5
Jun twutzikyꞌ tiꞌj Jesucrist
1 Ex xi nkaꞌyiꞌn toj tman qꞌobꞌjo a qꞌuqletaq toj qꞌuqbꞌil jun uꞌj bꞌaltzꞌin tten, ex tzꞌibꞌin tojxi ex tiꞌjxi.✡Is. 29:11; Ez. 2:9-10; Zac. 5:1. Ajo uꞌj jpuꞌn wen kyukꞌa wuq jupbꞌilte. 2 Ex xi nkaꞌyiꞌn jun angel at-xix tipin nxi tqanin tukꞌa tqꞌajqꞌojil twiꞌ kujxix wen: ¿Alkye jun at toklin tzꞌaqlexix wen tuꞌn tjaw laqetjo jupbꞌilte, ex tuꞌn tjqetjo uꞌj?
3 Mixpe noq toj kyaꞌj, ex twutz txꞌotxꞌ, ex tzmax tjaqꞌxi txꞌotxꞌ, mix aꞌlx jun attaq toklin tuꞌn tjqet tuꞌn, mixpe noq tuꞌn tok tkaꞌyin. 4 Tuꞌn ikyjo, bꞌeꞌx in jaw oqꞌa nimxix, quꞌn tuꞌn mix aꞌl jun knet, a at toklin tuꞌn tjaw jqet, ex tuꞌn tkubꞌ uꞌjitjo uꞌj, iꞌchaqxpetla noq tuꞌn tok kaꞌyit. 5 Me jun kyxol nejinel tzaj tqꞌmaꞌn weꞌy: Mi tzꞌoqꞌila, quꞌn at toklin Jesucrist tuꞌn tjqet uꞌj tuꞌn, quꞌn tuꞌn ma kubꞌ tiꞌj tkyaqil tuꞌn. Ikytziꞌn, kyij tzꞌibꞌin toj Tuꞌjil Tyol Dios tiꞌj nimxix tipin Crist, nyakuj jun bꞌalun tzajnin kyuꞌn chꞌuq xjal a tzajnin tiꞌj qtzan Judá,✡Gen. 49:9-10. ex at toklin te nmaq kawil, quꞌn tyajil nmaq kawil David.✡Is. 11:1.
6 Ex xi nkaꞌyiꞌn jun tal Tal rit waꞌltaq, a otaq kubꞌ bꞌyoꞌn.✡Is. 53:7. Attaq toj tkꞌuꞌjjo qꞌuqbꞌil, ex toj nikyꞌjin kyaje ajbꞌil exqetziꞌn nejinel. Attaq wuq tkach ex wuq tbꞌaqꞌ twutz. Ayetzin wuq tbꞌaqꞌ twutz jun yekꞌbꞌil tiꞌj Xewbꞌaj Xjan, a tzꞌaqlexix, a smaꞌn tuꞌn Dios, tuꞌn tojtzqinte tkyaqiljo nbꞌaj twutz txꞌotxꞌ.✡Zac. 4:10. 7 Me atzin teꞌ tal Tal rit xiꞌ, ex jaw ttzyuꞌn uꞌj toj tman qꞌobꞌ a qꞌuqletaq toj qꞌuqbꞌil. 8 Tej tjaw ttzyuꞌnjo uꞌj, ayetzin kyaje ajbꞌil exqetziꞌn kyaje toj kaꞌwnaq*Kyaje toj kaꞌwnaq, 24 n-ele. nejinel i kubꞌ meje twutzjo tal Tal rit. Teyile junjun nejinel attaq jun tchinibꞌ, ex qꞌiꞌntaq junjun laq kyuꞌn, bꞌinchin tuꞌn qꞌanpwaq, ex nojnintaq tukꞌa storak, a yekꞌbꞌil tiꞌj naꞌj Dios kyejo aye nimil tiꞌj.✡Sal. 141:2. 9 Ex nchi bꞌitzintaq tiꞌj jun akꞌaj bꞌitz kyjaluꞌn:
Ate at toklin tuꞌn tjaw ttzyuꞌn uꞌj,
ex tuꞌn tlaqitjo jupbꞌilte.
Quꞌn kubꞌ bꞌyoꞌn, ex tuꞌn tchkyꞌela ma chi laqꞌet-xjal tuꞌn, tuꞌn kyokin te Dios,
aꞌlchaqx kye kyxeꞌchil, kyyol, kytanim, ex kytxꞌotxꞌ.
10 Ex ma chi ok tqꞌoꞌn tuꞌn kyok te kawil ex te pale te qMan Dios.✡Ex. 19:6; Tchi. 1:6.
Ex ok kchi kawil tibꞌaj tkyaqil at twutz txꞌotxꞌ.
11 Ex xi nkaꞌyiꞌn, ex nbꞌiy tqꞌajqꞌojil kywiꞌ nimku angel, a iteꞌ tiꞌjile qꞌuqbꞌil, kyiꞌjile ajbꞌil ex kyiꞌjile nejinel. Ma nintzx kybꞌaj tibꞌaj ma nintz.✡Dan. 7:10. 12 Ex nkyqꞌmaꞌn tukꞌa tqꞌajqꞌojil kywiꞌ kujxix wen:
Ajo tal Tal rit, a kubꞌ bꞌyoꞌn, nimxix toklin tuꞌn tkꞌmonte tkyaqil tipin, ex jniꞌ tqꞌinimil, ex tkyaqil tnabꞌl ex tkujil, junx tukꞌa jniꞌ toklin, nimsbꞌil tbꞌi, ex bꞌitz te.
13 Ex xi nbꞌiꞌntla kye tkyaqiljo xi kubꞌ tbꞌinchin Dios, aye iteꞌ toj kyaꞌj, ex twutz txꞌotxꞌ, ex tjaqꞌxi txꞌotxꞌ, exqetziꞌn iteꞌ toj ttxuyil aꞌ, ex tkyaqiljo at kyoj. Nkyqꞌmaꞌn:
Qꞌonxa bꞌitz twutz Dios ex twutzjo tal Tal rit, a qꞌuqle toj qꞌuqbꞌil toj kyaꞌj, junx tukꞌa nimsbꞌil tbꞌi, ex jniꞌ toklin, ex tkyaqil tipin jaꞌlin ex te jun majx.
14 Ex ayetzin kyaje ajbꞌil nkyqꞌmaꞌn: Ikyxitjo. Ex aye nejinel kubꞌ meje kꞌulil twutz.