1 Chuaq Jêhowa doe hòm ka Môise: Drah doe ka ƀài pajàu, aih la ƀài kon calô Arôn, rameh: Mangai pajàu ùh jah pataiq yac ka i cabô cachìt ma broq ka rađeh loh ka ùh hruah, 2 enh gùng ka hadròng ma haten joq qnàng, qmang ka miq baq, kon calô, kon cadrì, daq calô, 3 hloe xam oh cadrì ma oe raq adrùh, qnhòq i ŏng ep canòm đeh ka haq, aih haq jah taiq enh aih đòeq broq ka rađeh loh ka ùh hruah. 4 Haq ùh jah đòeq ka rađeh loh ka ùh hruah, taiq ƀài hadròng ƀè proe. 5 Ƀài pajàu ùh khòh got paclŏc deh gàu; apaq got haqmai xàc mom xàc kiang, paq xah chot dèh ta akia. 6 Wì haq ep hadròeh enh ngèa ka Boc Plình, paq broq qmèq ka yiniq Boc Plình, majah qmang aih wì haq dèch ƀài ranènh bùh xi ùnh; aih la ƀài dahwèq da Boc Plình wì haq: wì haq ep wìh wìa hadròeh.

7 Mangai pajàu ùh jah yŏc gucadrì tech rađeh ùh meh mangai cadrì loq taqnung; hadai ùh jah yŏc mangai cađac ŏng, majah qmang aih mangai pajàu khoe lah đeh crài đòeq hadròeh am dèh ka Boc Plình. 8 Qmang aih ìh ep ngan mangai pajàu la hadròeh, majah qmang aih la mangai dèch ramènh da Boc Plình; ep ngan wì haq la hadròeh, majah qmang aih au, Chuaq Jêhowa, la hadròeh, Mangai broq ka pì wìh wìa hadròeh. 9 Tàng joq kon cadrì da pajàu broq ka rađeh loh ka amùa taiq haq lam broq gucadrì tech rađeh, aih haq broq ka camaih dèh ka baq, ep bùh đac haq aih ta ùnh. 10 Mangai pajàu haqnhèq jah cwìang yeo qnhèq dèh ka wì oh daq, khoe jah ùc dàu ta gàu haq, jah padèch đòeq caxùnh eo hadròeh- ùh jah oe gàu dech ùh jah hit dèh eo. 11 Haq paq mùt nòe i hanang mangai cachìt, haq ùh jah broq ka rađeh loh ka ùh hruah, yac ka taiq miq baq cla haq 12 Haq aih ùh khòh loh khoe ka nòe hadròeh, apaq broq ka nòe hadròeh da Boc Plình loh ka amùa, majah qmang aih haq khoe jah xùt dàu hu lah đòeq rađeh crài da Boc Plình. Au kô raq Chuaq Jêhowa. 13 Haq aih ep yŏc mangai adrùh sriu broq mai. 14 Haq ùh khòh yŏc gucadrì hadrô, gucadrì wì ma cađac, gucadrì taqnung tango, mangai cadrì tech rađeh, mahaq ep yŏc mangai adrùh sriu taqne mangai da wì haq. 15 Haq ùh khòh broq amùa dèh ka yiniq xinoe haq oe taqne mangai cla wì haq, majah qmang aih au kô raq Chuaq Jêhowa broq ka haq jah wìh wìa hadròeh.

16 Chuaq Jêhowa doe hòm:

17 Anoe ka arôn qmang kô: enh qnhòng kô trùh qnhòng tau, ùh jah i moeq ngai leq oe ta xinoe ìh, i tàc ta chac ma jah thia haten đòeq dèch ramènh deh ka Boc Plình. 18 Aih qmang kô: mangai lua mat, mangai liap, lip mùh, jènh tì tawech, 19 Mangai tagoh jo, tagoh kŏng. 20 mangai koc crong ùh meh mangai đêq đêq, i cachep mat, i rahenh đùh, i hriac ùh meh padah cleo. 21 Ƀài kon xau da Arôn mangai pajàu, waq toq mangai leq ma i tàc ta chac, ùh jah thia ten đòeq dèch ramènh ma bùh xi ùnh đòeq dèch ka Chuaq Jêhowa 22 Haq aih khòh acaq dahwèq hadròeh da Boc plình haq, aih la dahwèq dìq jaq hadròeh xam ƀài dahwèq hadròeh qnoeq; 23 mahaq taiq haq i tàc ta chac, dài haq ma jah ùh khòh thia ajang bai prình, hanoh ùh jah thia ajang prang tadreo, broq amùa ka nòe hadròeh au, majah qmang aih au, Chuaq Jêhowa broq ƀài nòe aih wì wìa hadròeh. 24 Môise anoe qmang aih ka Arôn xam ƀài kon calô haq, hloe xam ka Isorali.