1 Chuaq Jêhowa doe ka Môise qmang kô: 2 Anoe ka Arôn, xam wì kon haq xam dìq dŏng ka Isorali: Kô bàu da Chuaq Jêhowa tanap: 3 Tàng mòeq ngai calô ta Isorali pàc moeq toq ƀo, mòeq toq trìu, ùh meh mòeq toq bubi yac ka ta traiq lình qnì enh gùng ka traiq lình qnì, 4 ùh aràng trùh jang qmang traiq taglàm đòeq broq ramènh dèch ka Chuaq Jêhowa, enh ngèa ka hnim kùh waiq đò da Chuaq Jêhowa, mangai aih èh khoe pòq yiniq broq ta-ùc mahim, wì haq khoe broq ta-ùc mahim, dài majah ep hnan qnoh enh gùng ka Isorali. 5 Qmang aih dôq mangai Isorli yŏc dèh ramènh đeh ma dèch ta gùng aràng ajang mangai pajàu, enh ngèa ka Chuaq Jêhowa, jang qmang traiq taglàm, đòeq dèch broq ramènh waiq kan catèm ka Chuaq Jêhowa. 6 Mangai pajàu ùc mahim kon ramènh aih ta prang tadreo da Chuaq Jêhowa ma đòeq ajang qmang traiq taglàm, bùh bòq i kan xua thùm ka Chuaq Jêhowa. 7 Mangai Isorali hanoh pi khòh dèch deh ramènh cleq ka kiac bubi hòm, aih la ƀài kiac wì haq ma xan tango yôt. Kô raq ranenh mòeq đòeq ka wì haq enh qnhòng kô trùh qnhòng tau. 8 Qmang ai, ìh ep anoe ka mangai Isorali rameh: Yac ka cabô taqne mangai Isorali qnì, mangai diac wì ma rìh oe taqne wì haq qnì, dèch ramènh bùh qnì ramènh cleq qnì, 9 mahaq ùh aràng trùh ajang qmang traiq taglàm đòeq dèch ka Chuaq Jêhowa, mangai aih èh ep qnoh đac enh gùng ka Isorali.

10 Yac ka mangai Isorali yac ka mangai diac wì rìh oe taqne wì haq, acaq mahim cleq ùh dèh, aih èh au panòeh ka mangai aih, hnan qnoh đac khoe ka Isorali. 11 majah qmang aih kan rìh Nguyên-bổn rằng: Linh-hồn vẫn ở trong huyết da xech akia oe ta mahim; au khoe am ka pì mahim pùc ta prang tadreo đòeq broq ramènh baxon yiniq lui mahua yiang rađeh; majah qmang aih canòm kan rìh mahim men jah baxon yiniq lui. 12 Dài aih au majah khoe doe ka mangai Isorali: Taqne pì paq i cabô kaq mahim; mangai diac wì ma rìh oe qne pì hanoh ùh khòh kaq mahim. 13 Tàng i cabô, yac ka mangai Isorali, yac ka mangai diac wì rìh oe qne wì haq, loq axan jah mòeq toq jam gùng qnì mòeq toq chìm ma khòh kaq jam, aih ep pot mahim haq khoe aih hi yŏc taneh catùh hlài; 14 Majah qmang aih kan rìh da rìm ngè rìh, aih la mahim haq; ta mahim i kan rìh. Dài aih raq, au majah khoe doe ka Isorali: Pì ùh khòh kaq mahim rìm ƀài ngè rìh, majah qmang aih kan rìh da rìm ngè rìh aih la manhim haq; cabô kaq ep hnan qnoh đac.

15 Ùh dèh ka cabô, yac ka ha-uang ta gùng cla, yac ka mangai diac wì, cabô acaq jam ngè cachìt ùh meh ngè rôm khoe hit hanang haq, aih ep rùh dèh eo cwàn, hùm ta diac, mangai loh ka ùh hruah trùh xèq clam, khoe aih hi jah hreo hlài. 16 Mahaq tàng wì aih ùh rùh dèh eo cwàn èh ùh hùm rađeh ta diac, aih èh wì haq pòq wê deh yiniq lui.