១៥០
ចូរឲ្យអ្វីៗទាំងអស់ដែលមានដង្ហើមចេញចូលសរសើរដំកើងព្រះ!
១ ចូរសរសើរដល់ព្រះយេហូវ៉ា
ចូរសរសើរដល់ព្រះ នៅក្នុងទីបរិសុទ្ធ
របស់ទ្រង់
ចូរសរសើរដល់ទ្រង់ នៅចន្លោះអាកាស
ជាទីសំដែងព្រះចេស្តាទ្រង់
២ ចូរសរសើរដល់ទ្រង់ ដោយព្រោះការឥទ្ធិឫទ្ធិរបស់ទ្រង់
ចូរសរសើរដល់ទ្រង់ ឲ្យសមនឹងសណ្ឋានដ៏ធំប្រសើរ
របស់ទ្រង់
៣ ចូរសរសើរទ្រង់ដោយសូរត្រែ
ចូរសរសើរដល់ទ្រង់ដោយដេញពិណ
និងចាប់ស៊ុង
៤ ចូរសរសើរដល់ទ្រង់ដោយវាយក្រាប់
ហើយលោតកញ្ឆេង
ចូរសរសើរទ្រង់ដោយប្រដាប់មានខ្សែ ហើយនឹងខ្លុយ
៥ ចូរសរសើរដល់ទ្រង់ដោយវាយឈឹងឲ្យឮរងំ
ចូរសរសើរទ្រង់ដោយវាយឈឹងឮសូររំពង
៦ គួរឲ្យជីវិតទាំងឡាយដែលមានដង្ហើម
បានសរសើរដល់ព្រះយេហូវ៉ា
ចូរសរសើរដល់ព្រះយេហូវ៉ាចុះ។:៚