8
Jesús jun Yolil qiꞌj twutz qMan Dios
1 Toj tkyaqiljo nxi nqꞌmaꞌn kyeꞌy, atzin nimxixtl toklin kyibꞌaj txqantl, a kxel qꞌmet kyjaluꞌn: Tnejil, atzin Jesús, a tnejilxix qpale, at nimxix toklin ex qꞌuqle toj kyaꞌj toj tman qꞌobꞌ qMan Dios kawil tukꞌa.✡Sal. 110:1. 2 Ex tkabꞌ, lu n-aqꞌnin te qe tukꞌa toklin te tnejilxix qpale, jaꞌ najle Dios toj kyaꞌj tojjo twutzxix tja, bꞌinchin tuꞌn, ex nya kyuꞌnxjal.
3 Ex tkyaqilxjo tnejilxix pale il tiꞌj tuꞌn tqꞌoꞌn oyaj te Dios, ex tuꞌn tqꞌoꞌn chojbꞌil te il. Ex quꞌn tuꞌn a Jesús tnejilxix qpale, il tiꞌj tuꞌn t-xi tqꞌoꞌn jun tiꞌ twutz Dios. Me a Jesús, nya tnejilxix qpale tzaluꞌn twutz txꞌotxꞌ, qalaꞌ tzma toj kyaꞌj. 4 Quꞌn noqit axsa taꞌye tzaluꞌn, mitla s-ok te tnejilxix pale, quꞌn iteꞌl pale tzaluꞌn twutz txꞌotxꞌ tzajninqe tiꞌj Leví, ex nchi qꞌoꞌn oyaj, tzeꞌnku ntqꞌmaꞌn tkawbꞌil Moisés toj Tuꞌjil Tyol Dios. 5 Ex ayetziꞌn pale tzaluꞌn, ayeꞌ nchi aqꞌnin toj tnejil ja te naꞌbꞌl Dios, ilaꞌ tiꞌ n-ajbꞌin kye toj kyaqꞌin. Tkyaqiljo lo ikyjo tzeꞌnku t-xlekemil, ex tzeꞌnku twutzbꞌiyiljo, a at toj kyaꞌj. Ex bꞌiꞌn quꞌn qa noq twutzbꞌiyil, quꞌn kaꞌntzaj, tej tkubꞌ tbꞌinchin Moisés tnejil ja te naꞌbꞌl Dios; aku Dios xi qꞌmante te kyjaluꞌn:
Qꞌoꞌnktzin twiꞌy tiꞌjjo kxel nqꞌmaꞌn teꞌy, tuꞌn tkubꞌ tbꞌinchinjiy njaꞌy ex tkyaqiljo at toj, ikyxixjo tzeꞌnku xi nyekꞌiꞌn teꞌy twiꞌ wutz, tuꞌn tbꞌant tzeꞌnkuxixjo tilbꞌiyil twutzxix njaꞌy, a at toj kyaꞌj.✡Ex. 25:40.
6 Me atzin jaꞌlin, a tnejilxix qpale toj kyaꞌj, Jesús tbꞌi, nimxixtl teꞌ toklin tibꞌaj kyaqꞌin ojtxe pale toj jun taqꞌin tuꞌn kykyijxjal toj wen tukꞌa Dios. Quꞌn atzin taqꞌin Jesús tzajnin tiꞌjjo yol, a kujsit wen tuꞌn Dios. Me mix yoline Dios ikyjo kyukꞌa txqantl pale, aye tzajninqe tiꞌj Leví.
7 Noqit i kyijxjal toj wen tukꞌa Dios te tnejil, tuꞌn tsaqix kyanmin te jun majx kyuꞌn ojtxe pale, nyatla il tiꞌj tuꞌn tul Jesús tukꞌa juntl tumil nimxixtl wen. 8 ¿Me tiquꞌnil il tiꞌj ul kanin juntl tumil? Quꞌn tuꞌn mix japine kyuꞌnxjal te tnejil. Tuꞌn ikyjo, chitzin Tyol Dios kyjaluꞌn toj Tuꞌjil Tyol:
Tzul tqꞌijil, chi tAjaw Tkyaqil,
ex ktzajil nqꞌoꞌn jun akꞌaj tumil kye xjal aj Israel ex aj Judá.
9 Me atzin akꞌaj tumil mikyxiꞌ tzeꞌnku bꞌant tiꞌj wuꞌn te tnejil, kyukꞌa ojtxe kyxeꞌchila, tej kyetz nxkoꞌn toj txꞌotxꞌ Egipto.
Me mix japine kyuꞌnxjal tzeꞌnku kyij bꞌant tiꞌj wuꞌn kyukꞌa.
Tuꞌntziꞌn, o chi kyij ntzaqpiꞌn, chitzin Diosjo.
10 Qalatziꞌn tbꞌajlinxiꞌ aye qꞌij anetziꞌn, chi Dios, kbꞌantil wuꞌn jun akꞌaj tumil kyukꞌa tkyaqil xjal, ayeꞌ tzajninqe tiꞌj Israel kyjaluꞌn:
Kꞌwel nkawbꞌila toj kynabꞌl. Ex kyjel ntzꞌibꞌiꞌn toj kyanmin. Oktzin kchin okiltza te kyDios te jun majx. Ex ayetzin kyetz kchi okil te Ntanima.
11 Tuꞌntzintzjo, kyojjo qꞌij anetziꞌn, chi Diosjo, nya il tiꞌj tuꞌn tten jun xjal xnaqꞌtzil kyeꞌ txqantl, qa il tiꞌj tuꞌn tel kynikyꞌ tiꞌj tAjaw Tkyaqil,
quꞌn tkyaqil xjal k-elil kynikyꞌ weꞌy; jniꞌqe ma tij xjal ex jniꞌqe tal netzꞌ kꞌwal.
12 Ex kꞌwel nnajsin kybꞌinchbꞌin nya wen, ex nlay tzaj nnaꞌntla juntl majl kyil.✡Jer. 31:31-34.
13 Tej tyolin Dios tiꞌjjo jun akꞌaj tumil, antza kyij tyekꞌine qa a ojtxe ntiꞌtaq tipin tuꞌn tsaqix kyanmin xjal tuꞌn, quꞌn chꞌixtaq tjapin bꞌaj te jun majx.