1 Chuaq Jêhowa doe tam ka Môise: 2 Thê anoe dìq ka Isorali qmang kô: Ep hadròeh, majah qmang aih, au kô, Jêhowa Boc PLình pì aih hadròeh. 3 Rìm ngai ep loq ta-iu dèh miq baq rai wèq ƀài hì sabat au: Au kô raq Jêhowa Boc Plình pì. 4 Paq tawìh ta radua qmù kiac hanoh paq broq ƀài radua qmù kiac: Au kô raq Jêhowa Boc Plình pì 5 Jò pì dèch ramènh waiq kan catèm ka Chuaq Jêhowa aih ep dèch qmang leq dôq ramènh aih jah Chuaq dì yŏc, 6 aih ep acaq qmòe hì aih xam hì da-èh; rah ma oe trùh hì piq aih èh ep bùh đac. 7 Tàng wì đòeq kaq trùh hì piq, aih la kan ramòt, ramènh aih ùh jah dì yŏc. 8 Cabô ma acaq ramènh qmang aih ep pòq dèh yiniq lui, majah qmang aih haq khoe troq đac ramènh hadròeh da Chuaq Jêhowa: mangai aih ep qnoh đac khoe ka Isorali. 9 Jò pì gat dèh qmau ta ruàng, paq gat waq ka hreo lùch qmòe roc haqmai, apaq toch hlài ƀài hadròc ma oe lac. 10 Apaq mùt yàng baiq ta wuàn nho cla, apaq toch plì nho khoe hadrùih, đòeq plì aih ka mangai pa xam tamoe qnoeq: Au kô raq Jêhowa Boc Plình pì. 11 Pì apaq atùng, apaq capoch hwang, apaq qnùt dabau. 12 Pì apaq yŏc yinniq au đòeq hu hapah paqnùt, majah qmang aih pì broq amùa deh ka yiniq Boc Plình: Au kô raq Chuaq Jêhowa. 13 Paq loq hnen mangai ten tìa da pì, paq blah yŏc da wì cleq. Ƀac baha da mangai patìh ùh khòh don đòeq ta hnim pì trùh hì da-èh. 14 Apaq ra-òh hamaiq ka mangai clìc, paq roh đòeq kan tawac enh ngèa mangai ùh xau broq ka haq loq cro; mahaq ep yùq crè ka Boc Plình pì: Au kô raq Jêhowa. 15 Trong hadrah, pì apaq ùh hnhùh jang, paq yeo loq waq ka mangai pa, paq camaih ka mangai padrŏng; mahaq tiaq kan taq atoq đòeq hadrah ka mangai ten tìa pì. 16 Apaq lam jàp jìa đòeq prai bàu capoch hwang ka cabô taqne mangai da pì, apaq broq cleq ma loq yat trùh kan rìh da mangai ten tìa pì: Au kô raq Chuaq Jêhowa. 17 Paq i manoh tagit ka mangai Isorali aih bua pì; drah cwò ka mangai ten tìa, đòeq ùh hìaq ep wiang pòq yiniq lui wì haq. 18 Paq chaq trong hu patem chau, hadai paq ban wê manoh git ka cabô taqne mangai da pì, mahaq thê loq waq ka mangai haten hatìa tìah ka cla rađeh: Au kô raq Chuaq Jêhowa. 19 Pì ep wèq bài ranenh au.

Paq đòeq ƀài ngè aban ma crài adrech kòe dabau.

Paq rai baiq yiniq adrech ta ruàng pì.

Paq caxùnh eo cwàn ajìp xi bàc yiniq bai. 20 Tàng joq mangai calô kùi rai tango ka mangai hapŏng cadrì khoe tèu bàu yŏc mangai qnoeq, mahaq qnhòq jah baxon qnoh, qnhòq jah paclaih, wa aih èh ep jah kan baxa, mahaq toq ma ùh hìaq ep cachìt, majah qmang aih mangai hapŏng cadrì aih qnhòq jah paclaih. 21 Mangai calô ep qnàng moeq toq trìu calô trùh enh ngèa ka Chuaq Jêhowa ajang trong qmang traiq taglàm, đòeq broq ramènh baxon yiniq lui. 22 Mangai pajàu yŏc trìu calô aih broq ramènh baxon yiniq lui đòeq baxnon yiniq lui ka mangai ma khoe broq, enh ngèa ka Chuaq Jêhowa, aih èh, yiniq lui haq jah caqnaih. 23 Jò pì ma hi mùt gùng Cana-an, èh jò pì khoe pìt bàc adrech long plì, ep ngan ƀài plì aih ùh hruah, tìah ka qnhòq kat akia, ta piq hanam ep ngan haq ùh hruah; ùh dùh kaq. 24 Mahaq trùh hanam pôn, ƀài plì haq dìq wìh wìa hadròeh aih la ramènh apôi Chuaq Jêhowa 25 Trùh hanam padam, pì jah acaq ƀài plìh haq, broq qmang aih đòeq long jah loh plì yeo bàc tam: Au kô raq Jêhowa Boc Plình pì. 26 Pì paq acaq ngè leq oe i mahim, paq blàih blŏng, ngan tì. 27 Paq got haqmai xàc dudan ka gàu, hadai paq kat haqmai xàc mom. 28 Apaq taiq mangai cachìt ma ti xah dèh chac, hadai apaq ti xam dèh chac: Au kô raq Chuaq Jêhowa. 29 Paq baxep deh kon cadrì xi trong panan thê haq wìa mangai tech deh chac, đòeq gùng pì ùh hìaq i kan tango anang rai bình chàu kan dù. 30 Pì ep wèq hì sabat au, rai ta-iu nòe hadròeh da au: Au kô raq Chuaq Jêhowa. 31 Pì paq tawìh ta mangai waiq mahua mangai cachìt hadai ùh khòh chaq mangai ngan tì; ùh khòh bòch wì aih, majah qmang aih wì haq broq ka pì loh ka ùh hruah: Au kô raq Chuaq Jêhowa Boc Plình pì. 32 Enh ngèa mangai ko gàu, ìh ep yòng, ta-iu ka mangai craq, rai ta-iu yùq ka Boc Plình ìh. Au kô raq Chuaq Jêhowa. 33 Jò mangai diac wì trùh oe đeh taqne pì, aih èh paq tabroq ka wì haq ùh i ka ƀè ƀàn. 34 Mangai diac wì ma rìh oe taqne pì hanoh jah tình tìah ka mangai ha-uang ta pì; ep loq waq ka wì haq tìah ka cla pì, majah qmang aih pì hadai khoe broq đeh mangai rìh oe đeh ta Êdip: Au kô raq Jêhowa Boc Plình pì. 35 Pì paq yŏc maneh ùh troq jò ti wêh ngan dang yôh, jò kìq ngan kan trap, jò ti arèn 36 Pì ep i kìq ma troq joq qnàng, plì kìq ma troq maneh, mòeq êpha qnàng, mòeq hin joq qnàng Ê-pha là một lường chừng 20 litres; hin là một phần sáu của ê-pha

Au kô raq Jêhowa Boc Plình pì, Mangai ma khoe qnoh pì loh khoe ka Êdip. 37 Qmang aih, pì ep wèq rai broq tiaq ƀài ranenh xam bàu thê da au: Au kô raq Chuaq Jêhowa.