៩៧
ព្រះគ្រងរាជ្យ
១ ព្រះយេហូវ៉ាទ្រង់គ្រប់គ្រង
គួរឲ្យផែនដីអរសប្បាយឡើង
គួរឲ្យពួកកោះដ៏មានជាច្រើន មានសេចក្តីអំណរដែរ
២ មានពពក និងសេចក្តីងងឹតបាំងជុំវិញទ្រង់
សេចក្តីសុចរិត និងសេចក្តីយុត្តិធម៌
ជាជើងថ្កល់បល្ល័ង្កទ្រង់
៣ មានភ្លើងចេញទៅនៅចំពោះទ្រង់
ឆេះបំផ្លាញពួកដែលតតាំងនឹងទ្រង់នៅជុំវិញ
៤ ផ្លេកបន្ទោររបស់ទ្រង់ក៏បំភ្លឺលោកីយ៍
ផែនដីបានឃើញ ហើយញាប់ញ័រ
៥ អស់ទាំងភ្នំបានរលាយទៅ ដូចជាក្រមួន
នៅចំពោះព្រះយេហូវ៉ា
គឺនៅចំពោះព្រះអម្ចាស់នៃផែនដីទាំងមូល
៦ ផ្ទៃមេឃប្រកាសប្រាប់ពីសេចក្តីសុចរិតរបស់ទ្រង់
ហើយគ្រប់ទាំងសាសន៍បានឃើញសិរីល្អនៃទ្រង់
៧ សូមឲ្យអស់អ្នកដែលគោរពប្រតិបត្តិដល់រូបឆ្លាក់
មានសេចក្តីខ្មាស
គឺជាពួកអ្នកដែលអួតពីរូបព្រះទាំងប៉ុន្មាន
នែ ព្រះទាំងឡាយ ចូរថ្វាយបង្គំដល់ទ្រង់ចុះ
៨ ឱព្រះយេហូវ៉ាអើយ ក្រុងស៊ីយ៉ូនបានឮ ហើយក៏មានសេចក្តីអំណរ
ពួកកូនស្រីនៃសាសន៍យូដាបានរីករាយឡើង
ដោយព្រោះបញ្ញត្តទាំងប៉ុន្មានរបស់ទ្រង់
៩ ដ្បិត ឱព្រះយេហូវ៉ាអើយ ទ្រង់ជាព្រះខ្ពស់បំផុត
នៅលើផែនដីទាំងមូល
ទ្រង់ថ្កើងឡើងយ៉ាងវិសេសជាងអស់ទាំងព្រះ
១០ ឱពួកអ្នកដែលស្រឡាញ់ព្រះយេហូវ៉ាអើយ
ចូរស្អប់ការអាក្រក់ចុះ
ទ្រង់ទំនុកបំរុងព្រលឹងនៃពួកអ្នកបរិសុទ្ធរបស់ទ្រង់
ក៏ជួយគេឲ្យរួចពីកណ្តាប់ដៃនៃពួកមនុស្សអាក្រក់
១១ មានពន្លឺបានសាបព្រោះទៅ សំរាប់មនុស្សសុចរិត
និងសេចក្តីអំណរ សំរាប់មនុស្សដែលមានចិត្តទៀងត្រង់
១២ ឱមនុស្សសុចរិតអើយ ចូរមានសេចក្តីរីករាយ
ក្នុងព្រះយេហូវ៉ា
ហើយអរព្រះគុណ ឲ្យជាទីរឭកដល់សេចក្តីបរិសុទ្ធ
របស់ទ្រង់ចុះ។