1 Pì paq broq ƀài radua qmù kan kiac; paq paqnàng radua qmù, ùh meh hmo ngè, taneh gùng pì paq dèch paqnàng hmo i pùng achìh đòeq kùh waiq enh ngèa haq, majah qmang aih au kô raq Jêhowa, Boc Plình pì. 2 ep wèq hì sabat au, rai ta-iu nòe hadròeh au. Au kô raq Chuaq Jêhowa.

5 Jò blai qmau da pì ùh catech trùh jò git nho, jò git nho ùh catech trùh jò rai maq; pì jah acaq ka panàc, jah oe ka catèm dèh ta gùng cla. 6 Au caqnìh kan catèm ta taneh diac, pì kùi ùh yùq ka cabô taqnhùq; au hnan đac ƀài ngè ngang dù loh khoe ka gùng pì, chang jaoq ùh dèch enh qnhèq ka gùng pì. 7 Pì hnan ƀài lình ma tabêq ka pì, wì aih jah tacro enh qneq ka chang enh ngèa pì. 8 Pì padam ngai hnan tiaq moeq hrinh; moeq hrinh hnan tiaq moeq muàn, ƀài lình tablêq ka pì jah tacro ka chang jao ajang ngèa pì. 9 Au hwi hlài ti pì xam kan ha-och tamèt ka pì, broq ka pì jah chèch lòe tam ka bàc, rai wèq deh tajao au ti pì. 10 Pì jah acaq dèh qmau dùnh, èh qnoh ma dùnh đòeq qmùt ònh maneo 11 Au jah đòeq deh nòe oe taqne pì, mahua yiang au ùh tagit ka pì 12 Au jah lam taqne pì, broq Boc Plình pì, èh pì broq mangai da au. 13 Au kô raq Chuaq Jêhowa, Boc Plình pì, Mangai khoe qnoh pì loh enh Êdip, đòeq pì ùh hìaq broq hapŏng dìc. Au khoe goh long ech pì, đòeq pì jah lam rai dèch gàu.

14 Mahaq tàng pì ùh tamàng au, ùh broq tiaq ƀài ranenh kô, 15 tàng jù đac bàu au, mahua yiang pì tablêq hlài ka ranenh au, loh ka ùh broq tiaq ranenh au, tablòq ka tajao da au, 16 aih èh, kô ƀài trong au caqnìh am ka pì: Au caqnìh ka pì kan ramòt, ƀài kan yinìq tôq tanget, broq ka pì pùa mat, tagah lep ta mahua yiang. Qngwan ka pì rai maq, lình wì blah acaq dŏng. 17 Au plôh nòeh ka pì; ƀài lình wì jah hnan tiaq jêh pì, mangai ma tagit ka pì gen padit pì, pì cadàu amot yac ka ùh i cabô hnan tiaq.

18 Khoe qmang aih yàng pì dua ùh waq tamàng au, aih èh tiaq yiniq lui pì, au phŏc tam loe tapèh yàng đòeq hu baxa pì, 19 èh au bahech kan catèh xam kan cadoq manoh pì. Au broq ka trŏc enh qnhèq ka gàu pì cadoq tìah ka mim taneh enh qneq pì cadoq tìah ka đùng, 20 padren pì lep qngwan, taneh ùh loh dahwèq ka pì, long ùh loh plì ka pì.

21 Tàng pì dua enh tablêq ka au, ùh waq tàng bàu au, aih èh đòeq tajì ka yiniq lui pì au caqnìh tam kan ranàc loe tapèh yàng. 22 Au thê ƀài ngè rôm wang trùh đòeq rùp qnung kon pì, kap kaq ngè pì ma aban, jêh đac dôq mangai pì oe palap toq biaq, đòeq trong pì lam loh ka hawit

23 Yac ka khoe qmang aih dua pì ùh iu tiaq trong au gùt bàt, dua oe raq tablêq ka au, 24 aih èh cla au kô hadai talêq hlài ka pì, èh hòm taiq yiniq lui, au caqnìh kan ranàc ka pì loe tapèh yàng hòm. 25 Au caqnìh chang jaoq trùh enh qnhèq ka pì đòeq tabroq chau pì ma khoe broq raliang da au tajao; jò pì tagop ti dabau ta than phôq pì, au caqnìh kan dài trùh taqne pì, tah qmùt pì ta tì kŏng mangai git ka pì, 26 jò au aràng kan pangot hrah trùh, mòeq jàt ngai adrùh bùh ƀênh pì ta tanùh, kìq ƀênh aih am hlài ka pì; pì acaq mahaq ùh panàc. Nguyên-bổn là: khi nào ta bẻ gãy cây gậy bánh của các ngươi

27 Yac ka khoe qmang aih, pì dua ùh tamàng au, oe raq tablêq ka au, 28 aih èh kan noèh au hadai tablêq hlài ka pì, èh taiq yiniq lui pì, cla au kô èh ma phŏc pì loe tapèh yàng hòm 29 Pì jah kaq jam deh kon calô cadrì cla pì. 30 Au raliang đac ƀài nòe haqnhèq pì, raliang qnìh ƀài radua qmù mat mahì, đòeq hanang pì enh qnhèq ka hanang radua qmù kan kiac pì, mahua yiang au ramòt ka pì. 31 Au broq ka nòe plài pì loh ka raliang, nòe hadròeh loh ka hatinh hatot, au pi oe waq kan xua thùm ƀài ramènh pì hòm. 32 Au broq ka gùng aih loh la raliang, jaq mangai ma tablêq ka pì oe ta-aih ep loh ka hamàih. 33 Au broq pì prah priang ta ƀài diac qnoeq rai hroe qnoh chang hnan tiaq atìq ka pì: gùng pì loh ka cađac clui, than phôq loh ka hawit.

34 Jò taneh khoe cađac clui, pì oe nòe taneh diac ma tagit ka pì, jò aih èh taneh jah padài ƀài hanam sabat. 35 Jò taneh jah cađac clui haq jah padài, majah qmang aih jò pì oe ta taneh aih, haq ùh jah padài ta ƀài hanam sabat pì. 36 Taqne pì tàng i cabô ma oe rìh, au broq ka wì haq loh ka lèu nòe taneh diac wì ma tagit ka pì; atêh hla cro xôq broq ka wì haq cadàu amot, tìah ka cadàu ka chang jaoq, tacro mahaq ùh i cabô hnan tiaq. 37 Mangai kô cro raxon enh qnhèq ka mangai tau tìah ka cro ajang mùh chang, ùh i cabô hnan tiaq wì haq, pì ùh nui dràng oe enh ngèa mangai ma git ka pì. 38 pì cachìt lùch ta taqne ƀài mangai diac wì, taneh wì haq lonh yŏc pì 39 Taqne pì loq i cabô ma oe rìh, wì haq jah cachìt yen nòe taneh diac mangai ma tagit ka pì, aih jao yiniq lui enh wì kan cadraq dài wì haq majah ep cachìt yen yen.

40 Jò aih wì haq hi canau loq deh ka yiniq lui, xam kan ngang dù da wì kan cadraq, xam kan wì haq ma àu tablêq ka au. 41 Bìac aih dài au majah tablêq ka wì haq, qmùt wì haq ta taneh diac ma git ka wì haq. Jò aih tàng joq manoh cliac ùh kat akia da wì haq loq paqnoh rađeh rai iu tiaq trong au haqnauq phŏc kan yiniq lui wì haq, 42 aih èh au hi hmàng hlài tajao au khoe broq ti Jacôp, ti Ysac, xam Apraham rai hmàng hlài trùh gùng kô. 43 Majah qmang aih jò taneh diac wì haq cađac clui, aih haq jah padài sabat toq aih hanam jò pi i ka wì ta aih, wì haq ep chìuq phŏc dèh kan ngang dù, majah qmang aih wì haq khoe dù đac bàu au, manoh cliac wì haq khoe ramòt đac ka ranenh da au. 44 Yac ka qmang aih, jò wì haq ma oe đeh ta taneh diac ma git ka wì haq, dua au ùh cađac wì haq, ùh i ramòt đac ka wì haq loh qmòe ep ka cachìt lùch dŏng, èh hadai ùh tabòq tajao au ma khoe broq ti wì haq, majah qmang aih au kô raq Jêhowa, Boc Plình wì haq. 45 Mahaq taiq wì haq, au hmàng hlài tajao đeh ma khoe broq ti kan cadraq wì haq đòeq qnoh wì loh khoe enh Êdip enh ngèa bàc diac, đòeq broq Boc Plình wì haq. Au kô raq Chuaq Jêhowa.

46 Aih la ƀài bàu thê, ranenh, xam trong taqmroq enh Chuaq Jêhowa thê Môise, broq loh taqne Chuaq xam mangai Isorali.