16

1 Atìq ka baiq ngai kon calô da Arôn cachìt jò wa thia haten enh ngèa Chuaq Jêhowa, aih haq doe ka Môise, 2 rameh: Drah doe ka Arôn, daq ìh, haq paq mùt yôt nòe hadròeh oe enh dalam ka bai prình, enh ngèa ka calàp baxon yiniq lui enh crŏng hom, yùq èh haq loq ep cachìt; majah qmang aih au oe ta yùc ma loh enh crŏng calàp baxon yiniq lui.

3 Arôn mùt tanòe dìq jaq hadròeh qmang kô èh: Haq ep rùp moeq toq ƀo calô caqmon kàn, đòeq broq ramènh baxon yiniq lui, èh xam moeq toq trìu calô broq ramènh bùh. 4 Haq ep caxùnh eo yôh xi bai lan, enh qneq atàc cwàn xi bai lan, kàt caqnam xi bai lan rai kui tagàu moeq blah mù xèp xi bai lan. Aih la ƀài eo hadròeh, haq ep hùm ta diac adroe ka atàc ƀài ngè aih. 5 Enh nòe mangai Isorali, haq rùp yŏc baiq toq kon bubi calô đòeq broq ramènh baxon yiniq lui xam moeq toq kon trìu calô đòeq boq ramènh bùh. 6 Arôn hi dèch moeq toq kon ƀo broq ramènh baxon yiniq lui ka rađeh, xam ka hnim cla. 7 Khoe aih haq rùp baiq toq bubi calô, aràng đòeq enh ngèa ka Chuaq Jêhowa, ajang nòe trong qmang traiq taglàm. 8 Khoe ka aih, Arôn pàih panàih, moeq aih da Chuaq Jêhowa, moeq aih da Axasên. 9 Arôn hi aràng bubi calô panàih ma troq da Chuaq Jêhowa lam haten rai dèch ma aih broq ramènh baxon yiniq lui. 10 Èh toq panàih ma troq da Axasên, aih rong rìh enh ngèa Chuaq Jêhowa, đòeq broq ramènh baxon yiniq lui ta haq, khoe aih caqnaih haq mùt tađùng hawit đòeq haq hlài ta Axasên. 11 Qmang aih, Arôn ep aràng ƀo calô aih la kon ramènh baxon yiniq lui, pàc ƀo aih broq ramènh baxon yiniq lui ka cla xam dìq ka wì ta hnim. 12 khoe aih yŏc abôq ma bùh ngè xua thùm tah ta aih bình ngia ùnh cheo enh cabŏng tadreo enh ngèa Chuaq Jêhowa, xam moeq cadop dàc xua thùm, aràng mùt enh dalam ka bai prình. 13 Haq ep tah dàc xua thùm aih ta-ùnh, enh ngèa Chuaq Jêhowa, dôq nhòe xua thùm glom dŏng ta calàp baxon yiniq lui ma oe enh crŏng hom, aih èh haq ùh hìaq cachìt. 14 Haq hadai ep yŏc mahim kon ƀo aih, yŏc hadrang tì da arat tapèh yàng ta calàp baxon yiniq lui, bè mahì tŏc, èh tapèh yàng enh ngèa ka calàp baxon yiniq lui. 15 Khoe ka aih, pàc bubi ma đòeq broq ramènh baxon yiniq lui ka mangai Isorali; qnàng mahim aih mùt enh dalam ka bai prình; broq tìah ka haq ma khoe broq ka mahim ƀo calô, aih la da arat ta calàp baxon yiniq lui xam enh ngèa ka calàp baxon yiniq lui.

16 Broq qmang kô haq jah baxon yiniq lui ka nòe hadròeh taiq yiniq lui da Isorali, ùh kè ka yiniq lui wì haq qmang leq. Haq hanoh ep broq qmang aih ka traiq taglàm ma oe taqne kan ùh ùh hruah da wì haq. 17 Jò mangai pajàu mùt đòeq broq ramènh baxon yiniq lui ka nòe hadròeh trùh jò haq tawìh loh, aih apaq i cabô oe ta traiq taglàm; qmang aih haq broq ramènh baxon yiniq lui ka rađeh, ka hnim rađeh, xam dìq ka Isorali.

18 Khoe aih, haq wìh loh, thia ajang prang tadreo enh ngèa Chuaq Jêhowa, đòeq broq ramènh ka prang tadreo; haq yŏc mahim kon ƀo calô xam bubi calô, xùt dudan ƀài aki prang tadreo. 19 Khoe yŏc hadrang tì da arat mahim tapèh yàng ta prang tadreo, broq ka prang jah hreo hadròeh, taiq ƀài kan ùh hruah da mangai Isorali.

20 Jò mangai pajàu khoe gêh ka broq ramènh baxon yiniq lui ka nòe hadròeh, ka prang tadreo, aih èh haq ep tadreo dèch bubi calô ma oe rìh tau. 21 Arôn roh dèh baiq toq tì nòe gàu bubi calô ma oe rìh, anoe qnoh ƀài kan ngang dù, ƀài kan ùh troq, aih la ƀài yiniq lui da Isorali, taqmòq dìq jang gàu bubi, khoe aih thê mangai ma khoe padon đòeq ka bìac kô hnan qnoh bubi, mùt haq tađùng hawit. 22 Aih èh, bubi calô aih pòq wê ta chac haq ƀài yiniq lui ngang dù da Isorali tanòe hawit. 23 Arôn hi wìh mùt ta traiq taglàm lêh eo cwàn xi bai lan habuàt ma khoe caxùnh đòeq mùt nòe dìq jaq hadròeh, haq đòeq ƀài ngè aih ta aih. 24 Khoe aih yŏc diac hùm rađeh tanòe hadròeh, caxùnh hlài dèh eo, loh enh gùng, dèch ramènh bùh ka mangai Isorali, đòeq broq ramènh baxon yiniq lui ka rađeh xam ka wì. 25 Haq hanoh ep yŏc bòq da ƀài kon ramènh baxon yiniq lui bùh ta prang tadreo. 26 Mangai ma tiaq qnàng bubi calô ka Axasên, ep rùh dèh cwàn eo, hùm ta diac lem, khoe aih men jah mùt ta traiq lình.

27 Mahaq wì ep qnoh enh gùng ka traiq lình ƀo calô xam bubi calô ma khoe dèch broq ramènh baxon yiniq lui, mahim haq ma khoe qmùt nòe Dìq jaq Hadròeh đòeq broq ramènh baxon yiniq lui; èh yŏc ƀài akia xam ìc baiq toq ngè aih bùh ta-ùnh. 28 Mangai ma yòng bùh ep rùh dèh eo cwàn, hùm ta diac, khoe ka aih men jah mùt ta traiq lình.

29 Kô èh ranenh mòeq đòe am ka pì: trùh hì mòeq jàt khê tapèh, pì ep apàm, ùh khòh broq qmòe yac ka moeq yiniq cleq, yac ka cla pì yac ka mangai diac wì ma rìh oe taqne pì. 30 Majah qmang aih, ta hì aih ramènh baxon yiniq lui jah broq am ka pì, đòeq pì jah hreo lem: joq qnàng pì jah hreo lem khoe ka yiniq lui pì enh ngèa ka Chuaq Jêhowa. 31 Aih la ramènh Sabat, mòeq hì padài am ka pì, pì ep apàm; aih la ranenh mòeq đòe. 32 Mangai patìh ma khoe jah ranenh xùt dàu đòeq broq pajàu kàn thai dèh baq, ep caxùnh eo xi bai lan hadròeh, 33 đòeq haq broq ramènh baxon yiniq lui ka nòe hadòeh, ka traiq taglàm, ka prang tadreo, ka ƀài pajàu xam dìq dŏng ka rìm mangai.

34 Mòeq hanam mòeq yàng ep broq ramènh baxon yiniq lui ka mangai Isorali, đòeq wì haq jah hreo deh ka ƀài yiniq lui cla wì haq; aih la ranenh mòeq đòe am ka pì.