1 ¿Ex altzin kyeꞌ Melquisedec? Atzin nmaq kawil te Salem ex tnejilxix tpale qMan Dios, a Dios nimxix toklin. Tej tmeltzꞌaj Abraham jyol qꞌoj, ex otaq chi kubꞌjo aj kawil tuꞌn, etz Melquisedec kꞌlulte toj bꞌe, ex kubꞌ tqꞌoꞌn jun kyꞌiwbꞌil tibꞌaj. 2 Ex atzin te Abraham xi tqꞌoꞌn te Melquisedec tlajajin tkanebꞌ tiꞌjjo otaq tkanbꞌe toj jyoj qꞌoj.✡Gen. 14:17-20. Atzin n-ele bꞌibꞌaj Melquisedec: Tzꞌaqlexix toj Kawbꞌil. Ex atzin toklin Melquisedec, nmaq kawil te Salem. Atzin te Salem: Nukꞌbꞌil n-ele toj kyyol.

3 Ex mix aꞌl bꞌilte alkye ttata ex alkye tnana, ex alkye tyajil, ex tiꞌjjo titzꞌjlin ex tiꞌjjo tkyimlin. Tuꞌntzin ikyjo, nyakuj tzeꞌnku Jesús, a Tkꞌwal Dios, quꞌn mix jaꞌ saje xkyeye, ex mibꞌin bꞌaj, ex tok te tnejilxix pale te jun majx.

4 Atzin jaꞌlin, kykaꞌyinktzintza jniꞌtzin toklin Melquisedec kywutzjo txqantl pale, ayeꞌ tzajninqe tiꞌj Leví. Quꞌn tuꞌn Abraham, a ojtxe qxeꞌchil, ex nim toklin, xi tqꞌoꞌn te Melquisedec a tlajajin tkanebꞌ tiꞌjjo otaq tkanbꞌe toj jyoj qꞌoj kyukꞌa aye kawil. 5 Tzaluꞌn twutz txꞌotxꞌ, ayetzin pale tzajninqe tiꞌj Leví, attaq kyoklin tuꞌn kypeyin tlajajin kykanebꞌ kyibꞌajxi kyxjalil, ayexjo tzajninqe tiꞌj Abraham, ikyx tzeꞌnku kyij tqꞌmaꞌn toj ojtxe kawbꞌil.✡Num. 18:21. 6 Me qalatziꞌn te Melquisedec, nya tzajnin tiꞌj Leví. Atzin te Abraham, nimtaq teꞌ toklin, quꞌn tuꞌn otaq yolin qMan Dios tukꞌa, ex otaq tzaj tqꞌoꞌn Dios nim tkyꞌiwbꞌil tibꞌaj. Me atzin te Melquisedec, nimxixtl te toklin tibꞌaj Abraham, quꞌn atzin Melquisedec el tpeyin ajo tlajajin tkanebꞌ Abraham toj jyoj qꞌoj. Ex ikytzin kubꞌe tqꞌoꞌn Melquisedecjo tkyꞌiwbꞌil tibꞌaj Abraham. 7 Ex bꞌiꞌn quꞌn, qa alkye jun nkubꞌ qꞌoꞌnte kyꞌiwbꞌil kyibꞌajjo xjal, nimxixtl teꞌ toklin kyibꞌajjo txqantl xjal, aye nchi kubꞌ tkyꞌiwlin. Tuꞌn ikyjo, ate Melquisedec nimxixtl toklin tibꞌaj Abraham.

8 Ex majqexjo pale jaꞌlin kyxol Judiy, ayeꞌ nchi peyin tlajajin kykanebꞌ kyxjalil, noq xjalxiqe. Ex tuꞌn xjalxiqe, te kyiminqe. Me metziꞌn te Melquisedec, mina; qalaꞌ nyakuj itzꞌ teꞌ te jun majx, ikyxjo tzeꞌnkuꞌ ntqꞌmaꞌn Tuꞌjil Tyol Dios. Tuꞌn ikyjo, nimxixtl toklin Melquisedec kyibꞌaj pale tzajninqe tiꞌj Leví. 9 Tej tchojin Abraham tlajajin tkanebꞌ te Melquisedec, nyakutlaj o chi chojiꞌn kykyaqil aye tzajninqe tiꞌj, exqetziꞌn pale, ayeꞌ tzajninqe tiꞌj Leví, a xkachmanbꞌaj te Abraham. 10 Quꞌn kykyaqilx naꞌmxtaq kyel itzꞌje, ex iteꞌkxtaq tiꞌj t-xmilil Abraham tej tchjetjo tkanebꞌ. Ex tuꞌn ikyjo, nimxixtl toklin Melquisedec kyibꞌaj pale, ayeꞌ tzajninqe tiꞌj Leví.

11 ¿Me tiꞌtzin tajbꞌin luꞌn ikyjo te qe? Aye xjal aj Israel tzaj kytzyuꞌn ojtxe kawbꞌil noq kyuꞌn pale, ayeꞌ tzajninqe tiꞌj Leví, a t-xeꞌchil Aarón. Me atzin ojtxe kawbꞌil nlay chi ok xjal tzꞌaqle tuꞌn. Quꞌn noqit ikyjo, minatla xttxꞌixpe Dios ojtxe kawbꞌil, ex minatla saj tchqꞌoꞌn juntl pale, a Jesús, tuꞌn tok te pale te jun majx, nya tzeꞌnqeku aye tzajninqe tiꞌj Aarón, qalaꞌ tzeꞌnku te Melquisedec. 12 Quꞌn qa ma txꞌixpitjo kyoklin kykyaqil pale, iltzin tiꞌjtz tuꞌn ttxꞌixpit kawbꞌil, quꞌn noq tuꞌn ojtxe kawbꞌil at kyoklin xjal tuꞌn kyok te pale. 13 Me ante Jesús, a qAjaw, ex a nyolajtz toj Tyol Dios, nya tzajnin teꞌ tiꞌj Leví, qalaꞌ tiꞌj juntl chꞌuq xjal, a tzajnin tiꞌj Israel, a jaꞌ ntiꞌtaq jun tuꞌn tok te pale. 14 Quꞌn bꞌiꞌnxix tetz qa a Jesús tzajnin teꞌ tiꞌj Judá ex nya tiꞌj Leví. Me ntiꞌ te Moisés tqꞌma toj ojtxe kawbꞌil qa tuꞌntaq tul jun pale kyxoljo xjal, ayeꞌ tzajninqe tiꞌj Judá, qalaꞌ noq tiꞌj Leví.

15 Qꞌanchaꞌlxix taꞌ, qa a Jesús tnejilxix pale ikyjo tzeꞌnkuꞌ te Melquisedec, 16 ex at toklin te pale nya tuꞌn ojtxe kawbꞌil, a jaꞌ n-uꞌjite qa oꞌkqexjo tzajninqe tiꞌj Leví at kyoklin tuꞌn kyok te pale. Qalaꞌ at toklin Jesús te pale noq tuꞌn tchwinqil te jun majx. 17 Quꞌn tuꞌn ikyjo, tqꞌma Dios tiꞌj, toj Tuꞌjil Tyol. Chi kyjaluꞌn: A te pale te jun majx, ikyxjo tzeꞌn te Melquisedec.✡Sal. 110:4.

18 Tuꞌntziꞌn ikyjo, a tkawbꞌil Moisés ojtxe bꞌeꞌx kyij naj, quꞌn ntiꞌ tajbꞌin, 19 quꞌn ntiꞌ tumil tuꞌn ttzqet-xix kyanmin xjal tuꞌn. Me metziꞌn jaꞌlin, tzaj tqꞌoꞌn jun tqꞌuqbꞌil qkꞌuꞌj tbꞌanilxix wen, tuꞌn qpon laqꞌe tkꞌatz qMan Dios: 20-21 Ok tqꞌoꞌn Dios qAjaw Jesús te jun pale, ex xi tqꞌmaꞌn qa twutzxix te jun majx. Me tojjo yol luꞌn, mix qꞌolbꞌine tiꞌj tbꞌi kyaꞌj mo tiꞌj tbꞌi txꞌotxꞌ tuꞌn tkubꞌ tkꞌluꞌn qa twutzxix Tyol, qalaꞌ tukꞌa tkyaqil tipin kubꞌ tkujsin Tyol qa twutzxix. Me metziꞌn kyukꞌa txqantl pale, ayeꞌ tzajninqe tiꞌj Leví, mix yolin Dios ikyjo. Tuꞌnpetzintzjo ntqꞌmaꞌn toj Tuꞌjil Tyol Dios kyjaluꞌn:

22 Quꞌn atxix ojtxe, bꞌantnin tiꞌj tuꞌn Dios tuꞌn kykyijxjal toj wen tukꞌa, noq kyuꞌn pale, ayeꞌ tzajninqe tiꞌj Leví. Me tkyaqiljo lo mix ele wen. Ex atzin jaꞌlin, tuꞌn Jesús at juntl tbꞌanil tumil nimxixtl toklin tzeꞌnkuꞌ ojtxe. 23 ¿Me tiꞌtaqtzin tkyꞌi tojjo ojtxe tumil? Quꞌn ayetzin txqantl pale, ilaꞌtaq kybꞌaj, quꞌn tuꞌn te kyiminqetaq. Ex tuꞌn ikyjo, nlaytaq chi ten te jun majx. 24 Me atzin te Jesús itzꞌ teꞌ te jun majx, ex tuꞌn ikyjo, at toklin te pale te jun majx. Ex nya il tiꞌj tuꞌn tkyij tqꞌoꞌn toklin te juntl, quꞌn itzꞌ te jun majx. 25 Tuꞌnpetzintzjo, ate Jesús at tipin tuꞌn kyklet-xjal tuꞌn te jun majx, ayeꞌ kchi tzajil laqꞌe tkꞌatz qMan Dios noq tuꞌn Jesús; quꞌn najle te jun majx, ex nkubꞌsin twutz te Dios kyiꞌj.

26 Quꞌn ate Jesús jun tnejilxix pale nimxix toklin, ex nimxix tajbꞌin te qe. Quꞌn ate Jesús tzꞌaqlexix wen: Ntiꞌ til, ex ntiꞌ tkyꞌi, ex nya ikyjo tzeꞌnqeku xjal, aj il. Ex atzin jaꞌlin tokx toj kyaꞌj, junx tukꞌa Ttata, a qMan Dios. 27 Ex mikyxi Jesúsjo tzeꞌnku txqantl tnejilxix pale ojtxe, ayeꞌ iltaq tiꞌj tuꞌn tkubꞌ kybꞌyoꞌn aluꞌmj tnejil te chojbꞌil kyilku, ex te chojbꞌil kyilxjal.✡Lv. 9:7. Me metziꞌn te Jesús xi tqꞌoꞌn tibꞌ te jun majx, tej tkyim te chojbꞌil kyil kykyaqil xjal.

28 Toj tkawbꞌil Moisés ojtxe, i ok qꞌoꞌn te tnejilxix pale, ayeꞌ ichin, a nya tzꞌaqle. Me metzin te Jesús, tzꞌaqlexix teꞌ te jun majx. Ex tej otaqxi tzaj tqꞌoꞌn Dios kawbꞌil te Moisés, kubꞌ tkujsin Dios Tyol tiꞌj Tkꞌwal tukꞌa tkyaqil tipin, tuꞌn tok te juntl wiq tnejilxix pale te jun majx.