1 Chuaq Jêhow doe ka Môise: 2 Ìh doe ka Isorali qmang kô: Waq toq cabô yac ka mangai Isorali yac ka mangai diac wì rìh oe qne, wì yŏc deh moeq toq kon tadreo dèch am ka kiac Moloc, mangai aih ep jêh đac ka cachìt: pì ep đàp haq xi hmo 3 Cla au plôh nòeh ka mangai aih, qnoh đac haq loh enh gùng ka mangai da au, majah qmang aih haq khoe dèch deh kon ka kiac Moloc, broq ka nòe hadròeh au loh ka ùh hruah rai broq amùa ka yiniq au. 4 Tàng joq mangai gùng aih caqnhip mat broq đeh ùh hnoq, jò haq aih tadreo dèch dèh moeq toq kon ka kiac Moloc tàng wì ùh waq jêh đac haq. 5 cla au kô èh tangèa dèh hadrò đòeq tabroq ka wì xam hnim wì haq, khoe aih hnan qnoh đac haq xam ƀài mangai tiaq tango ka kiac Moloc loh khoe ka mangai da au.

6 Tàng mangai leq tawìh ta pajàu ngan tì xam pajàu creo bòch mahua mangai cachìt, cla au kô èh tangèa dèh hadrò đòeq tabroq ka mangai aih. 7 Pì drah broq hreo ka rađeh, rai wìh wìa hadròeh, majah qmang aih au kô raq Jêhowa, Boc Plình pì. 8 Pì drah wèq broq tiaq ranenh au: Au kô raq Chuaq Jêhowa Boc Plình pì. Mangai broq ka pì wìh wìa hadròeh.

9 Jò cabô hanip deh miq baq, aih èh ep jêh đac ka cachìt: haq khoe hanip deh miq baq; mahim haq dahrôq hlài chac haq.

10 Tàng cabô tango ka cadrì mangai qnoeq, ùh meh tango ka cadrì mangai haten hatìa rađeh, mangai calô xam magai cadrì aih dìq ep cachìt. 11 Tàng cabô kùi ti mai dèh baq, aih la broq kan camaih deh ka baq, dìq baiq wa aih èh ep cachìt; mahim wa ta-ùc hlài ta chac wa. 12 Tàng cabô kùi dèh ti kon mai, dìq baiq ka wa ep cachìt, majah qmang aih wa haq khoe broq kan ramòt; mahim wa ta-ùc hlài chac cla wa. 13 Tàng moeq ngai gucalô acaq kùi ti moeq ngai calô qnoeq, tìah ka kùi ti gucadrì, dìq baiq wa aih ep cachìt, majah qmang aih wa khoe broq kan ramòt; mahim wa ta-ùc hlài ta chac wa. 14 Tàng moeq ngai calô yŏc hloe xam miq xam kon broq mai, aih raq kan ngang dù; ep bùh cachìt dŏng wì piq ngai aih, đòeq kan ngang dù pi hìaq oe i taqne pì. 15 Tàng moeq ngai calô tango ka ngè ma aban, haq aih ep jêh đac ka cachìt, èh hanoh jêh cachìt hloe ngè aban aih. 16 Tàng mangai gucadrì thia haten ka ngè aban đòeq tango ti haq, pì ep jêh đac mangai cadrì xam ngè aban aih; mahim haq ta-ùc hlài ta chac haq. 17 Tàng mangai calô yŏc dèh oh cadrì, yac ka pajùm baq miq đeh hra, ùh meh pajùm miq baq đeh hra, acaq kùi ti dabau, aih la kan camaih; ep hnan qnoh haq aih loh enh gùng ka mangai da wì haq; majah qmang aih haq khoe broq kan camaih dèh ka oh cadrì; haq aih ep pòq dèh yiniq lui.

18 Tàng mangai calô kùi ti mangai cadrìh jò haq i khê, mangai calô aih paqnoh mahim mangai cadrì, mangai cadrì hadai khoe paqnoh deh mahim, dìq baiq wa aih èh ep hnan loh loh khoe ka mangai da wì haq. 19 Apaq tango ka oh daq cadrì da miq ùh da baq, bìac aih broq kan camaih dèh ka oh daq cla; dìq baiq ep pòq deh yiniq lui. 20 Tàng mangai calô kùi ti mai dèh mìh ùh meh ti cadrì dèh dùch, aih la broq kan camaih xep dèh ka mìh ka dùch; dìq baiq wa ep pòq wê kan baxa da yiniq lui cla. Wa haq cachìt ùh i ka xinoe. 21 Tàng mangai calô yŏc mai dèh daq dèh oh, aih raq kan ramòt; mangai aih khoe broq kan camaih xep dèh ka daq ka oh. Wa aih cachìt ùh ka xinoe 22 Pì ep wèq rai broq tiaq ranenh xam bàu au thê, đòeq taneh au ma qmùt pì mùt oe ùh hìaq hac qnoh pì. 23 Paq broq tiaq dua da ƀài mangai au ma padon hnan qnoh enh ngèa pì, majah qmang aih wì haq khoe boq ƀài trong dù aih, au hnoq joq ma ramòt haraya. 24 Au khoe anoe ka pì: Aih la pì jah blah yŏc taneh ƀài wì aih; au am ka pì gùng aih broq kùng hang; aih raq gùng clàng qmòe xam sùa xam diac xùt: Au kô raq Jêhowa, Boc Plình pì, khoe lah crài pì ka mangai diac qnoeq. 25 Qmang aih, ep hadro crài ƀài ngè ma hadròeh khoe ka ngè ùh hruah, chìm ùh hruah khoe ka chìm hadròeh; paq broq ka rađeh loh ka ùh hruah enh ƀài ngè aih, majah qmang aih ƀài ngè pan moq ta taneh, au ma khoe hnài pì hadro qmang ka ƀài adrech ngè ùh hruah. 26 Pì ep wìh wìa hadròeh, majah qmang aih au, Chuaq Jêhowa, aih la hadròeh; khoe lah đòeq pì crài ka mangai diac qnoeq dôq pì jah da au. 27 Jò mangai calô mangai cadrìh broq mangai creo bòch mahua mangai cachìt, pajàu ngan tì, aih ùh khoe ka ep hadrah jêh đac ka cachìt; wì ep yŏc hmo đàp wì haq, mahim wì haq ta-ùc hlài chac cla wì haq.