Tuꞌj Pabl te Filemón
Tej tkuꞌxtaq Pabl toj tze tzma Rom, at jun xjal xi kꞌayin te aqꞌnil te jun majx kyukꞌaxjal, Onésimo tbꞌi, ex o tzꞌok kykꞌulbꞌin kyibꞌ junx tukꞌa Pabl. Ex bꞌeꞌx nimin noq tuꞌn xnaqꞌtzbꞌil tuꞌn Pabl tiꞌj Tyol Dios, ex o taqꞌ tibꞌ te mojilte antza toj tze. Tbꞌanilx ele mojil luꞌn te Pabl, me tuꞌnjo tkawbꞌil Rom, iltaq tiꞌj tuꞌn taj meltzꞌit Onésimo tukꞌa tajaw, a Filemón, jun nimil nimxix toklin kyxol Ttanim Dios, ex ojtzqiꞌnxixtaq wen tuꞌn Pabl.
Tuꞌnpetziꞌn, kubꞌ tbꞌisin Pabl tuꞌn taj tmeltzꞌin, me nya noq kukxjo, qalaꞌ tukꞌa jun uꞌj, a xi ttzꞌibꞌin, jaꞌ ntqꞌmaꞌn te Filemón tuꞌn t-xi tkꞌmoꞌn, nyatla te jun aqꞌnil te jun majx, qalaꞌ te jun tukꞌa toj tnimbꞌil tiꞌj Jesucrist.
Atzin uꞌj luꞌn jun tbꞌanil yekꞌbꞌil tiꞌjjo tzeꞌn tuꞌn qyolin junx qxolx, quꞌn manyor bꞌunin tyol Pabl, exla qa kuj chꞌin tuꞌn tnikꞌet. Nyolintaq Pabl tukꞌa Filemón nya tiꞌjjo jun kawbꞌil te twutz txꞌotxꞌ, qalaꞌ tiꞌjjo jun tkawbꞌil qMan Dios, a nimxix toklin, a tuꞌn qkꞌuꞌjlin te qibꞌ qxolx.
1
Jun qꞌolbꞌil tuꞌn Pabl te Filemón
1 Ayiꞌn Pabl, a intinkuxa toj tze noq tuꞌn tpaj Crist, a Jesús, nxi ntzꞌibꞌinjiꞌy uꞌj luꞌn junx tukꞌa qerman, Timotey, tuꞌn tkanin tukꞌiy, ay Filemón, a kꞌuꞌjlin quꞌn ex qukꞌiy toj aqꞌuntl. 2 Ex nxi ntzꞌibꞌiꞌn tey, ay qerman qya, Apia, junx tukꞌa Arquipo,✡Col. 4:17. a ma tzꞌok te xoꞌl qꞌaqꞌ toj taqꞌin qMan Dios junx qukꞌiy; ex kye Ttanim Dios, ayeꞌ nchi chmet toj tjaꞌy.
3 Noqit ax qMan Dios junx tukꞌa Jesucrist, a tAjaw Tkyaqil, tzaj qꞌonte t-xtalbꞌil kyibꞌaja junx tukꞌa tnukꞌbꞌil toj tkyaqil.
Tnaꞌj Dios Pabl tiꞌj Filemón
4 Kukx nchin qꞌonjiꞌy chjonte te Dios tiꞌja toj nnaꞌj Diosa, 5 quꞌn tuꞌn nxi nbꞌiꞌn tiꞌjjo nim tkꞌuꞌja at, ex tnimbꞌila tiꞌj qAjaw Jesús, ex kyukꞌaꞌ kykyaqil nimil. 6 Nchin kubꞌsin nwutza tiꞌja, tuꞌn tok tilil tuꞌn, tuꞌn tkubꞌ tchikyꞌbꞌinjiy qnimbꞌil, tuꞌntzintla tel tnikyꞌa te tkyaqiljo kyꞌiwbꞌil, a at qe, noq tuꞌn Crist, a Jesús. 7 Noq tuꞌn nim tkꞌuꞌja at, werman, ma tzaj tzaljbꞌil, ex nimsbꞌil nkꞌuꞌja, quꞌn ma chewx kyanminjo kykyaqil nimil tuꞌn.
Jun tkubꞌsbꞌil twutz Pabl te Filemón tiꞌj Onésimo
8 Tuꞌnpetziꞌn, exla qa at wokliꞌn tuꞌn Crist, tuꞌn t-xi nqꞌmaꞌn tey, alkye tuꞌn tkubꞌ tbꞌinchiꞌn, 9 me noq tuꞌn at nkꞌuꞌja tiꞌja, nchin kubꞌsin nwutza tey tiꞌjjo a kxel nqaniꞌn tey. Qꞌaqꞌin tkꞌuꞌja, erman, quꞌn tuꞌn ma chin tijin, ex jpuꞌnqiꞌn jaꞌlin toj tze noq tuꞌn tpaj qAjaw Jesucrist. 10 Tuꞌnpetziꞌn, nchin kubꞌsin nwutza tiꞌj Onésimo,✡Col. 4:9. a ma tzꞌok te nkꞌwala toj qnimbꞌil tzaluꞌn toj tze. 11 Quꞌn ataqtzin ojtxe o tzꞌokin Onésimo te jun taqꞌnila toj tjaꞌy, ntiꞌ tajbꞌin, exla qa Nimxix Tajbꞌin n-ele tbꞌi toj qyol. Me atzin jaꞌlin at-xix tajbꞌin tey ex te wey. 12 Nimxix nkꞌuꞌja tiꞌj, me kxel nsmaꞌn juntl majl tukꞌiy. 13 Wajatlaꞌy tuꞌn tten mojil wukꞌiy te t-xela, quꞌn loqinxa intinkux toj tze, tuꞌn tpaj Tbꞌanil Tqanil. 14 Me mix kubꞌ nbꞌinchiꞌn a naꞌmtaqx nyoliꞌn tukꞌiy, tuꞌntzintla qa ma tbꞌinchiy jun bꞌaꞌn wiꞌja, noq tzeꞌn ktzajil itzꞌje toj tanmiꞌn, ex nyaqiꞌn nchin qaninte. 15-16 Bꞌalaqa iky tajbꞌil Diosjo, tuꞌn tel tpaꞌn Onésimo tibꞌ tiꞌja jun jteꞌbꞌin qꞌij, noq tuꞌn tok te jun termana te jun majx, a kꞌuꞌjlin tuꞌn, ex nya noq oꞌkx te jun taqꞌnila te jun majx toj tjaꞌy. Quꞌn wajxixa tiꞌj, me bꞌaꞌntla tuꞌn tok tkꞌuꞌjlin wen tzeꞌnku weꞌ, nya noq jun ichinxi toj tjaꞌy, qalaꞌ tzeꞌnku jun nimil tiꞌj tAjaw Tkyaqil.
17 Tuꞌnpetziꞌn, qa ma qe tkꞌuꞌja wiꞌja, qa qukꞌa qibꞌ, kꞌmomtzintza nyakuxitlaj ayiꞌn. 18 Ex qa at jun nya bꞌaꞌn o tzꞌok tbꞌinchin tiꞌja, mo qa at tkꞌas tey, peyimila wiꞌja, 19 ex ayinkuy kchin xel chjonte tey. Tuꞌnpetziꞌn, ayiꞌn Pabl nkubꞌ ntzꞌibꞌinjiꞌy luꞌn, te jun kujsbꞌilte nyola, tuꞌn t-xi nchjoꞌn. ¿Me ex ikyx tejiy? ¿Ma nyatzin kꞌasbꞌiniy weꞌy, tej xnimiꞌn tiꞌj Tbꞌanil Tqanil wuꞌn?
20 Ikytziꞌn werman, nchin kubꞌsin nwutza teꞌy, tuꞌn tbꞌinchiꞌn tzeꞌnku nqaniꞌn toj tbꞌi tAjaw Tkyaqil. Chewsima wanmiꞌn toj qnimbꞌil tiꞌj Crist. 21 Tuꞌnpetziꞌn, ma txi ntzꞌibꞌinjiꞌy luꞌn, quꞌn ma qe nkꞌuꞌja tiꞌja, qa kꞌwel tbꞌinchiꞌn tzeꞌnku xi nqꞌmaꞌn, ex bꞌalaqa ok bꞌantil tuꞌn nimxix tzeꞌnku xi nqaniꞌn.
22 Ex ikyxjo, xi nqꞌmaꞌn tuꞌn tkubꞌ tbꞌinchiꞌn jaꞌ tuꞌn nktaniꞌy, quꞌn qꞌuqle nkꞌuꞌja tiꞌj Dios, tuꞌn ttzaj ttzaqꞌwiꞌn kynaꞌj Diosa, alkye qꞌij tuꞌn nxiꞌy lol kyeꞌy.
23 Ex nxi tsmaꞌn Epafras jun qꞌolbꞌil, a wukꞌiy at toj tze noq tuꞌn tpaj Crist, a Jesús.✡Col. 1:7; 4:12. 24 Ex ikyxjo jun qꞌolbꞌil tuꞌn Marks,✡Kybꞌi. 12:12, 25; 13:13; 15:37-39; Col. 4:10. Aristarco,✡Kybꞌi. 19:29; 27:2; Col. 4:10. Demas,✡Col. 4:14; 2Tim. 4:10. ex Lucas,✡Col. 4:14; 2Tim. 4:11. ayeꞌ nchi mojin wukꞌiy toj taqꞌin qMan.
25 Noqit a t-xtalbꞌil Jesucrist, a tAjaw Tkyaqil, tten toj kyanmiꞌn te jun majx.