Uţup wi bapiiŧuŋ
Bahebërë
Uţup ujuni
Ulibra wi uwo kakaarta ki bapiiŧuŋ bayuday bankakuŋ afiyaar Kriŧtu. Ñaaŋ ampiiŧuŋ ka aammeeţanaa, kë uko wi başaaŋ ame bnuura uwo kë ampiiŧuŋ ka ame bnuura Ŋlibra ŋi Naşibaţi, ţiki ţi ŋul ŋi ŋi ajaaŋ atenna kadiimanaan baka manjoonan. Babi hajan ţfa maakan banfiyaaruŋ Kriŧtu baŧeek kë badoo ji bamena. Uko mënţ ukaaŋ kë ñaaŋ ampiiŧuŋ hënk apiiŧ baka kaji na baka bamëban baliinŧ, bawut kapën ţi pfiyaar pi bafiyaaruŋ. Du unjon, Naşibaţi abi do bhoŋar na bayuday. Abi ji na baka woli ñaaŋ ajubani, bafiŋ ulimariya kaţeŋan, Naşibaţi kaşë miir ñaaŋ mënţ pjuban pi nul. Kakaarta ki kaţup kë bhoŋar bhalu bi Naşibaţi adoluŋ na bañaaŋ banfiyaaruŋ Abukul bapel bŧeek. Uko wi Yeŧu Kriŧtu adoluŋ pa bañaaŋ bajën upel wi ŋwanjuŧ na Moyiŧ na Aaron na Yoŧuwa badoluŋ. Yeŧu awooŋ unkaneel umpoţi wi Naşibaţi unţeŋanuŋ kapënanaan ipekadu yi bañaaŋ bŧi. Ñaaŋ ambuuruŋ afiyaara aankak anuma pfiŋ ulimariya pa pekadu di nul. Naşibaţi amiira pekadu di nul.
Hënk di ifah yi ulibra wi iwooŋ:
1. Abuk Naşibaţi awo ñaaŋ naweek (1.1-3)
2. Yeŧu adëm apel ŋwanjuŧ (1.4–2.18)
3. Yeŧu adëm apel Moyiŧ na Yoŧuwa (3.1–4.13)
4. Yeŧu awooŋ naţeŋan naweek (4.14–7.28)
5. Yeŧu abi na bhoŋar bampeluŋ bŧeek (8.1–9.22)
6. Bţeŋan bi Yeŧu bawo bloolan akuţ awo bbaañşaani (9.23–10.31)
7. Baloŋ ţi banfiyaaruŋ biki ţfa (11.1-40)
8. Nawulën ŋwo ji Yeŧu (12.1–13.17)
9. Pñehan Naşibaţi (13.18-19)
10. Pwul mboş (13.20-25)
1
Uko wi Naşibaţi aţëpnuŋ ţi abukul aţup
1 Naşibaţi aţëpna ţfa ţi *baţuparul ŋyaaş ŋŧum ado kë bado iko iŧum aţiiniyaan na bateem nja. 2 Kë ţi ŋwal ŋbaañşaani ŋi ŋwooŋ ŋi aşë ţëpna ţi Abukul aţiini na nja. Abukul mënţ i i adatuŋ ado kë aka iko bŧi, ţi ul i i aţëpnuŋ kak apaş baţi na mboş. 3 Abukul awooŋ bjeehi banjaaŋ badiiman mndëm mi nul, ul ajaaŋ adiiman uko wi awooŋ na manjoonan. Ul amëbanuŋ iko bŧi yi apaşuŋ na uţup wi nul unwooŋ na mnhina. Ajinţan bañaaŋ ţi ipekadu yi baka aşë ya aţo du kañen kadeenu ki Naşibaţi du baţi.
Mndëm mi abuk Naşibaţi mampeluŋ mi ŋwanjuŧ
4 Mndëm mi Abuk Naşibaţi mampel maakan mi ŋwanjuŧ, kë hënk di Naşibaţi awululuŋ katim kampeluŋ ki ŋa. 5 Na manjoonan, Naşibaţi aambaaŋ kajakaara na uwanjuŧ uloŋ:
« Iwi iwooŋ Abuk naan,
nţa di dţup aji dwo şaaş? »✡ Kañaam 2.7.
Kë aambaaŋ kaţiini ţi uko wi uloŋ ţi ŋa kaji :
« Nji dwo Aşin, ul aşë wo Abuk naan.✡ 2 Ŧamiyel 7.14. »
6 Ţi wal wi Naşibaţi abiiŋ awo i pyil ţi umundu Abukul, anwooŋ bajeen, aji :
« Ŋwanjuŧ bŧi ŋawo kadëmana. »✡ Pleşan 32.43.
7 Kë ţi uko wi ŋwanjuŧ, upiiŧana ţi *Ulibra wi Naşibaţi aji :
« Naşibaţi ado ŋwanjuŧ ŋi nul kë ŋawo ji uyook
ado ŋa kë ŋawo ji bdoo banklañşiiŋ. »
8 Kë Naşibaţi aşë ţiini na Abukul aji :
« Iwi Naşibaţi, pşihu pawo pi mnţo,
pşih pi nu pawo pŧool.
9 Iŋal uko unwooŋ uŧool apok buţaan,
ukaaŋ kë nji Naşibaţi i nu ndatu
awulu mnlilan mampeluŋ mi banwooŋ na iwi bŧi. »✡ Kañaam 45.7-8.
10 Akak aţiini aji :
« Iwi Ajugun, ipaşuŋ mboş du ujuni
aboman baţi na iñen yi nu.
11 Iko mënţ iluŋ kaba,
iluŋ kamën ji imişa.
Kë iwi işë duka.
12 Iluŋ kaŋuj ya ji imişa,
iluŋ kawohëş ya ji imişa,
kë iwi işë duka jibi iwooŋ,
ŋnuur ŋi nu ŋaankba. »✡ Kañaam 102.26-28.
13 Naşibaţi aambaaŋ kajakaara na uwanjuŧ wi nul uloŋ:
« Biin iţo ţi kañen naan kadeenu
te wal wi nji kaţuuŋ başooradu ţi ihoţu uţeeh. »✡ Kañaam 110.1.
14 Ŋwanjuŧ bŧi ŋawo wo ŋhaaş ŋanklemparuŋ Naşibaţi. Ayil yil ŋa ŋabi pţënk banwooŋ i kabuur te mnţo.