២២
ទំនុកតម្កើងរបស់ព្រះបាទដាវីឌ
(ទំនុកតម្កើង ១៨)
១ ក្រោយពេលព្រះអម្ចាស់រំដោះព្រះបាទដាវីឌ អោយរួចផុតពីកណ្ដាប់ដៃរបស់ខ្មាំងសត្រូវទាំងប៉ុន្មាន និងរួចផុតពីកណ្ដាប់ដៃរបស់ព្រះបាទសូលហើយ ព្រះបាទដាវីឌស្មូត្រទំនុកតម្កើងថ្វាយព្រះអម្ចាស់ដូចតទៅ៖
២ «ព្រះអម្ចាស់ជាថ្មដាការពារខ្ញុំ
ជាបន្ទាយដ៏រឹងមាំរបស់ខ្ញុំ
ជាព្រះដែលរំដោះខ្ញុំ។
៣ ព្រះជាម្ចាស់ជាថ្មដាសំរាប់អោយខ្ញុំពឹងជ្រក
ព្រះអង្គជាខែល ជាកម្លាំងដែលសង្គ្រោះខ្ញុំ
និងជាជំរកដ៏រឹងមាំរបស់ខ្ញុំ។
ព្រះអង្គសង្គ្រោះខ្ញុំអោយរួចពីជនឃោរឃៅ។
៤ ពេលខ្ញុំស្រែករកព្រះអង្គ ព្រះអង្គសង្គ្រោះខ្ញុំ
អោយរួចពីខ្មាំងសត្រូវរបស់ខ្ញុំ
សូមលើកតម្កើងព្រះអម្ចាស់!
៥ សេចក្ដីស្លាប់រួបរឹតខ្ញុំ
រីឯសេចក្ដីវិនាសអន្តរាយធ្លាក់មកលើខ្ញុំ
ដូចទឹកហូរមកយ៉ាងខ្លាំង។
៦ សេចក្ដីស្លាប់នៅព័ទ្ធជុំវិញខ្ញុំ ប្រៀបបីដូចជា
សំណាញ់ដែលគេបោះមកលើខ្ញុំ។
៧ នៅពេលមានទុក្ខវេទនា ខ្ញុំអង្វររកព្រះអម្ចាស់
ខ្ញុំស្រែកហៅរកព្រះរបស់ខ្ញុំ
ព្រះអង្គទ្រង់ព្រះសណ្ដាប់ឮសំឡេងខ្ញុំ
ពីក្នុងព្រះវិហាររបស់ព្រះអង្គ
ហើយស្នូរសំរែករបស់ខ្ញុំបានឮទៅដល់
ព្រះកាណ៌របស់ព្រះអង្គ។
៨ នៅពេលព្រះអង្គទ្រង់ព្រះពិរោធ
ផែនដីកក្រើកញាប់ញ័រ
ផ្ទៃមេឃរង្គើរហូតដល់គ្រឹះរបស់វា។
៩ មានផ្សែងហុយចេញមកពីព្រះនាសា
របស់ព្រះអង្គ
ព្រះអង្គផ្លុំភ្លើងដែលឆាបឆេះចេញមក
ហើយក៏មានរងើកភ្លើងខ្ទាតចេញមកពី
ព្រះឱស្ឋរបស់ព្រះអង្គដែរ។
១០ ព្រះអង្គផ្អៀងផ្ទៃមេឃ ទ្រង់យាងចុះមក
ដោយមានពពកយ៉ាងក្រាស់នៅពីក្រោម
ព្រះបាទាផង។
១១ ព្រះអង្គយាងគង់លើចេរូប៊ីន* ហើយហោះមក
ព្រះអង្គយាងចេញមក ដោយគង់នៅលើ
វាយោដូចគង់នៅលើស្លាបបក្សី។
១២ ព្រះអង្គយកភាពងងឹតធ្វើជាកន្លែងពួន
ហើយយកពពកខ្មៅក្រាស់ពេញដោយទឹក
ធ្វើជាព្រះពន្លា។
១៣ មានផ្លេកបន្ទោរភ្លឺនៅខាងមុខព្រះអង្គ
ហើយមានរងើកភ្លើងធ្លាក់ចុះមក។
១៤ ព្រះអម្ចាស់ធ្វើអោយផ្គរលាន់នៅលើមេឃ
ព្រះដ៏ខ្ពង់ខ្ពស់បំផុតបន្លឺព្រះសូរសៀងមកពីលើ។
១៥ ព្រះអង្គបាញ់ព្រួញទៅលើខ្មាំងសត្រូវ
ដើម្បីកំចាត់កំចាយពួកគេ។
ព្រះអង្គបាញ់ផ្លេកបន្ទោរ
ធ្វើអោយពួកគេបាក់ទ័ព។
១៦ ដោយសារព្រះបន្ទូលគំរាមរបស់ព្រះអម្ចាស់
និងដោយសារខ្យល់ព្យុះដែលបក់ចេញមកពី
ព្រះនាសារបស់ព្រះអង្គ
បាតសមុទ្រលេចចេញមក
ហើយគ្រឹះរបស់ផែនដីក៏លេចមកដែរ។
១៧ ព្រះអង្គបានលាតព្រះហស្ដពីស្ថានលើមករកខ្ញុំ
ព្រះអង្គស្រង់ខ្ញុំចេញអោយផុតពីទឹកសមុទ្រ
១៨ ព្រះអង្គបានរំដោះខ្ញុំអោយរួចផុតពីខ្មាំងសត្រូវ
ដ៏ខ្លាំងពូកែ
និងអោយខ្ញុំរួចផុតពីអស់អ្នកដែលស្អប់ខ្ញុំ
ហើយមានកម្លាំងខ្លាំងជាងខ្ញុំផង។
១៩ នៅពេលខ្ញុំមានទុក្ខវេទនា
អ្នកទាំងនោះនាំគ្នាមកវាយប្រហារខ្ញុំ
ក៏ប៉ុន្តែ ព្រះអម្ចាស់ធ្វើជាបង្អែកដល់ខ្ញុំ។
២០ ព្រះអង្គបាននាំខ្ញុំចេញអោយផុតពីគ្រោះថ្នាក់
ព្រះអង្គរំដោះខ្ញុំ មកពីព្រះអង្គស្រឡាញ់ខ្ញុំ។
២១ ព្រះអម្ចាស់បានប្រព្រឹត្តចំពោះខ្ញុំ
ស្របតាមសេចក្ដីសុចរិតរបស់ខ្ញុំ
ព្រះអង្គតបស្នងមកខ្ញុំវិញ
ស្របតាមអំពើបរិសុទ្ធដែលខ្ញុំបានប្រព្រឹត្តដែរ
២២ ដ្បិតខ្ញុំបានប្រតិបត្តិតាមមាគ៌ារបស់ព្រះអម្ចាស់
ហើយខ្ញុំមិនបានឃ្លាតចេញពីព្រះរបស់ខ្ញុំ
ដោយប្រព្រឹត្តអំពើអាក្រក់នោះឡើយ។
២៣ ខ្ញុំបានប្រព្រឹត្តតាមវិន័យទាំងប៉ុន្មាន
របស់ព្រះអង្គ
ខ្ញុំមិនបានបំពានលើច្បាប់របស់ព្រះអង្គទេ។
២៤ ព្រះអង្គជ្រាបថាខ្ញុំគ្មានសៅហ្មង
ហើយខ្ញុំបានប្រុងប្រយ័ត្នខ្លួន
មិនអោយមានកំហុសឡើយ។
២៥ ហេតុនេះ ព្រះអម្ចាស់ប្រោសប្រណីដល់ខ្ញុំ
ស្របតាមអំពើសុចរិតដែលខ្ញុំបានប្រព្រឹត្ត
ព្រោះព្រះអង្គឈ្វេងយល់ថាខ្ញុំប្រព្រឹត្តអំពើបរិសុទ្ធ។
២៦ ព្រះអម្ចាស់អើយ ព្រះអង្គសំដែងព្រះហឫទ័យ
ស្មោះត្រង់ចំពោះអ្នកដែលមានចិត្តស្មោះត្រង់
ព្រះអង្គសំដែងព្រះហឫទ័យស្មោះសរ
ចំពោះអ្នកដែលមានចិត្តស្មោះសរ។
២៧ ចំពោះអ្នកដែលមានចិត្តបរិសុទ្ធ
ព្រះអង្គក៏សំដែងថា ព្រះអង្គបរិសុទ្ធដែរ
ចំពោះអ្នកដែលមានចិត្តវៀចវេរវិញ
ព្រះអង្គសំដែងថាព្រះអង្គឈ្លាសវៃ។
២៨ ព្រះអង្គសង្គ្រោះមនុស្សទន់ទាប
ព្រះអង្គទតមកអស់អ្នកដែលមានចិត្តឆ្មើងឆ្មៃ
ដើម្បីបន្ទាបពួកគេ។
២៩ ឱព្រះអម្ចាស់អើយ ព្រះអង្គជាពន្លឺរបស់ទូលបង្គំ
ហើយព្រះអង្គក៏បំភ្លឺភាពងងឹតរបស់
ទូលបង្គំដែរ។
៣០ ព្រះអង្គប្រទានកម្លាំងអោយទូលបង្គំវាយលុក
ខ្មាំងសត្រូវ និងអោយទូលបង្គំអាចលោតរំលង
កំពែងក្រុងរបស់ពួកគេ។
៣១ មាគ៌ារបស់ព្រះជាម្ចាស់សុទ្ធតែល្អឥតខ្ចោះ
ព្រះបន្ទូលសន្យារបស់ព្រះអម្ចាស់ពិតទាំងស្រុង
ព្រះអង្គជាខែលការពារអស់អ្នកដែលមក
ជ្រកកោននឹងព្រះអង្គ។
៣២ មានតែព្រះអម្ចាស់មួយទេដែលពិត
ជាព្រះជាម្ចាស់
មានតែព្រះរបស់យើងមួយព្រះអង្គប៉ុណ្ណោះ
ដែលពិតជាថ្មដាអោយយើងជ្រកកោន។
៣៣ ព្រះជាម្ចាស់ជាបន្ទាយដ៏រឹងមាំរបស់ខ្ញុំ
ព្រះអង្គរៀបចំមាគ៌ារបស់ខ្ញុំអោយបាន
ល្អឥតខ្ចោះ។
៣៤ ព្រះអង្គប្រោសប្រទានអោយខ្ញុំរត់លឿន
ដូចសត្វក្ដាន់
ហើយអោយខ្ញុំអាចឈរនៅទីខ្ពស់។
៣៥ ព្រះអង្គបង្ហាត់ខ្ញុំអោយស្ទាត់ជំនាញខាងធ្វើសឹក
និងអោយខ្ញុំមានកម្លាំងយឹតធ្នូលង្ហិនបាន។
៣៦ ព្រះអង្គការពារ និងសង្គ្រោះទូលបង្គំ
ព្រះអង្គគាំទ្រទូលបង្គំ
ហើយព្រះអង្គលើកទូលបង្គំឡើង
ដោយព្រះហឫទ័យមេត្តា។
៣៧ ព្រះអង្គការពារទូលបង្គំមិនអោយខ្មាំងសត្រូវ
ដេញទាន់
មិនអោយទូលបង្គំភ្លាត់ជើងដួលឡើយ។
៣៨ ទូលបង្គំដេញតាមពួកខ្មាំងសត្រូវ
និងបំផ្លាញពួកគេ
ហើយទូលបង្គំមិនត្រឡប់មកវិញទេ
ដរាបទាល់តែបានកំទេចពួកគេអស់។
៣៩ ទូលបង្គំកំទេច និងកាប់សម្លាប់ពួកគេ
មិនអោយពួកគេក្រោកឡើងវិញបានឡើយ
ពួកគេដួលស្លាប់នៅនឹងជើងរបស់ទូលបង្គំ។
៤០ ព្រះអង្គប្រទានអោយទូលបង្គំមានកម្លាំង
ធ្វើសឹក និងបង្ក្រាបខ្មាំងសត្រូវ។
៤១ ព្រះអង្គបានធ្វើអោយពួកគេបាក់ទ័ពរត់
នៅមុខទូលបង្គំ
ហើយទូលបង្គំបានធ្វើអោយអស់អ្នកដែល
ស្អប់ទូលបង្គំវិនាសសូន្យអស់ទៅ។
៤២ ពួកគេនាំគ្នាសម្លឹងរកមើលជំនួយ
តែគ្មាននរណាជួយពួកគេឡើយ
គេស្រែកហៅព្រះអម្ចាស់
តែព្រះអង្គមិនឆ្លើយតបនឹងពួកគេទេ។
៤៣ ទូលបង្គំកំទេចពួកគេអោយម៉ដ្ដ ដូចធូលីដី
ទូលបង្គំជាន់ឈ្លីពួកគេដូចភក់ជ្រាំនៅតាមផ្លូវ។
៤៤ ព្រះអង្គបានរំដោះអោយទូលបង្គំរួចពី
ការបះបោររបស់ប្រជាជន
ហើយទុកអោយទូលបង្គំធ្វើជាមេដឹកនាំ
លើប្រជាជាតិនានា
ប្រជាជនមួយដែលទូលបង្គំមិនធ្លាប់ស្គាល់
បានមកចុះចូលនឹងទូលបង្គំ។
៤៥ ជនបរទេសនាំគ្នាស្ដាប់បង្គាប់ទូលបង្គំ
ហើយពេលទូលបង្គំនិយាយតែមួយម៉ាត់
គេក៏ធ្វើតាមភ្លាម។
៤៦ ជនបរទេសបាក់ទឹកចិត្ត
ហើយចេញពីទីជំរករបស់គេមក
ទាំងភ័យញាប់ញ័រ។
៤៧ ជយោព្រះអម្ចាស់! សូមសរសើរតម្កើងព្រះអង្គ
ដែលជាថ្មដារបស់ទូលបង្គំ!
សូមលើកតម្កើងព្រះជាម្ចាស់ ជាថ្មដា
ដែលបានសង្គ្រោះទូលបង្គំ!
៤៨ ដ្បិតព្រះអង្គបានអោយទូលបង្គំមានជ័យជំនះ
លើខ្មាំងសត្រូវ
ព្រះអង្គបានបន្ទាបប្រជាជននានា
អោយមកនៅក្រោមអំណាចទូលបង្គំ
៤៩ ហើយព្រះអង្គបានដកខ្ញុំអោយរួចផុតពី
កណ្ដាប់ដៃរបស់ខ្មាំងសត្រូវ!
ព្រះអង្គបានលើកទូលបង្គំឡើងខ្ពស់ជាង
បច្ចាមិត្តរបស់ទូលបង្គំ
និងរំដោះទូលបង្គំអោយរួចផុតពីមនុស្ស
ឃោរឃៅ។
៥០ ហេតុនេះហើយបានជាទូលបង្គំសរសើរតម្កើង
ព្រះអង្គក្នុងចំណោមប្រជាជាតិនានា
ឱព្រះអម្ចាស់អើយ! ទូលបង្គំនឹងច្រៀង
លើកតម្កើងព្រះនាមរបស់ព្រះអង្គ។
៥១ ព្រះអង្គប្រទានការសង្គ្រោះដ៏ធំធេង
ដល់ស្ដេចដែលព្រះអង្គបានតែងតាំង។
ព្រះអង្គសំដែងព្រះហឫទ័យស្មោះត្រង់ចំពោះ
ស្ដេចដែលព្រះអង្គបានចាក់ប្រេងអភិសេក
គឺចំពោះស្ដេចដាវីឌ និងពូជពង្ស
រៀងរហូតតទៅ»។