១១៤
ពេលជនជាតិអ៊ីស្រាអែលចាកចេញពីស្រុកអេស៊ីព្ទ
១ កាលសាសន៍អ៊ីស្រាអែល
បានចេញពីស្រុកអេស៊ីព្ទ
គឺកាលពូជពង្សនៃយ៉ាកុប បានចេញពីសាសន៍
ដែលមានភាសាទីទៃ
២ នោះពួកយូដាបានត្រឡប់ជាទីបរិសុទ្ធរបស់ទ្រង់
ហើយពួកអ៊ីស្រាអែលបានធ្វើជាអាណាខេត្តរបស់ទ្រង់
៣ សមុទ្របានឃើញ ហើយក៏រត់បាត់ទៅ
ទន្លេយ័រដាន់ក៏ហូរថយច្រាសវិញ
៤ អស់ទាំងភ្នំធំៗ ក៏លោតដូចជាចៀមឈ្មោល
ហើយភ្នំតូចៗ ដូចជាកូនចៀម
៥ ឱសមុទ្រអើយ តើវាថ្វី បានជារត់ទៅដូច្នេះ
ហើយទន្លេយ័រដាន់ឯងដែរ បានជាហូរថយច្រាសទៅ
៦ នឹងអស់ទាំងភ្នំធំៗអើយ
បានជាលោតដូចជាចៀមឈ្មោល
ហើយឯងដែរ ភ្នំតូចៗអើយ បានជាលោត
ដូចជាកូនចៀមដូច្នេះ
៧ ឱផែនដីអើយ ចូរញ័ររន្ធត់នៅចំពោះព្រះអម្ចាស់
គឺនៅចំពោះព្រះនៃយ៉ាកុបចុះ
៨ ជាព្រះដែលធ្វើឲ្យថ្មដាប្រែទៅជាត្រពាំងទឹក
គឺថ្មរឹងឲ្យទៅជាក្បាលទឹកហូរ។