4
Ajo tqꞌuqbꞌil Dios toj kyaꞌj
1 Tbꞌajlinxiꞌ ikyjo, xi nkaꞌyiꞌn jun ttzija jqoꞌn toj kyaꞌj. Ex xi nbꞌiꞌn jun tqꞌajqꞌojil twiꞌ, a nyolintaq wukꞌiy, tzeꞌn tqꞌajqꞌojil chun, a tzeꞌnkuxjo otaq nbꞌiꞌy nej. Chiꞌ kyjaluꞌn: Ku tjatza tzaluꞌn, quꞌn kxel nyekꞌiꞌn tey tkyaqiljo kbꞌajil tibꞌajxi luꞌn.
2 Ex jun paqx tzaj tipin Xewbꞌaj Xjan wibꞌaja, ex xi nkaꞌyiꞌn jun qꞌuqbꞌil tkubꞌ toj kyaꞌj, jaꞌ nkawine Dios, ex qꞌuqletaq jun aꞌla tibꞌaj. 3 Me atzin a qꞌuqletaq antza, ikytzin kaꞌyiꞌn tzeꞌnqeku tal abꞌj nchi qoptzꞌaj wen; nchi tilkꞌaj ex manyor chikyꞌxix kaꞌyin. Ex atzin tiꞌjile qꞌuqbꞌil, attaq jun t-xew kan nqoptzꞌaj wen tzeꞌnku jun tal abꞌj esmeralda.✡Ez. 1:26-28; 10:1. 4 Ex tiꞌjile qꞌuqbꞌil lo, xi nkaꞌyiꞌn kyaje toj kaꞌwnaq*Kyaje toj kaꞌwnaq, 24 n-ele, ex ikyxjo toj v. 10. nejinel qꞌuqleqetaq tibꞌaj kyaje toj kaꞌwnaq qꞌuqbꞌil, toktaq kyxbꞌalin sjanin wen, ex tokxtaq jun toj kywiꞌ bꞌinchin tuꞌn qꞌanpwaq te jun yekꞌbꞌil teꞌ kyoklin. 5 Ex tiꞌjjo qꞌuqbꞌil nchi etztaq qoptzꞌaj xloqꞌlin kyaꞌj, ex tqꞌajqꞌojil ntinin wen, ex qꞌankyaq.✡Ex. 19:16; Tchi. 8:5; 11:19; 16:18. Ex twutzjo qꞌuqbꞌil nchi kꞌanttaq wuq tzaj,✡Ez. 1:13. a jun yekꞌbꞌil tiꞌj Xewbꞌaj Xjan, a tzꞌaqlexix.✡Tchi. 1:4. 6 Ex twutz qꞌuqbꞌil, attaq jun tiꞌ tzeꞌnku ttxuyil aꞌ, a ẍtilin twutz, tzeꞌnku jun kaꞌybꞌil wutzbꞌaj.✡Ez. 1:22.
Ex toj tanmin kyaꞌj ex tiꞌjile qꞌuqbꞌil, attaq kyaje ajbꞌil te Dios, aye ikyx chi kaꞌyin tzeꞌnku txuk, me nojnin kyiꞌj tukꞌa tbꞌaqꞌ kywutz.✡Ez. 1:5-10; 10:14. 7 Atzin tnejil ajbꞌil iky kaꞌyin tzeꞌnku bꞌalun; atzin tkabꞌ tzeꞌnku jun tal wakx, atzin toxin attaq twutz tzeꞌnku jun xjal, ex atzin tkyajin, iky kaꞌyin tzeꞌnku jun tꞌiw nlipin. 8 Ayetzin kyaje ajbꞌil attaq qaq t-xikyꞌ teyile junjun, ex nojnintaq kyiꞌj tukꞌa tbꞌaqꞌ kywutz, tzmax tjaqꞌ kyxikyꞌ.✡Ez. 1:18; 10:12. Tkyaqil qꞌij ex tkyaqil qnikyꞌin mi nchi kubꞌ numj tuꞌn kykꞌulin, ex nkyqꞌmaꞌntaq:
Xjanxix te, xjanxix te, xjanxix te tAjaw Tkyaqil,
a Dios nimxix tipiꞌn tuꞌn tbꞌant tkyaqil tuꞌn,✡Is. 6:2-3.
a attaqa te tnejil; ex ate jaꞌlin, ex axjiꞌy tzul kanin juntl majl twutz txꞌotxꞌ.
9-10 Ex junjun maj, aj tjaw kynimsiꞌn ajbꞌil tbꞌi Dios, a qꞌuqle tibꞌaj qꞌuqbꞌil, ex attaq tchwinqil te tnejil ex te jun majx, ex xi kyqꞌoꞌn nimxix toklin ex chjonte te, aye kyaje toj kaꞌwnaq nejinel nchi kubꞌ meje twutz, ex nchi kꞌulin te. Ex nxi kyqꞌoꞌn toj kywiꞌ, a bꞌinchin tuꞌn qꞌanpwaq te jun oyaj twutz, ex nxi kyqꞌmaꞌn:
11 Ay qAjaw ex qDiosa,
at te toklin tuꞌn t-xi tkꞌmoꞌn tkyaqil nimsbꞌil tbꞌiy, ex tokliꞌn ex tipiꞌn,
quꞌn ate xkubꞌ bꞌinchinte tkyaqiljo at,
ex noq tuꞌn tajbꞌila iteꞌ tkyaqiljo, a xkubꞌ tchꞌiysiꞌn.