1 Chuaq Jêhowa doe tam ka Môise: 2 Drah anoe ka Isorali: Au kô raq Jêhowa Boc Plình pì. 3 Pì apaq broq tiaq dua wì ma broq ta Êdip, aih nòe pì khoe oe, hadai paq broq tiaq gùng Cana-an, aih la nòe au padon qnung pì mùt: paq top dua wì broq. 4 Pì ep iu tiaq bàu au thê, wèq ranenh au đòeq broq tiaq: Au kô raq Chuaq Jêhowa Boc Plình pì. 5 Qmang aih, wèq tiaq ranenh xam bàu au thê, mangai leq broq tiaq jah canòm ka aih èh đòeq jah rìh: Au kô raq Chuaq Jêhowa. 6 Taqne pì apaq i cabô thia ten ka gucadrì oe raq hadròng cla đòeq tango: Au kô raq Chuaq Jêhowa. 7 Apaq tango deh ka miq đòeq broq kan baxep deh ka baq. 8 Paq tango deh ka miq neo, tàng broq qmang aih, aih raq kan baxep dèh baq. 9 Apaq tango ka oh daq cadrì da cla, yac ka pajùm baq miq dèh hra, yac ka pajùm miq baq dèh hra, yac ka ha-uang hnim cla, yac ka ha-uang taqnoeq. 10 Apaq tango dèh ka xau cadrì, yac ka xau pah nuiq, xau pah ngoaiq; tàng broq qmang aih, aih raq baxep deh cla. 11 Paq tango ka kon cadrì da miq neo ha-uang enh baq cla, majah aih raq oh cadrì pì. 12 Apaq tango ka ƀài oh daq cadrì da baq pì; aih xài oh daq baq da pì. 13 Apaq tango ka wì oh daq cadrì da miq pì, aih xaih oh daq da miq pì. 14 Apaq tango ka mai dèh mìh, ka mai da dùch pì, tàng broq qmang aih, aih xài broq ka xep oh daq da baq pì. 15 Apaq tango dèh ka kon mai, aih xài mai da kon calô pì. 16 Apaq tango ka mai dèh daq hadai apaq tango ka mai dèh oh; tàng broq qmang aih xài broq kan xep dèh ka oh daq.

17 Apaq tango ka gucadrì hloe xam kon cadrì haq. Paq yŏc xau nuiq ùh meh xau ngoaiq haq đòeq tango ka wì aih; wì aih xài dìq nang noe haten da haq, trong aih dìq jaq dù. 18 Apaq yŏc oh mai cla đòeq broq yang, paq kaq kùi ti haq jò mai cla oe rìh, èh loq loh kan tarènh.

19 Jò gucadrì i khê, paq thia haten hu waq ka haq. 20 Apaq kùi ti cadrì wì plài, paq broq ka rađeh loh ka ùh hruah ti mangai aih. 21 Paq rùp dèh kon đòeq tadreo dèch ka kiac Moloc, Ấy là một tà-thần của người A-mô-rít thờ, paq broq amùa ka yiniq Boc Plình: Au kô raq Chuaq Jêhowa. 22 Apaq kaq kùi ti mangai calô tìah ka wì ma kaq kùi ti moeq ngai gucadrì; aih xài kan pada amùa. 23 Apaq tango ti ƀài ngè aban, đòeq broq ka rađeh loh ka ùh hruah ti ngè aih; mangai cadrì ùh jah dèch chac rađeh am ka ngè ma aban đòeq jah tango ti haq. Aih raq kan amùa ramòt.

24 Pì apaq broq yac ka mòeq yiniq ta ƀài yiniq aih đòeq broq ka rađeh loh ka ùh hruah; majah qmang aih ƀài mangai diac wì au ma padon hnan đac enh ngèa pì dìq khoe loh ka ùh hruah taiq wì haq broq ƀài yiniq aih. 25 Jaq taneh mech loh đeh ka ùh hruah taiq wì haq, kô èh au phŏc yiniq lui ngang dù wì haq; taneh jah hac qnoh đac wì haq. 26 Yàng pì kô hòm, yac ka mangai ma ha-uang gùng cla yac ka mangai diac wì ma rìh oe taqne pì, ep wèq bàu xam ranenh au, paq broq kan ramòt qmang aih. 27 Taiq ƀài kan ramòt aih, ƀài mangai ma rìh tacô adroe ka pì khoe broq; èh taiq wì haq aih dài taneh majah loh đeh ka ùh hruah. 28 Qmang aih, paq broq ka taneh loh ka ùh hruah, èh taneh loq hac qnoh pì, qmang ka haq khoe hac qnoh ƀài mangai ma oe tacô adroe ka pì qmòh; 29 Majah qmang aih cabô leq broq mòeq yiniq ta ƀài kan aramòt aih dìq ep hnan qnoh đac khoe ka Isorali. 30 Qmang aih, pì ep wèq trong au khoe tanap thê, đòeq ùh hìaq top dua yac ka mòeq ta ƀài trong acaq oe ramòt wì ma khoe broq adroe ka pì trùh, hadai paq đòeq rađeh loh ka ùh hruah enh trong rìh acaq oe ramòt aih. Au kô raq Chuaq Jêhow Boc Plình pì.