១១១
ស្នាព្រះហស្ដដ៏អស្ចារ្យរបស់ព្រះអម្ចាស់
១ ចូរសរសើរតម្កើងព្រះអម្ចាស់!
ខ្ញុំនឹងលើកតម្កើងព្រះអម្ចាស់
យ៉ាងអស់ពីចិត្ត
នៅក្នុងអង្គប្រជុំរបស់មនុស្សទៀងត្រង់។
២ ព្រះអម្ចាស់បានធ្វើការអស្ចារ្យយ៉ាងឧត្ដុង្គឧត្ដម
ហើយអស់អ្នកដែលពេញចិត្តនឹងស្នាព្រះហស្ដនេះ
នាំគ្នាស្វែងយល់។
៣ ស្នាព្រះហស្ដរបស់ព្រះអង្គប្រកបទៅដោយ
រស្មីភ្លឺចិញ្ចែងចិញ្ចាច
សេចក្ដីសុចរិតរបស់ព្រះអង្គ
នៅស្ថិតស្ថេររហូតតទៅ។
៤ ព្រះអង្គសព្វព្រះហឫទ័យអោយយើង
នឹកដល់ស្នាព្រះហស្ដដ៏អស្ចារ្យរបស់ព្រះអង្គ
ព្រះអម្ចាស់តែងតែប្រណីសន្ដោស
ហើយប្រកបដោយព្រះហឫទ័យអាណិតអាសូរ។
៥ ព្រះអង្គប្រទានអាហារអោយអស់អ្នក
ដែលគោរពកោតខ្លាចព្រះអង្គ
ព្រះអង្គតែងនឹកដល់សម្ពន្ធមេត្រី
របស់ព្រះអង្គជានិច្ច។
៦ ព្រះអង្គសំដែងឫទ្ធានុភាព
អោយប្រជារាស្ត្ររបស់ព្រះអង្គឃើញ
តាមរយៈស្នាព្រះហស្ដរបស់ព្រះអង្គ
គឺប្រគល់ទឹកដីរបស់ប្រជាជាតិនានា
អោយពួកគេ។
៧ ស្នាព្រះហស្ដដែលព្រះអង្គធ្វើ សុទ្ធតែពិត
និងប្រាកដប្រជា
ព្រះឱវាទរបស់ព្រះអង្គ
គួរអោយជឿទុកចិត្តទាំងស្រុង។
៨ ព្រះបញ្ជាទាំងនោះនៅស្ថិតស្ថេររហូត
ព្រោះព្រះអង្គមានព្រះបន្ទូល
ដោយសេចក្ដីពិត និងត្រឹមត្រូវ។
៩ ព្រះអង្គបានរំដោះប្រជារាស្ត្ររបស់ព្រះអង្គ
អោយមានសេរីភាព
ព្រះអង្គបានចងសម្ពន្ធមេត្រីជាមួយ
ប្រជារាស្ត្ររបស់ព្រះអង្គរហូតតទៅ
ព្រះនាមរបស់ព្រះអង្គជាព្រះនាមដ៏វិសុទ្ធ
គួរអោយកោតស្ញប់ស្ញែង។
១០ ការគោរពកោតខ្លាចព្រះអម្ចាស់
ជាប្រភពនៃប្រាជ្ញា
អស់អ្នកដែលប្រតិបត្តិតាមប្រាជ្ញានេះ
តែងតែដឹងខុសត្រូវ។
សូមសរសើរតម្កើងព្រះអង្គរហូតតទៅ!