1 Chuaq Jêhowa doe hòm ka Môise: 2 Anoe ka Isorali qmang kô: Tàng mangai leq i bàu waiq dang ma yeo crài, aih la yŏc mangai đòeq dèch am ka Chuaq Jêhowa, aih pì tình maneh jaq haq, jaq ạih èh jah Chuaq Jêhowa. 3 Tàng pì tình maneh jaq mangai calô pang baiq jàt trùh baiq jàt tadràu hanam, aih tình padam jàt siac lo ƀac, tiaq jaq siac lo nòe hadròeh Hãy xem XuXh 30:13 4 Tàng joq kon qyoh enh padam trùh baiq jàt hanam, aih tình baiq jàt siac lo ka kon calô, èh mòeq jàt siac lo ka kon cadrì. 6 Tàng kon nga bu moeq khê trùh padam hanam, aih tình padam siac lo am ka kon calô, èh piq siac lo ka kon cadrì. 7 Tàng mangai craq pang tadràu jàt ta atŏc, aih tình mòeq jàt padam siac lo ƀac ka gucalô, mòeq jàt siac lo ƀac ka gucadrì 8 Tàng mangai waiq khàn aih pa hamoq hrình, ùh hlàt am tiaq maneh jaq pì ma khoe qnoh, aih aràng haq trùh ajang mangai pajàu đòeq haq tình am. Mangai pajàu hi pajaq am ka mangai i bàu waiq dang aih mac ka haq bu hlàt pang leq. 9 Tàng waiq dang tèu am dèh ngè aban đòeq broq ramènh dèch am ka Chuaq Jêhowa, ngè ma dèch aih hi wìh wìa hadròeh. 10 Wì ùh khòh yŏc kon ma yeo lem hu halìh kon ma yeo qmèq, hanoh ùh jah yŏc ma yeo qmèq halìh ka ma yeo lem. Tàng yŏc ma kô halìh ka ma tau, aih èh dìq baiq dìq wìh wìa hadròeh.

11 Tàng ngè aban aih ùh hruah aih ùh khòh broq ramènh dèch ka Chuaq Jêhowa, aih ep aràng ngè aih trùh enh ngèa mangai pajàu, 12 khoe aih mangai pajàu hi mac ka ngè aban aih lem loq qmèq đòeq hu pajaq. Wì ep tiaq maneh mangai pajàu khoe pajaq đòeq caqnaih ƀac. 13 Tàng joq enh baxon yŏc hlài, aih ep kop tam mòeq phàn padam maneh jaq mangai pajàu ma khoe qnoh.

14 Tàng mangai leq enh dèch dèh hnim broq dahwèq hadròeh ka Chuaq Jêhowa, aih èh mangai pajàu ep ngan hnim aih lem loq qmèq đòeq tình maneh jaq; wì ep yŏc jaq mangai pajàu ma khoe qnoh. 15 Tàng mangai khoe dèch dèh hnim enh baxon yŏc hlài, aih èh haq ep kop tam mòeq phàn padam maneh jah khoe qnoh, khoe aih hnim hi jah da haq.

16 Tàng mangai leq lah dèh moeq phàn ruàng da hnim cla đòeq dèch ka Chuaq Jêhowa, qmang aih maneh jaq haq jah tình tiaq adrech wì ma rai, aih la padam jàt siac lo ka moeq ôme adrech qmau. 17 Tàng wì dèch dèh ruàng am ka Chuaq Jêhowa pang Hanam lem bùi, aih èh jah waq troq jaq 18 Tàng wì dèch dèh ruàng atìq ka Hanam lem bùi, mangai pajàu hi tình tiaq pang hanam ma oe i trùh ta Hanam lem bùi đòeq tình maneh jaq ruàng, èh lùa hlài ƀac jaq ma khoe qnoh. 19 Tàng haq ùh baxon yŏc hlài, èh wì khoe tech ka mangai qnoeq, aih èh haq pi jah baxon yŏc hlài hòm. 21 Trùh Hanam lem bùi, ruàng loh enh tì kŏng mangai rot, hi wìh wìa hadròeh, tìah ka đùng ruàng jah dèch ka Chuaq Jêhowa, haq hi jah broq kùng hang ka bài pajàu.

22 Tàng cabô dèch ka Chuaq Jêhowa ruàng đeh rot, ùh xài ruàng enh cadraq, 23 aih mangai pajàu tình tiaq jaq taneh ma khoe dì trùh ta Hanam lem bùi, khoe èh wop hì aih raq mangai kô ep caqnaih jaq ma khoe dì, qmang ka ramènh hadròeh dèch ka Chuaq Jêhowa. 24 Hanam lem bùi, ruàng aih hlài dèh ta cla mangai tech, aih la hlài ta cla wì. 25 Rìm yiniq ep tình tiaq maneh siac lo da hnim kùh waiq: moeq siac lo aih baiq jàt gêra.

26 Mahaq ùh cabô jah dèch kon ramua da ƀài ngè đeh ma ban, yac ka ƀo ka trìu, majah qmang aih ƀài ra ramua aih tiaq ranenh aih khoe da Chuaq Jêhowa. 27 Tàng ngè aban aih ùh sròeh, wì jah baxon yŏc hlài tiaq maneh jaq khoe tình, ep kop tam mòeq phàn padam maneh jaq, tàng ùh baxon yŏc hlài aih ep tech tiaq mac ka maneh jaq ma khoe tình. 28 Mahaq jò cabô ma khoe yŏc kùng hang đeh ma i đòeq dèch ka Chuaq Jêhowa, yac ka mangai yac ka ngè aban, yac ka ruàng enh kan cadraq, aih ùh jah tech ùh jah baxon yŏc hlài, majah qmang aih yiniq cleq khoe dèch aih wìh wìa dìq jaq hadròeh am ka Chuaq Jêhowa. 29 Dìq dŏng ƀài thèq mòeq phàn mòeq jàt enh taneh, enh ƀài dahwèq trùh ƀài qmau loh enh ruàng trùh plì enh long, aih dìq da Chuaq Jêhowa; aih la ngè khoe lah đòeq hadròeh ka Chuaq Jêhowa 31 Cabô enh baxon yŏc hlài yiniq cleq ta thèq moeq phàn moeq jàt aih dìq ep kop tam moeq phàn padam maneh jaq. 32 Phàn mòeq jàt da calùh ƀo ùh trìu, aih la ƀài ngè ma lam enh qneq ka long dùi, toq ma mòeq jàt jàt aih la hadròeh, lah đòeq crài ka Chuaq Jêhowa. 33 Wì ùh khòh hadro ràih ma lem ma qmèq, hadai ùh khòh halìh. Tàng joq halìh, kon ma halìh aih èh xam kon majah halìh, dìq baiq wìh wìa hadròeh; ùh jah baxon yŏc hlài. 34 Aih la ƀài ranenh Chuaq Jêhowa doe Môise, đòeq anoe am ka Isorali, ta bui wang Sina-i.