១០០
ចូរគោរពបំរើព្រះអម្ចាស់ដោយចិត្តរីករាយ
ទំនុកតម្កើងសំរាប់ពិធីថ្វាយតង្វាយអរព្រះគុណ។
១ មនុស្សនៅលើផែនដី
ទាំងមូលអើយ
ចូរបន្លឺសំឡេងតម្កើងព្រះអម្ចាស់!
២ ចូរគោរពបំរើព្រះអម្ចាស់ដោយចិត្តរីករាយ
ចូរនាំគ្នាចូលមកជិតព្រះអង្គ
ដោយច្រៀងយ៉ាងសប្បាយ!
៣ ចូរដឹងថា ព្រះអម្ចាស់ពិតជាព្រះជាម្ចាស់មែន!
ព្រះអង្គបានបង្កើតយើងមក
យើងជាប្រជារាស្ត្ររបស់ព្រះអង្គ
ហើយជាប្រជាជនដែលព្រះអង្គថែរក្សា។
៤ ចូរនាំគ្នាចូលតាមទ្វារព្រះដំណាក់របស់ព្រះអង្គ
ដោយអរព្រះគុណ
ចូរនាំគ្នាចូលមកក្នុងព្រះវិហារ
ដោយពាក្យសរសើរតម្កើង!
ចូរលើកតម្កើងព្រះអង្គ
ចូរសរសើរតម្កើងព្រះនាមព្រះអង្គ!
៥ ដ្បិតព្រះអម្ចាស់មានព្រះហឫទ័យសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេរជានិច្ច
ហើយព្រះហឫទ័យស្មោះស្ម័គ្ររបស់ព្រះអង្គ
នៅស្ថិតស្ថេរអស់កល្បជាអង្វែងតរៀងទៅ។