1 Chuaq Jêhowa anoe tam ka wa Môise wa Arôn rameh: 2 Thê anoe ka mangai Isorali qmang kô: Waq toq mangai calô leq ta chac haq loh jìq làuq, aih èh haq loh ka ùh hruah; 3 kan ùh hruah da haq taiq kan jìq làuq: yac chac haq loh diac ùh wìa yac khoe atàt, aih dua mangai aih loh ka ùh hruah. 4 Juàng leq haq aih khoe kùi, dìq loh ka ùh hruah: èh ƀài ngè leq haq khoe haqngui enh qnhèq hanoh loh ka ùh hruah. 5 Cabô ma troq bèq da haq juàng, ep rùh dèh cwàn eo, hùm ta diac, èh loh ka ùh hruah trùh xèq clam. 6 Cabô haqngui nòe mangai jìq làuq aih khoe haqngui, ep rùh dèh cwàn eo, hùm ta diac, èh loh ka ùh hruah trùh xèq clam. 7 Cabô troq bèq chac mangai jìq làuq aih, ep rùh dèh cwàn eo, hùm ta diac, èh loh ka ùh hruah trùh xèq clam. 8 Tàng mangai jìq làuq troq cachôh ka mangai ma hruah, mangai aih èh ep rùh dèh cwàn, hùm ta diac, èh loh ka ùh hruah trùh xèq clam. 9 Xê leq mangai jìq làuq aih khoe haqngui aih èh dìq loh ka ùh hruah. 10 Waq toq cabô troq bèq yiniq cleq enh chac mangai jìq làuq aih, dìq top kan ùh hruah trùh xèq clam. Cabô ma wê ƀài ngè aih, ep rùh dèh cwàn eo, hùm ta diac, èh top kan ùh hruah trùh xèq clam. 11 Yac ka cabô ùh dèh, waq toq mangai jìq làuq aih ùh qnheo tì ta diac mahaq troq bèq haq aih, mangai aih èh ep rùh dèh cwàn eo ta diac, èh top kan ùh hruah trùh xèq clam. 12 Abôq taneh leq mangai aih troq bèq, ep tùq đac ka padah, ngè broq xi long, aih qnheo ta diac. 13 Jò mangai calô jìq làuq khoe jah brêh, aih ep rèn patep pang hì haq jah brêh trùh tapèh hì, khoe aih rùh dèh eo cwàn ta diac hìu; khoe aih, haq hi jah hreo. 14 Trùh hì rahem, haq aih ep rùp ka rađeh baiq toq trù braih, ùh meh baiq toq trù kon, lam trùh enh ngèa Chuaq Jêhowa, jang nòe qmang traiq taglàm, èh am ka mangai pajàu. 15 Mangai pajàu dèch toq ma kô broq ramènh baxon yiniq lui, ma tau broq ramènh bùh, qmang aih mangai pajàu broq ramènh baxon yiniq lui da mangai calô kô enh ngèa Chuaq Jêhowa. 16 Jò mangai calô apô xep, ep hùm dìq ka chac ta diac, èh loh ka ùh hruah tùh xèq clam. 17 Eo cwàn xam ngè akia leq ma khoe top, ep rùh ta diac, loh ka ùh hruah trùh xèq clam. 18 Jò mangai calô xam mangai cadrì waq ka dabau, aih èh ep hùm ta diac, loh ka ùh hruah trùh xèq clam. 19 Jò mangai cadrì i khê, aih ep ùh hruah ta tapèh hì; waq toq cabô ma bèq haq hi loh ka ùh hruah trùh xèq clam. 20 Ngè leq haq ma kùi qnì haqngui qnì jò haq ma i khê, aih dìq top kan ùh hruah. 21 Cabô troq da haq juàng, ep rùh dèh cwàn eo, hùm ta diac, èh loh ka ùh hruah trùh xèq clam. 22 Cabô ma troq ngè leq haq ma khoe haqngui enh qnhèq, ep rùh dèh eo cwàn, hùm ta diac, èh loh ka ùh hruah trùh xèq clam. 23 Tàng loq i cleq ta juàng, ùh meh ta ngè haq haqngui, cabô ma troq poh, hi loh ka ùh hruah trùh xèq clam. 24 Tàng i moeq ngai calô waq ka gucadrì aih, èh kan amùa jò i khê top ka mangai calô, aih èh mangai calô loh ka ùh hruah ta tapèh hì; juàng leq haq ma kùi dìq top kan ùh hruah. 25 Jò mangai gucadrì khoe dìq dèh ka khê mahaq oe raq loh mahim bàc, ùh meh loh ka lon, aih loh ka ùh hruah tìah ka jò oe raq i mahim qmang ka jò i khê. 26 Jò i mahim, yac ka juàng leq haq khoe kùi enh qnhèq dìq tìah qmang ka juàng jò haq i khê diq. 27 Cabô ma troq ƀài ngè aih dìq loh ka ùh hruah, ep rùh dèh cwàn eo, hùm ta diac, èh loh ka ùh hruah trùh xèq clam. 28 Jò mahim gucadrì aih khoe atàt, ep rèn pang hì atàt jah tapèh hì, aih èh hi jah hruah. 29 Trùh hì rahem, mangai aih rùp baiq toq trù braih, ùh meh baiq toq trù kon, aràng ka mangai pajàu ajang qmang traiq taglàm. 30 Mangai pajàu ep dèch toq ma kô broq ramènh baxon yiniq lui, toq ma tau broq ramènh bùh; broq qmang aih haq baxon yiniq lui da gucadrì tau enh ngèa Chuaq Jêhowa. 31 Qmang aih, pì jah lah mangai Isorali hangai kan ùh hruah da wì haq, yùq èh wì haq loq broq amùa ka traiq taglàm au ma xan oe taqne wì haq, ùh qmang aih èh wì haq loq ep cachìt dèh ta kan ùh hruah. 32 Aih raq ranenh am ka mangai calô loh ka jìq làuq, am ka rìm ngai apô xep, 33 am ka gucadrì jò haq i khê, ka rìm ngai, yac ka gucalô gucadrì, ma loh ka jìq làuq, ka mangai calô jò haq waq ka gucadrì jò haq i khê.