Uꞌj kye Nimil aj Ebrey
Atzin uꞌj luꞌn tzꞌibꞌin kye jun chꞌuq xjal aj Judiy, a otaq chi nimin tiꞌj Jesús. Me noq tuꞌn tpaj nimku yajbꞌil n-ikyꞌx kyuꞌn tuꞌn tpajjo kynimbꞌil, nchi ximintaq junjun tuꞌn kyaj meltzꞌaj juntl maj tojjo ojtxe kynimbꞌil. Mi bꞌiꞌn quꞌn ankye tzꞌibꞌilte uꞌj lo. Me anteꞌ xjal, a kubꞌ tzꞌibꞌin teꞌ uꞌj luꞌn, nimxix ntzaj tqꞌoꞌn tumil tuꞌn mi chi aj meltzꞌaje.
Ajo xnaqꞌtzbꞌil nimxix toklin tojjo uꞌj lo kyjaluꞌn: A Jesucrist nimxix toklin tibꞌajjo tkyaqil kyoklin txqantl, tzeꞌnku te Moisés, ex jniꞌ angel, ex tkyaqil taqꞌnbꞌin pale ex ikyxjo tiꞌj kꞌulbꞌil, a tzajnin tiꞌj Ojtxe Tuꞌjil Tyol qMan.
Nyolin tojjo uꞌj lo, qa ma tzꞌok Jesús te tnejilxix qpale (2:17). Ex axjo xjal tzꞌibꞌil te uꞌj lo, o tzaj tchikyꞌbꞌin tiꞌjjo kꞌulbꞌil ex chojbꞌil kyilxjal, exsin yol, a o bꞌant te ojtxe, nyaxix tzꞌaqleqe, ex nlay tzꞌel kyilxjal kyuꞌn. Me axte Dios o jaw skꞌoꞌnte jun akꞌaj tnejilxix pale, a Jesucrist, a nya ikyjo tzeꞌnku tumil kyiꞌjjo pale aj Leví, qalaꞌ tzeꞌnku te Melquisedec (cap. 7). Quꞌn a Jesús o tzꞌok te tnejilxix pale te jun majx, quꞌn oꞌkx te Jesús xi qꞌoꞌnte tchwinqil te chojbꞌil il, ex noq tuꞌnjo lo, at jun akꞌaj tumil, tuꞌn kykyijxjal toj wen tukꞌa Dios (3:1—10:39).
Ex atzin kolbꞌil luꞌn tuꞌn qkꞌmonte noq oꞌkx tuꞌn qnimbꞌil, ex ntzaj tchikyꞌbꞌin a qa nimxix toklin kynimbꞌil nimku xjal toj Ojtxe Tuꞌjil (cap. 11). Tuꞌntziꞌn luꞌn, nchi tzaj tkujsin aye nimil jaꞌlin, tuꞌn kyweꞌ wen toj kynimbꞌil ajxi tpon bꞌaj tqꞌijil, exsin tuꞌn tok kyqꞌoꞌn kywutz tiꞌj Jesús, tuꞌn tikyꞌx jniꞌ yajbꞌil kyuꞌn, qa ma tzul kanin kyiꞌj.
1
Yolin qMan Dios noq tuꞌn Tkꞌwal
1 Toj ilaꞌx maj, yolin Dios ojtxe kye qxeꞌchil, ex kyukꞌa ilaꞌ wiq tumil, yolin noq kyuꞌn xjal, ayeꞌ yolil Tyol. 2 Me atzin jaꞌlin, nyolin qMan Dios qe, noq tuꞌn Jesús, a Tkꞌwal; quꞌn tuꞌn a Dios bꞌinchilte tkyaqil twutz txꞌotxꞌ ex tkyaqil twutz kyaꞌj, noq tuꞌn Tkꞌwal.✡Jn. 1:1-3; Col. 1:15-17. Ikytziꞌn tzeꞌnku jun kꞌwal at toklin tiꞌj tkyaqiljo a at te ttata, exsin ikyxjo te Jesús at toklin tiꞌj tkyaqiljo a at te ttata, a qMan Dios. 3 Nyekꞌin Jesús tqoptzꞌajiyil tipin Dios, ikyxjo tzeꞌnku tqan qꞌij nyekꞌin tipin tqoptzꞌajiyil qꞌij; ex ate Jesús, tyekꞌbꞌil qMan Dios, a nya qꞌanchaꞌl. Ex ate Jesús Nukꞌil ex Xqꞌuqil tibꞌaj tkyaqil, noq tuꞌn Tyol nimxix tipin. Tej ttxjet tkyaqil qil tuꞌn, o kubꞌ qe toj kyaꞌj, kawil junx tukꞌa qMan Dios.
Atzin Tkꞌwal Dios nimxixtl toklin tzeꞌn kye angel
4 Tuꞌntzin tkyaqiljo luꞌn, ate Jesús o tzꞌok nimxixtl toklin tzeꞌnku tkyaqil angel, quꞌn tuꞌn kꞌwalbꞌaj te qMan Dios. Qalaqetziꞌn kye angel, at kyoklin, me noq te taqꞌnil. 5 Quꞌn mix jaꞌ xi tqꞌmaꞌn te Dios te jun angel, tzeꞌnku xi tqꞌmaꞌn te Jesús kyjaluꞌn: Ma tzꞌoka te nkꞌwala jaꞌlin.✡Sal. 2:7.
Ex ntiꞌ xi tqꞌmaꞌn te jun angel: Ayiꞌn weꞌ manbꞌaj tey, ex a te kꞌwalbꞌaj wey,✡2Sa. 7:14; 1Cr. 17:13. tzeꞌnku xi tqꞌmaꞌn te Jesús.
6 Ex tej titzꞌje Jesús tzaluꞌn twutz txꞌotxꞌ, tqꞌma Dios kyjaluꞌn: Il tiꞌj tuꞌn kykꞌulin angel twutz.✡Sal. 97:7.
7 Ex toj Tuꞌjil Tyol Dios, chitzin Diosjo kyiꞌj angel kyjaluꞌn:
O chi kubꞌ tbꞌinchin Dios angel, tuꞌn kyok te tsan,
ex tzunxix nchi ajqelin wen tuꞌn kyajbꞌinxix te,
tzeꞌnku qꞌaqꞌ nimxix n-ajbꞌin kyexjal.✡Sal. 104:4.
8 Me mikyxi yoline Diosjo tukꞌa Tkꞌwal, qalaꞌ chitzin kyjaluꞌn toj Tuꞌjil Tyol Dios:
Ay Dios, a tAjaw Tkyaqil, atzin Tkawbꞌila nimxix toklin te jun majx, ex tzꞌaqlexix wen.
9 O tzꞌok tkꞌuꞌjlinjiy a tbꞌanil,
ex o tzꞌel tikyꞌinjiy a nya toj tumil.
Tuꞌntziꞌn ikyjo, o tzꞌok qꞌoꞌn te Kawil tuꞌn qMan Dios, a tDiosa,
ex nimxixtl ntzalaj tiꞌja tzeꞌnku kye angel, ayeꞌ iteꞌ tukꞌiy.✡Sal. 45:6-7.
10 Ex ikyxjo yolin Tyol Dios tiꞌjjo Tkꞌwal kyjaluꞌn:
Ay, tAjaw Tkyaqil, te tnejil o kubꞌ tbꞌinchiꞌn jniꞌ txꞌotxꞌ ex tkyaqil kyaꞌj.
11-12 Me atzin txꞌotxꞌ exqetziꞌn kyaꞌj, ok kchi bꞌajil, ex kchi xel xoyit, ex kchi ttxꞌaqinixil tzeꞌnku jun xbꞌalin.
Qalatziꞌn te, ok ktenbꞌil te, te jun majx.
Ntiꞌ txꞌixpibꞌl tey.✡Sal. 102:25-27.
13 Ex bꞌajxe tqꞌmaye qMan Dios te jun angel kyjaluꞌn:
Qekuy nkꞌatza tuꞌn tkawiꞌn junx wukꞌiy, tzmaxi aj kykanbꞌit tajqꞌoja wuꞌn.✡Sal. 110:1.
14 Qalaqetziꞌn kye angel, xewbꞌajqe; ex nchi ajbꞌin te tsan Dios, ex smaꞌnqe tuꞌn Dios tuꞌn kymojitjo xjal, ayeꞌ kchi kletil tuꞌn.