៧១
ពាក្យអធិស្ឋានរបស់មនុស្សចាស់ជរា
១ ឱព្រះយេហូវ៉ាអើយ
ទូលបង្គំពឹងជ្រកនៅក្នុងទ្រង់
សូមកុំឲ្យទូលបង្គំត្រូវខ្មាសឡើយ
២ សូមទ្រង់ដោះទូលបង្គំឲ្យរួច ហើយស្រោចស្រង់
ដោយសេចក្តីសុចរិតរបស់ទ្រង់
សូមផ្ទៀងព្រះកាណ៌មកស្តាប់ ហើយជួយសង្គ្រោះ
ទូលបង្គំផង
៣ សូមឲ្យទ្រង់ធ្វើជាថ្មដា សំរាប់ជាទីលំនៅដល់ទូលបង្គំ
ជាកន្លែងដែលទូលបង្គំទៅមកជានិច្ចបាន
ទ្រង់បានចេញបង្គាប់ឲ្យជួយសង្គ្រោះទូលបង្គំហើយ
ដ្បិតទ្រង់ជាថ្មដា ហើយជាបន្ទាយរបស់ទូលបង្គំ។
៤ ៙ ឱព្រះនៃទូលបង្គំអើយ សូមស្រោចស្រង់ទូលបង្គំ
ឲ្យរួចពីកណ្តាប់ដៃនៃមនុស្សអាក្រក់
គឺឲ្យចេញរួចពីកណ្តាប់ដៃនៃមនុស្សទុច្ចរិតដ៏សាហាវផង
៥ ដ្បិតឱព្រះអម្ចាស់យេហូវ៉ាអើយ
ទ្រង់ជាទីសង្ឃឹមនៃទូលបង្គំ
ទ្រង់ជាទីទុកចិត្តដល់ទូលបង្គំតាំងតែពីក្មេងមក
៦ គឺទ្រង់ហើយដែលថែរក្សាទូលបង្គំ តាំងពីផ្ទៃម្តាយមក
ទ្រង់បានគាំទូលបង្គំឲ្យចេញចាកពីពោះម្តាយ
ទូលបង្គំនឹងសរសើរពីទ្រង់ជានិច្ច។
៧ ៙ ទូលបង្គំជាទីអស្ចារ្យដល់មនុស្សជាច្រើន
តែគឺទ្រង់ជាទីពឹងមាំមួនរបស់ទូលបង្គំទេ
៨ មាត់ទូលបង្គំនឹងពេញដោយសេចក្តីសរសើរដល់ទ្រង់
ហើយនឹងពោលពីកិត្តិសព្ទនៃព្រះនាមទ្រង់ដរាបរាល់ថ្ងៃ
៩ សូមកុំបោះបង់ចោលទូលបង្គំ
ក្នុងកាលដែលចាស់ជរាឡើយ
ហើយកុំលះបង់ទូលបង្គំ
ក្នុងកាលដែលមានកំឡាំងអន់ថយនោះដែរ
១០ ដ្បិតពួកខ្មាំងសត្រូវ គេនិយាយដើមពីទូលបង្គំ
ហើយពួកអ្នកដែលចាំមើលជីវិតទូលបង្គំ គេជំនុំគ្នាថា
១១ ព្រះបានបោះបង់ចោលវាហើយ
ចូរយើងដេញតាមចាប់វាចុះ
ដ្បិតគ្មានអ្នកណានឹងជួយវាសោះ។
១២ ៙ ឱព្រះអង្គអើយ សូមកុំគង់ឆ្ងាយពីទូលបង្គំឡើយ
ឱព្រះនៃទូលបង្គំអើយ សូមប្រញាប់មកជួយទូលបង្គំផង
១៣ សូមឲ្យពួកអ្នកដែលទាស់ទទឹងនឹងជីវិតទូលបង្គំ
បានត្រូវអៀនខ្មាស ហើយវិនាសសូន្យទៅ
ឯពួកអ្នកដែលរកប្រទូស្តនឹងទូលបង្គំ
នោះសូមឲ្យគេបានគ្របពេញដោយសេចក្តីដំនៀល
និងអាប់យសវិញ
១៤ ឯទូលបង្គំនឹងមានសង្ឃឹមជានិច្ច
ហើយនឹងសរសើរដល់ទ្រង់កាន់តែច្រើនឡើង
១៥ មាត់ទូលបង្គំនឹងថ្លែងប្រាប់ពីសេចក្តីសុចរិត
និងពីសេចក្តីសង្គ្រោះរបស់ទ្រង់ជាដរាបរាល់ថ្ងៃ
ពីព្រោះទូលបង្គំមិនដឹងជាមានចំនួនប៉ុន្មានទេ
១៦ ទូលបង្គំនឹងទៅដោយព្រះចេស្តារបស់
ព្រះអម្ចាស់យេហូវ៉ា
ហើយនឹងដំណាលពីសេចក្តីសុចរិតរបស់ទ្រង់
គឺរបស់ទ្រង់តែ១ប៉ុណ្ណោះ។
១៧ ៙ ឱព្រះអង្គអើយ ទ្រង់បានបង្ហាត់បង្រៀនទូលបង្គំ
តាំងតែពីក្មេងមក
ហើយដរាបដល់ឥឡូវនេះ ទូលបង្គំបានសំដែង
ពីអស់ទាំងការអស្ចារ្យរបស់ទ្រង់
១៨ ឱព្រះអង្គអើយ សូមកុំលះបង់ចោលទូលបង្គំឡើយ
ទោះទាំងវេលាដែលទូលបង្គំចាស់សក់ស្កូវហើយផង
ដរាបដល់ទូលបង្គំបានថ្លែងប្រាប់ពីព្រះចេស្តាទ្រង់
ដល់ដំណមនុស្សជាន់ក្រោយ
និងពីឥទ្ធានុភាពទ្រង់
ដល់ពួកអ្នកដែលត្រូវកើតខាងមុខ
១៩ ឯសេចក្តីសុចរិតរបស់ទ្រង់ ឱព្រះអង្គអើយ
នោះខ្ពស់ណាស់
ចំណែកឯទ្រង់ដែលបានធ្វើការយ៉ាងធំ
ឱព្រះអង្គអើយ តើមានអ្នកណាដូចទ្រង់។
២០ ៙ ទ្រង់បានឲ្យយើងខ្ញុំឃើញសេចក្តីវេទនាដ៏លំបាក
ជាច្រើនហើយ
តែទ្រង់នឹងប្រោសឲ្យមានជីវិតចំរើនឡើងវិញ
ទ្រង់នឹងនាំយើងខ្ញុំឡើងចេញពីទីជំរៅនៃផែនដី
២១ សូមលើកសេចក្តីខ្ពង់ខ្ពស់នៃទូលបង្គំឡើង
ហើយវិលមកជួយកំសាន្តទូលបង្គំវិញ។
២២ ៙ ឱព្រះនៃទូលបង្គំអើយ ទូលបង្គំនឹងសរសើរទ្រង់
ដោយពិណដែរ
គឺនឹងសរសើរពីសេចក្តីពិតរបស់ទ្រង់
ឱព្រះដ៏បរិសុទ្ធនៃសាសន៍អ៊ីស្រាអែលអើយ
ទូលបង្គំនឹងច្រៀងសរសើរថ្វាយទ្រង់តាមស៊ុង
២៣ កាលណាទូលបង្គំច្រៀងសរសើរដល់ទ្រង់
នោះបបូរមាត់នៃទូលបង្គំនឹងបន្លឺឡើងដោយអំណរ
ព្រមទាំងព្រលឹងនៃទូលបង្គំដែលទ្រង់បានលោះនោះផង
២៤ ឯអណ្តាតរបស់ទូលបង្គំ នឹងនិទាន
ពីសេចក្តីសុចរិតរបស់ទ្រង់ ជាដរាបរាល់ថ្ងៃ
ដ្បិតពួកអ្នកដែលរកប្រទូស្តនឹងទូលបង្គំ
គេបានត្រូវអៀនខ្មាសមូរមុខចុះហើយ។