៦០
ពាក្យទូលអង្វររបស់ប្រជាជាតិក្រោយពេលបរាជ័យ
ពាក្យកាព្យរបស់ស្តេចដាវីឌ ដែលទ្រង់លើកតាមបទឈ្មោះ «ត្រែនៃសេចក្តីបន្ទាល់» ក្នុងកាលដែលទ្រង់ច្បាំងនឹងសាសន៍អើរ៉ាម-ន៉ាហារេម ហើយនឹងសាសន៍ អើរ៉ាម-សេបា រួចយ៉ូអាប់ត្រឡប់មកវាយសាសន៍អេដំមទាំង១ម៉ឺន ២ពាន់នាក់នៅច្រកភ្នំអំបិល សំរាប់មេភ្លេង។
១ ឱព្រះអង្គអើយ
ទ្រង់បានបោះបង់ចោលយើងខ្ញុំ
ទ្រង់បានទំលាយទំលុះយើងខ្ញុំហើយ
ទ្រង់បានមានសេចក្តីខ្ញាល់ ឱសូមឲ្យយើងខ្ញុំបាន
ដូចដើមវិញ
២ ទ្រង់បានធ្វើឲ្យស្រុកញាប់ញ័រ ព្រមទាំងបំបែកចេញផង
សូមកែទីធ្លុះធ្លាយឡើងវិញ ដ្បិតកំពុងតែទ្រេតទ្រោតទៅ
៣ ទ្រង់បានធ្វើឲ្យរាស្ត្រទ្រង់ឃើញការពិបាកណាស់
ទ្រង់បានធ្វើឲ្យយើងខ្ញុំផឹកស្រាជាសេចក្តីងេងងោង
៤ តែទ្រង់បានប្រទានទង់ជ័យ១ដល់ពួកអ្នកដែលកោត
ខ្លាចទ្រង់ ដើម្បីឲ្យបានលើកឡើងឲ្យឃើញ
ដោយព្រោះសេចក្តីពិត។
–បង្អង់
៥ ៙ សូមជួយសង្គ្រោះយើងខ្ញុំ
ដោយសារព្រះហស្តស្តាំនៃទ្រង់
ហើយស្តាប់យើងផង ដើម្បីឲ្យអ្នកស្ងួនភ្ងារបស់ទ្រង់
បានសេចក្តីប្រោសឲ្យរួច
៦ ព្រះទ្រង់បានមានព្រះបន្ទូលដោយសេចក្តីបរិសុទ្ធ
របស់ទ្រង់ហើយ
យើងនឹងត្រេកអរឡើង យើងនឹងបែងចែកក្រុងស៊ីគែម
ហើយនឹងវាស់ច្រកភ្នំសិកូត
៧ ឯស្រុកកាឡាតជារបស់ផងយើង
ហើយខេត្តម៉ាន៉ាសេផង
ខេត្តអេប្រាអិមជាទីមាំមួនដែលការពារក្បាលយើង
៨ ស្រុកម៉ូអាប់ជាអាងសំរាប់ឲ្យយើងងូតទឹក
ហើយយើងនឹងបោះស្បែកជើងទៅលើស្រុកអេដំម
នែ ស្រុកភីលីស្ទីន ចូរស្រែកហ៊ោឡើង
ដោយព្រោះយើង។
៩ ៙ តើអ្នកណានឹងនាំទូលបង្គំចូលក្នុងទីក្រុងមាំមួនបាន
តើអ្នកណានឹងនាំទូលបង្គំទៅឯស្រុកអេដំម
១០ ឱព្រះអង្គអើយ តើមិនមែនទ្រង់ទេឬអី
ដែលទ្រង់បានចោលយើងខ្ញុំហើយ
ឱព្រះអង្គអើយ ទ្រង់ក៏មិនយាងចេញទៅជាមួយនឹង
ពលទ័ពរបស់យើងខ្ញុំទៀតដែរ
១១ សូមទ្រង់ប្រោសមេត្តាជួយយើងខ្ញុំទាស់នឹងពួកសត្រូវ
ដ្បិតសេចក្តីជំនួយរបស់មនុស្ស នោះឥតប្រយោជន៍ទេ
១២ ដោយពឹងដល់ព្រះនោះយើងខ្ញុំនឹងតស៊ូយ៉ាងរឹងប៉ឹងវិញ
ដ្បិតគឺទ្រង់ហើយ ដែលនឹងជាន់ឈ្លីពួកសត្រូវ
របស់យើងខ្ញុំបង់។