1 Tzꞌibꞌinkujiy lo te nejinel toj Ttanim Dios toj tnam Sardis:

Ikytzin ntqꞌmaꞌn Jesús, a at Xewbꞌaj Xjan tukꞌa, ex a tzyul teꞌ wuq cheꞌw toj tman qꞌobꞌ:

Wojtzqiꞌn kybꞌinchbꞌiꞌn, ex qa nchi ajbꞌin weꞌy toj kywutza. Me te weꞌy, kyimninqiꞌy toj kyanmiꞌn. 2 ¡Kysakꞌpintz kyibꞌa! Ex kykujsinqetzjiꞌy aye chꞌintl, a bꞌaꞌn chꞌintl iteꞌye, quꞌn chꞌix kykubꞌ naja te jun majx. Quꞌn ayetzin kybꞌinchbꞌiꞌn nya tzꞌaqleqe twutz qMan Dios. 3 Tuꞌnpetziꞌn, kynaꞌnqetzjiꞌy xnaqꞌtzbꞌil, aye o chi tzaj kykꞌmoꞌn. Chi lipexa tiꞌj; ku tajtz tiꞌj kyanmiꞌn, kymeltzꞌintz kyibꞌa wukꞌiy. Quꞌn qa mi saj kysakꞌpin kyibꞌa, kchin poꞌn kawil kyiꞌja, ex ntiꞌ tqanil aj npoꞌn, tzeꞌnku jun ileqꞌ toj qnikyꞌin.✡Mt. 24:43-44; Lc. 12:39-40; Tchi. 16:15.

4 Me at junjun kyxola toj Sardis, ayeꞌ mi nkubꞌ kybꞌinchin il, ex toj nwutza, ma chi ok tzeꞌnku jun xjal txjoꞌn t-xbꞌalin wen. Ex kchi bꞌetil wukꞌiy toj kyaꞌj tukꞌa kyxbꞌalin sjanin wen te t-xeljo wen xbꞌant kyuꞌn, quꞌn at kyoklin toj nwutza. 5 Ankye qe, kchi weꞌbꞌil twutz tkyaqiljo lo, ex ikyxjo kxel nqꞌoꞌn kyxbꞌalin sjanin wen. Ex nlayx jatz nyupiꞌn kybꞌi tojjo uꞌj te chwinqil;✡Ex. 32:32-33; Sal. 69:28; Tchi. 20:12. qalaꞌ kchin yolila kyiꞌj twutz Nman ex kywutz t-angel.✡Mt. 10:32; Lc. 12:8.

6 Aꞌlchaqx kyetz k-okil bꞌinte a ntqꞌmaꞌn Xewbꞌaj Xjan kye wuq chꞌuq Ttanim Dios, bꞌaꞌn tuꞌn tkubꞌ kybꞌinchin.

7 Tzꞌibꞌinkujiy lo te nejinel toj Ttanim Dios toj tnam Filadelfia:

Ikytzin ntqꞌmaꞌn Jesús, a xjanxix, a twutzxix Tyol, a at toklin tibꞌaj tkyaqil tyajil qtzan nmaq kawil David. Ax Jesús at tipin tuꞌn ttzaj tqꞌoꞌn kolbꞌil, a mix aꞌlx jun aku tzꞌel qꞌinte. Ex qa tkyꞌeꞌ tuꞌn ttzaj tqꞌoꞌn, mix aꞌlx jun aku tzꞌokx tuꞌnx tibꞌx.✡Is. 22:22.

8 Wojtzqiꞌn kybꞌinchbꞌiꞌn bꞌaꞌn toj kynimbꞌila. Tuꞌnpetziꞌn, ma kubꞌ nqꞌoꞌn jun kolbꞌil te jun majx, a mix aꞌl jun aku tzꞌel qꞌinte. Exla qa ntiꞌ nim kyipiꞌn toj kywutzxjal, me ma kubꞌ kykꞌuꞌnjiꞌy nyola, tzeꞌnkuxjo waja, ex ntiꞌ ma kubꞌ kyewiꞌn qa nimilqiꞌy. 9 Quꞌn at junjun aj Judiy kykꞌatza, a nxi kyqꞌmaꞌn qa Ttanim Diosqexix, me ma chex lipe tiꞌj tajaw il, ex nikyꞌil yolqe. Kxel nyekꞌiꞌn kye, qa aye kyeꞌ twutzxix Ntanimqiꞌy; ex toj paꞌbꞌin, kchi tzajil wiꞌn tuꞌn kykubꞌ meje kywutza, tuꞌn tel kynikyꞌ te, qa nimx nkꞌuꞌja kyiꞌja.✡Is. 60:14. 10 Toj tkyaqil ma tzikyꞌx kyuꞌn, kukx ma chi wejiꞌy toj kynimbꞌila, tzeꞌnkuxjo xi nqꞌmaꞌn. Tuꞌnpetziꞌn, kchi kletila wuꞌn, aj ttzajjo nimx kyixkꞌoj kyiꞌj tkyaqil xjal twutz txꞌotxꞌ, te jun nikyꞌbꞌil tiꞌj kynimbꞌil.

11 Kchin ula liwey. Tuꞌnpetziꞌn, mi kyij kytzaqpinjiꞌy kynimbꞌila, tuꞌntzin mix aꞌl jun k-elil qꞌintejo oyaj, a nchi yoꞌn tiꞌj. 12 Ankye qe, kchi weꞌbꞌil twutz tkyaqiljo lo, kchi okil te nim kyoklin toj kyaꞌj tukꞌa Dios, ex mix jtojx tuꞌn kyetz antza. Ex k-okil ntzꞌibꞌiꞌn tbꞌi nMaꞌn kyiꞌj, tuꞌn tyekꞌin qa teꞌqe; ex k-okil ntzꞌibꞌiꞌn tbꞌi akꞌaj tnam Jerusalén kyiꞌj, a tzajnin te qMan Dios toj kyaꞌj,✡Tchi. 21:2. tuꞌn tyekꞌin qa at kyoklin tiꞌj. Ex k-okil ntzꞌibꞌiꞌn akꞌaj nbꞌiꞌy kyiꞌj.

13 Aꞌlchaqx kyetz k-okil bꞌinte a ntqꞌmaꞌn Xewbꞌaj Xjan kye wuq chꞌuq Ttanim Dios, bꞌaꞌn tuꞌn tkubꞌ kybꞌinchin.

14 Tzꞌibꞌinkujiy lo te nejinel toj Ttanim Dios toj tnam Laodicey:

Ikytzin ntqꞌmaꞌn Jesús, a Twutzxix, ex twutzxix yolin tiꞌj tkyaqil a ma tli, a jaꞌ saja xkye tkyaqil tchꞌiysbꞌin qMan Dios:✡Pr. 8:22.

15 Wojtzqiꞌn kybꞌinchbꞌiꞌn, a nya wen te jun chewsbꞌil kyanminxjal mo te jun onbꞌil kye, tzeꞌnku at tajbꞌin aꞌ cheꞌw te chewsbꞌilqe, mo aꞌ kyaqxix te qꞌanbꞌil qxmilil. Noqpit ikyqejiꞌy tzeꞌnku aꞌ cheꞌw mo kyaq. 16 Me metzin kyeꞌ, ntiꞌx kye kyajbꞌin, quꞌn noq tal chꞌin maqꞌmaj, a nya cheꞌw ex nya kyaq. Tuꞌnpetziꞌn, kchi elitz nxabꞌiꞌn toj ntziꞌy. 17 Quꞌn nkyqꞌmaꞌn, qa qꞌininqiꞌy, ex qa bꞌaꞌn iteyiꞌy, ex qa ntiꞌ atx taj kyeꞌy. Me ntiꞌx n-el kynikyꞌa te, qa toj nwutza, toj bꞌisbꞌajil iteꞌy, ex ntiꞌ chꞌin kywenila, ex yajqiꞌy, moẍ, ex ẍbꞌiqqiꞌy. 18 Kxel nqꞌmaꞌn kyeꞌy qa tkyaqiljo kyqꞌinimila lo twutz txꞌotxꞌ ntiꞌx tajbꞌin. Tuꞌnpetziꞌn, ku kymeltzꞌaja wukꞌiy, ex kxel nqꞌoꞌn kyqꞌinimila twutzxix toj kyanmiꞌn, a nimxix tajbꞌin tzeꞌnku qꞌanpwaq, a tzꞌiltzꞌin wen tuꞌn qꞌaqꞌ. Quꞌn atzin kyqꞌinimila wenxix jun kyanmiꞌn tzꞌaqle tzeꞌnku kyxbꞌaliꞌn sjanin, tuꞌn tok kyiꞌja; ex tuꞌn tktxetjo kytxꞌixewa ẍbꞌiq taꞌ; ex ikyxjo atzin kyqꞌinimila tzeꞌnku jun ojtzqibꞌl te Dios tzeꞌnku jun qꞌanbꞌil kywutza, tuꞌntzin tbꞌant tkaꞌyiꞌn, ex tuꞌn tel kynikyꞌ te wen.

19 Ex nchex nmiyoꞌn, ex nchex nkawinjiꞌy kykyaqiljo a kꞌuꞌjlinqe wuꞌn.✡Pr. 3:12; Eb. 12:5-11. Tuꞌnpetziꞌn, ku tajtz tiꞌj kyanmiꞌn, kymeltzꞌintz kyibꞌa wukꞌiy. 20 Loqiꞌn intin nqayin kykꞌatza, tzeꞌnku jun kyukꞌiy nqꞌolbꞌin ttzi kyjay, a jpuꞌnxix wen. Ankye teꞌ, qa ma txi tbꞌiꞌn tqꞌajqꞌojil nwiꞌy, ex qa ma txi tjqoꞌn tanmin, kchin okixa toj, kchin tenbꞌila tukꞌa, ex ktenbꞌil wukꞌiy toj tzaljbꞌil. 21 Ankye qe, kchi weꞌbꞌil twutz tkyaqiljo lo, kxel nqꞌoꞌn kyoklin tuꞌn kykubꞌ qe kawil wukꞌiy toj Nkawbꞌila, ikyxjo tzeꞌnku weꞌ, ma tzaj tqꞌoꞌn nMaꞌn wokliꞌn, tuꞌn nkubꞌ qey kawil junx tukꞌa toj Tkawbꞌil. 22 Aꞌlchaqx kyetz k-okil bꞌinte a ntqꞌmaꞌn Xewbꞌaj Xjan kye wuq chꞌuq Ttanim Dios, bꞌaꞌn tuꞌn tkubꞌ kybꞌinchin.