hì sabat.

33 Chuaq Jêhowa doe ka Môise: 34 Anoe ka Isorali qmang kô: Hì mòeq jàt padam khê tapèh kô aih la hì ramènh traiq oe đò, dìq tapèh hì đòeq padèch kan ta-iu ka Chuaq Jêhowa. 35 Hì baxèm i mòeq yàng tagop hadròeh, pì ùh khòh abroq qmòe cleq. 36 Ta tapèh hì ep dèch ramèn bùh ka Chuaq Jêhowa; trùh hì rahem, pì i mòeq yàng tagop hadròeh hòm, hadai ep dèch ramènh bùh ka Chuaq Jêhowa. Aih la ramènh kàn, apaq abroq qmòe cleq.

37 Aih la ƀài ramènh kàn Chuaq Jêhowa khoe dì, pì ep ngan aih la ƀài hì ramènh hadròeh, đòeq dèch ramènh bùh ka Chuaq Jêhowa, ramènh xep, ramènh waiq kan catèm, ramènh diac lŏc, tiaq dèh tang hì. 38 Enh gùng ka aih, pì ep wèq hì sabat da Chuaq Jêhowa, dèch ka haq ƀài ramènh, ƀài ramènh pì khoe tèu jò waiq khàn xam ramènh manoh cla enh.

39 Mahaq trùh hì mòeq jàt padam khê tapèh, jò pì khoe gêh ka gat, aih ep wèq moeq ramènh ka Chuaq Jêhowa ta tapèh hì. Hì baxèm aih la hì padài, hì rahem hanoh hì padài. 40 Hì ma baxèm, pì ràih yŏc ƀài plì ma lem, hamenh long triaq, hamenh long ma cràm hla xam long juàng lìu, khoe aih lem bùi ta tapèh hì enh ngèa Chuaq Jêhowa, Boc Plình pì. 41 Rìm hanam, trùh khê tapèh, pì ep wèq ramènh kô ka Chuaq Jêhowa qmang aih ta tapèh hì. Aih la ramènh mòeq đòeq am ka xinoe pì. 42 Rìm ngai Isorali ep oe ta traiq oe đò ta tapèh hì, 43 Đòeq ƀài xinoe pì loq jò au qnoh mangai Isorali loh khoe enh Êdip, au am wì haq oe đò ta ƀài traiq: Au kô raq Jêhowa, Boc Plình pì.

44 Qmang aih, Môise anoe ka mangai Isorali loq ƀài hì ramènh Chuaq Jêhowa ma khoe dì.