1 Chuaq Jêhowa doe ka Môise: 2 Anoe ka mangai Isorali aràng ka ìh dàu Oliu hliang lem, wì ma padit enh plì, đòeq bùh đen, dôq đen jah cheo yôt. 3 Arôn ep wèq ngan đen aih ta traiq taglàm, enh gùng ka bai prình hom tajao, dôq đen aih jah cheo yôt enh dixèq trùh sroq atìq, enh ngèa ka Chuaq Jêhowa; aih ranenh mòeq đòeq am ka xinoe bài pì. 4 Arôn dèch ƀài đen ta jo đen xi wang, dôq đen jah cheo yôt enh ngèa Chuaq Jêhowa. 5 Ìh hadai ep yŏc dàc qmau mì ma ha-buàt, broq mòeq jàt baiq toq ƀênh; mòeq toq trap baiq phàn mòeq jàt êpha. 6 Khoe aih padon loh baiq brong mòeq brong tadràu toq ta cabŏng xi wang enh ngèa Chuaq Jêhowa. 7 Yŏc dàc gahnàu lem rac tiaq baiq brong ƀênh, đòeq broq kan bahmàng ta ƀênh, qmang ka ramènh bùh dèch enh ngèa Chuaq Jêhowa. 8 Rìm hì sabat, wì padon yôt ƀênh kô enh ngèa Chuaq Jêhowa, ƀênh kô loh enh mangai Israli, aih la tajao mòeq đòe. 9 Ƀài ƀênh kô jah Arôn xam ƀài kon calô haq; wì haq ep acaq ƀênh aih nòe hadròeh, aih la phàn dahwèq acaq dìq jaq hadròeh, majah qmang aih dahwèq aih loh enh ƀài ramènh bùh dèch ka Chuaq Jêhowa. Aih la ranenh mòeq đòeq.

10 I moeq ngai kon calô, miq haq mangai Isorali, baq haq mangai Êdip, loh qne mangai Isorali, tajêh ka mangai Isorali nòe traiq lình.

11 - 12 Mangai calô aih capoch troq rai ra-òh hamaiq ka yiniq Chuaq Jêhowa; wì aràng haq trùh ajang Môise, wì clêh padràng haq, gòm trùh jò Chuaq Jêhowa doe ep hadrah mangai aih qmang leq. Yiniq miq haq Sêlomit, kom cadrì da Đipri, oe ta xinoe Đan. 13 Khoe aih, Chuaq Jêhowa doe ka Môise: 14 Qnoh mangai khoe capoch ra-òh hamaiq aih loh enh gùng ka traiq lình, dìq ka mangai i tàng haq ep roh tì ta gàu haq, rìm ngai ep đàp haq xi hmo 15 Khoe aih doe ka mangai Isorali qmang kô: Mangai leq capoch ra-òh hamaiq dèh ka Boc Plình, aih èh ep pòq wê deh kan baxa enh yiniq lui cla

16 Cabô capoch troq yiniq Chuaq Jêhowa aih èh ùh claih ep jêh đac cachìt; dìq dŏng ka mangai ep đàp haq xi hmo; yac ka mangai diac wì, yac ka mangai ha-uang gùng cla. 17 Cabô jêh cachìt mòeq ngai leq, yac ka haq aih la cabô ùh dèh, dua ep hadrah ka cachìt. 18 Cabô jêh cachìt ka ngè wì aban, ep clìh hlài da wì, aih la qnoh caxènh 19 Jò cabô broq ka mangai haten hatìa loh habau, aih èh wì ep broq ka haq loh chau habau qmang ka haq ma khoe broq: 20 Tagoh clìh ka tagoh, mat clìh ka mat, hanenh clìh ka hanenh. Wì broq ka haq loh habau daq adàng ka haq ma khoe broq ka mangai qnoeq diq. 21 Cabô broq cachìt ka ngè aban, aih ep clìh hlài da wì; mangai leq jêh đac moeq ngai, haq aih èh ep hadrah ka cachìt. 22 Ùh dèh yac ka mangai diac wì yac ka mangai gùng cla, pì dìq ep tiaq pajùm moeq ranenh 23 Qmang aih Môise anoe hlài ka Isorli, thê qnoh mangai ma khoe capoch ra-òh hamaiq loh enh gùng ka traiq lình đòeq đàp haq xi hmo. Isorali broq wop qmang ka bàu Chuaq Jêhowa khoe tanap ka Môise.