1 Chuaq Jêhowa doe ka Môise ta bui wang Sina-i qmang kô: 2 Anoe ka mangai Isorali rameh: Jò pì khoe mùt gùng au ma padon am, aih èh taneh ep padài, wèq mòeq ramènh saƀat ka Chuaq Jêhowa. 3 Ta tadràu hanam, pì rai adrech ta ruàng rai git deh plì nho, rai gat ƀài dahwèq loh enh taneh. 4 Mahaq hanam tapèh aih la hanam saƀat, đòeq taneh padài, aih la mòeq hanam saƀat ka Chuaq Jêhowa; pì apaq rai adrech ta ruàng pì, hanoh paq git plì nho pì. 5 Ùh khòh gat ƀài cleq hon đeh atìq ka jò gat, èh hadai paq git plì nho da wuàn nho ùh i broq nhat: aih la hanam đòeq ka taneh padài. 6 Yiniq cleq loh enh taneh ta hanam saƀat: aih đòeq broq dahwèq acaq ka pì, ka hapŏng calô hapŏng cadrì, ka mangai abroq patìh ka pì hloe xam ka mangai diac wì rìh oe qne pì, 7 hloe xam ka ngè pì ma ban ta hnim xam ƀài ngè rìh ta rôm wang; dìq dŏng yiniq cleq hon loh enh taneh dìq broq dahwèq acaq.

8 Pì hadai ep rèn tapèh hanam saƀat, aih la tapèh yàng tapèh hanam, đòeq tapèh hanam saƀat aih jah troq pôn jàt hachìn hanam; 9 khoe aih trùh hì mòeq jàt khê tapèh, aih raq hì ramènh baxon yiniq lui, pì ep hlui ken jàp jìa ka gùng. 10 Pì ep broq ka hanam padam jàt wìh wìa hanam hadròeh, rai bahìa kan paclaih am ka rìm ngai ta taneh diac pì. Aih raq hanam lem bùi am ka pì, rìm ngai jah hlài dèh taneh ruàng, mangai leq mangai meh jah hlài dèh ta hnim cla. 11 Hanam padam jàt kô aih la hanam lem bùi am ka pì, ùh khòh rai adrech, ùh khòh gat qmòe cleq ma hon đeh enh taneh èh hanoh ùh khòh git plì nho ùh i palauq,

12 vì là một năm hân hỉ, sẽ làm thánh cho các ngươi; phải ăn những thổ sản.

majah qmang aih kô la hanam lem bùi, broq ka pì hadròeh, ep acaq toq yiniq cleq loh enh taneh ruàng. 13 Ta hanam lem bùi kô, ƀài taneh ruàng dìq jah hlài da cla wì.

14 Tàng pì tech taneh deh ka mangai ten tìa ùh meh pì rot taneh enh wì haq, aih apaq loq hnen padit wì oh daq. 15 Pì rèn pang hanam lem bùi đòeq rot da mangai haten hatìa; mangai aih hòm, ep rèn pang hanam ma oe jah gat. 16 Tàng joq oe bàc hanam đòeq jah gat, aih pì kop atŏc tam jaq; tàng oe toq biaq hanam đòeq jah gat aih pì hi palùa qnoh jaq. Majoq qnàng aih, tech ka pì aih la tech sôq hanam oe jah gat. 17 Paq i cabô taqne pì kaq jŏng deh mangai haten hatìa; mahaq ep loq yùq ka Boc Plình pì, majah qmang aih au kô raq Jêhowa, Boc Plình pì.

18 Mahaq pì ep broq tiaq bàu au thê, wèq rai broq tiaq ranenh au, aih èh pì jah rìh acaq ka catèm ta gùng aih. 19 Taneh jah loh dahwèq am ka pì, èh pì jah panàc rai jah rìh catèm ta gùng aih. 20 Tàng joq pì doe: Tàng ùh rai adrech, ùh gat, aih èh ta hanam tapèh nhèn yŏc cleq hu acaq? 21 Ta hanam tadràu, au caqnìh xôq ramot am ka pì, ta hanam aih èh pì jah tàu ka piq hanam. 22 Hanam rahem, pì hi rai drech rai acaq dahwèq enh hanam dùnh trùh jò mùa maneo da hanam hachìn. 23 Tanneh ùh jah padro catech hloe; majah qmang aih taneh aih la da au, pì oe ta taneh au, budàng mangai diac wì xam mangai tamoe. 24 Gùng pì ma padon jah đòeq broq kùng hang, taneh ep jah baxon yŏc hlài. 25 Tàng oh daq pì loh ka pa hamoq, ep tech dèh moeq qnah taneh, aih èh mangai hadròng ma haten i cwìang lam baxon yŏc hlài, ep lam baxon yŏc hlài taneh oh daq pì ma khoe tech. 26 Mahaq, tàng ùh i ka cabô lam baxon yŏc hlài kùng hang aih da wì haq, yàng èh ta atìq kô cla wì haq abroq kaq loq loh plàih baxon yŏc hlài deh, 27 aih èh ep rèn pang hanam đeh khoe tech đòeq kop tam ƀac blêh koh ka mangai ma rot, aih èh hi jah hlài dèh kùng hang. 28 Tàng cla haq chaq ùh loh cleq đòeq caqnaih dòeh, taneh ma khoe tech aih oe raq cwìang da mangai rot trùh hanam lem bùi; khoe aih taneh hi loh enh tì kŏng mangai rot đòeq wìh hlài ta tì cla mangai i taneh.

29 Tàng cabô tech moeq toq hnim oe ta plài ma i canàng dudan, aih haq i cwìang đòeq baxon yŏc hlài trùh ta moeq hanam atìq ka haq tech, cwìang jah baxon da haq oe toq ta hanam aih raq. 30 Tàng ùh baxon yŏc hlài adroe ka jah moeq hanam, hnim oe ta plài i canàng dudan aih èh jah hloe mangai ma rot xam nang noe haq, trùh hanam lem bùi hnim aih dua ùh loh enh tì kŏng wì haq. 31 Mahaq tàng hnim oe ta plài ma ùh i ka canàng dudan, aih èh budàng taneh ruàng; mangai tech jah baxon yŏc hlài; trùh hanam lem bùi hnim aih hi jah hlài cla mangai tech. 32 Mahaq plài da mangai Lêwi, xam hnim wì haq oe ta aih, aih èh mangai Lêwi i cwìang baxon yŏc hlài yôt. 33 Cabô rot da mangai Lêwi moeq toq hnim oe plài leq ùh dèh, trùh hanam lem bùi ep padreo hlài da cla wì; majah qmang aih ƀài hnim oe ta ƀài plài da mangai Lêwi aih la kùng hang da wì haq taqne mangai Isorali. 34 Ƀài taneh go da plài mangai Lêwi ùh jah tech, aih la kùng hang mòeq đòe da wì haq.

35 Tàng oh daq oe haten ka pì loh ka pa, pi hlàt ban rađeh. Nguyên-bổn là: bàn tay người yếu-liệt aih ep wiang dŏng wì haq, yac ka wì haq aih la mangai diac wì rìh oe qne pì, đòeq wì haq jah oe yôt ti pì. 36 Apaq yŏc ƀac lòe hanoh paq yŏc lòeq enh haq; mahaq ep yùq crè ka Boc Plình pì, aih èh oh daq pì jah oe yôt ti pì. 37 Paq am wì lình ƀac đòeq hu yŏc lòe hanoh paq am wì lình dahwèq acaq đòeq yŏc lòe. 38 Au kô raq Jêhowa, Boc Plình pì, Mangai khoe qnoh pì loh enh taneh Êdip, đòeq am taneh Cana-an ka pì, rai broq Boc Plình pì.

39 Tàng oh daq oe haten ka pì loh ka pa, aràng tech rađeh ka pì, paq panan wì haq patìh tìah ka hapŏng dìc; 40 haq oe hnim pì tìah ka mangai patìh acaq, mangai oe canòm, haq wiang patìh ka pì trùh hanam lem bùi; 41 khoe aih haq xam wì kon haq hêq ka oe ta pì hòm, jah hlài dèh ta hnim cla èh jah hlài dèh taneh diac da kan cadraq. 42 Majah qmang aih, Isorali aih la ƀài hapŏng au ma khoe qnoh deh enh Êdip, ùh khòh tech wì haq qmang ka wì tech dìc. 43 Pì apaq padit hrình wì haq, mahaq ep loq yùq crè ka Boc Plình pì. 44 Ƀài hapŏng cadrì calô da pì, aih dìq loh enh ƀài mangai diac wì ma oe dudan ka pì; enh wì aih pì rot hapŏng cadrì hapŏng calô. 45 Pì jah rot hapŏng dìc enh ƀài kon da mangai diac wì ma oe ta pì xam hadròng wì haq ma ha-uang gùng pì; aih èh wì haq hi loh kùng hang pì. 46 Wì haq aih, pì jah đòeq hlài dèh ka kon xau broq kùng hang, đòeq wì haq broq dìc hloe hloe. Mahaq oh daq pì aih la mangai Isorali, ùh i cabô jah glua padit. 47 Jò moeq ngai diac wì rìh oe qne pì loh ka padrŏng, yàng oh daq Isorali pì ma oe ti wì loh ka pa, ep tech radeh ka mangai diac ma rìh oe qne pì aih, ùh meh ka mangai ta xinoe mangai diac wì aih, 48 atìq ka jò khoe tech rađeh, cwìang đòeq jah baxon yŏc hlài haq dua oe raq i: moeq ngai oh daq haq ma haten jah lam baxon ahlài haq. 49 ùh mìh ùh dùch, ùh meh kon mìh kon dùch, ùh meh mangai hadròng ma haten hanoh jah baxon hlài haq; ùh meh tàng cla haq plàih, aih haq hanoh jah baxon hlài dađeh. 50 Haq hatình ka mangai ma rot pang hanam leq haq ma khoe tech rađeh trùh ta hanam lem bùi; maneh đòeq baxon hlài aih tình tiaq kùng ma baha ka mangai abroq ta ƀài hanam aih. 51 Tàng hanam oe raq bàc, aih hi tình tiaq sôq ƀài hanam kô, haq ep caqnaih ma hatroq tiaq sôq hanam ma oe i đòeq broq maneh baxon hlài dađeh. 52 Tàng hanam oe toq biaq, aih èh hatình ka mangai ma rot tiaq ƀài sôq hanam kô đòeq qnoh ƀac baxon hlài rađeh. 53 Mangai ma rot aih ep ngan wì tìah ka mangai patìh kaq tiaq hanam, mangai rot ùh khòh ùh dèh ùh dèm ka wì haq. 54 Tàng ùh jah baxon yŏc hlài haq tiaq bài trong kô, trùh hanam lem bùi aih èh haq xam ƀài kon calô haq jah loh dech. 55 Majah qmang aih Isorli aih hapŏng au, aih la hapŏng au ma khoe qnoh deh enh Êdip. Au kô raq Jêhowa, Boc Plình pì.