Uţup wi Pawulu apiiŧuŋ
Filemoŋ
Uţup ujuni
Ulibra wi uwo kakaarta ki Pawulu apiiŧuŋ Filemoŋ nanohul. Ñiinţ mënţ awo i ubeeka wi Koloŧ, awo ñaaŋ ammeeţaniiŋ du ubeeka mënţ. Abi ŧiink kë Pawulu akţup Uţup Ulil Unuura kë abi fiyaar fiyaar ţi dko mënţ akak aţaş bgah bi Kriŧtu. Abi ka ţi bajuuk ţi ulemp biki nul ñiinţ aloŋ i katim kawooŋ Oneŧim ambiiŋ aţi abuur. Wi ayaaŋ aya ayit na Pawulu du dko di awooŋ du ukalabuş, kë aţupa Uţup Ulil Unuura unjaaŋ uţiiniyaan uko wi Yeŧu Kriŧtu. Wi wi aşaaŋ afiyaar Kriŧtu. Pawulu apiiŧ Filemoŋ kaji na a amiir Oneŧim. Kë Oneŧim ţi uleeful añooţuŋ kakaarta ki Pawulu apiiŧuŋ. Ţi bgah bi wal mënţ, Filemoŋ ahina lah kado Oneŧim uko wi aŋaluŋ këme kafiŋa. Pawulu akooţa ţi kakaarta ki aji na a awut kajej Oneŧim ji najuuk ţi ulemp ambiiŋ abuur. Ajaka ayeenka bnuura ţiki hënkuŋ awo ţi ploolan na Kriŧtu.
Hënk di ifah yi ulibra wi iwooŋ:
1. Pwul mboş (1-3)
2. Pawulu abeeb Naşibaţi ţi uko wi Filemoŋ (4-7)
3. Pawulu akooţ Filemoŋ ţi uko wi Oneŧim abuuruŋ (8-22)
4. Pwul mboş pbaañşaani (23-25)
1
Nji Pawulu i ulemp wi Yeŧu *Kriŧtu uţuuŋ kë nwo ukalabuş, na Timote ayiţ nja ŋkpiiŧiiŋ, iwi Filemoŋ i ŋmaganuŋ injaaŋ klemp ulemp uŧënţ wi nun. Ŋpiiŧ kak Apifiya ñaaţ ayiţ nja na Arkip anjaaŋ agutan na nja, na banfiyaaruŋ Yeŧu Kriŧtu bŧi aji bayitiir du katohu. Dñehan Naşibaţi Aşin nja na Yeŧu Kriŧtu Ajugun bawulan bnuura babot bajoobţënan ŋhaaş.
Ŋyaaş bŧi ŋi njaaŋ kañehan dji kaleşu kaşë beeb Naşibaţi i njaaŋ kadëman ţi uko wi nu. Dŧiink kë bakţiiniyaan jibi ifiyaaruŋ Ajugun Yeŧu na jibi iŋaluŋ banwooŋ biki nul bŧi. Dñehan Naşibaţi ado pfiyaar pi iţokuŋ na nja pado kalemp, ihilna ime iko inuura bŧi yi ŋkaaŋ ţi ubida na *Kriŧtu. Iwi ayiţ naan uŋal wi nu udo kë nlilan maakan, kë uhaaş naan ubot aţoora, wi ijaaŋ ktëŋţën banwooŋ biki Naşibaţi.
*Kriŧtu aţenën kë nhil pţu'u pdo uko wi nji kahepariiŋ. Kë nji Pawulu naţaf i ulemp wi Kriŧtu uţuuŋ kë nwo hënkuŋ nakalabuş kë nşë ñehanu ñehan uko wi ţi uŋal wi ŋkaaŋ pa Kriŧtu. 10 Dñehanu uko mënţ pa ankakuŋ abuk naan ţi Kriŧtu wi nwooŋ ukalabuş, Oneŧim* Oneŧim : Dawooŋ annumaniiŋ, ankaaŋ udooni. i nji kaţiiniyaanuŋ hënk. 11 Aambi kaaru udooni, kë hënkuŋ aşë kaarun udooni maakan nja batëb bŧi.
12 Dkakanu a, kë uşë wo wo ji uhaaş wi naan wi nji kawuliiŋ. 13 Ddoo ŋal lah kaduka na a, awooru ţi ado kaţënkën, wi *Uţup Ulil Unuura uţuuŋ kë nwo ukalabuş. 14 Kë nşë ŋal kayoonk idinanaan uko mënţ, uko unuura wuŋ uwutna kawo ji dkitu kit iñen. Dŋal upënna ţi uhaaş wi nu. 15 Ulome nawayşër na Oneŧim ŋwal ŋntiinku, aşë bi ahil akak du iwi naţo te mnţo. 16 Aankkak du iwi ji ñaaŋ i bajaaŋ bajuuknţën ţi ulemp ţañ, apel hënkuŋ ñaaŋ i bajaaŋ bajuuknţën ţi ulemp, awo hënkuŋ ayiţ nja i ŋmaganuŋ. Dmagana maakan na manjoonan, kë iwi, iwo kamagana kapelën, ţiki awo nalemparu abot awo ayiţu ţi Ajugun. 17 Jëm pfiyaar Yeŧu pado kë nwo ayiţu, keeri imëbana ji nji ţi uleef naan. 18 Woli adolu uko uloŋ unde'iiŋ këme aţeeţu uko uloŋ, kţupën, nji kaluŋ kaluku. 19 Nji Pawulu kapiiŧiiŋ na kañen naan, nji kalukiiŋ. Mënŋal pleşanu kë iwi idoo ţeeţën : nji dkaaŋ kë ika ubida ţi Yeŧu *Kriŧtu. 20 Aa, iwi ayiţ naan tenan ţi Ajugun idolën uko wi nñehaniiŋ, tenan kak ţi uŋal wi Kriŧtu iwalanaan uhaaş. 21 Dfiyaar bnuura wi nji kapiiŧiiŋ kë idinan uko wi nhepariiŋ. Ddoo me kë idoo do kapelan uko wi nhepariiŋ.
22 Kaan ido kabomanaan meeţ, dfiyaar kë pñehan pi nakñehanuŋ Naşibaţi paţu bakakanaan hënkuŋ ţi iñeen yi nan.
23 Epafraŧ i ulemp wi Yeŧu *Kriŧtu uţuuŋ kë awo ukalabuş na nji, awulan mboş, 24 ul na bi Markuŧ Ariŧtarkuŧ, Demaŧ na Luk banjaaŋ balemp na nji. 25 Dñehan Ajugun Yeŧu Kriŧtu awulan bnuura bi nul ţi ŋhaaş.

*1:10 Oneŧim : Dawooŋ annumaniiŋ, ankaaŋ udooni.