18
Bꞌeꞌx naj tnam Babilonia
1 Tbꞌajlinxiꞌ ikyjo, xi nkaꞌyiꞌn juntl angel, kyjaꞌtaq tkuꞌtz toj kyaꞌj tukꞌa nim tkawbꞌil, ex ante txꞌotxꞌ bꞌeꞌx qoptzꞌaj tukꞌa tqoptzꞌajiyil. 2 Ex tukꞌa tqꞌajqꞌojil twiꞌ, xi tqꞌmaꞌn kujxix wen:
Ma kubꞌ tzꞌaq nim tnam Babilonia te jun majx a aj kyꞌaꞌjil,✡Is. 21:9. ex ma tzꞌok te kyja taqꞌnil tajaw il, ex te kytxu tkyaqil ajbꞌil te. Ex ma tzꞌok te kypaqbꞌil pichꞌ, a nya wenqe, ex manyor tzꞌilqe.✡Is. 13:21; Jer. 50:39.
3 Quꞌn tkyaqilxjal twutz txꞌotxꞌ ma txi kyqꞌon kyibꞌ toj kyꞌaꞌjin, tzeꞌnku tuꞌn kytxꞌujte tukꞌa tkyaqil kyachbꞌil, a kubꞌ bꞌinchit toj tnam anetziꞌn.
Tkyaqil nmaq kawil twutz txꞌotxꞌ ma chi kyꞌaꞌjin tukꞌa,
ex kykyaqiljo xkꞌamil ma chi qꞌinimix noq tuꞌn kykꞌaẍjil ma wiꞌyin kyuꞌn aj Babilonia; xbꞌajxi kylaqꞌoꞌn te kytzeqbꞌil.
4 Ex xi nbꞌiꞌntla juntl tqꞌajqꞌojil twiꞌ tzaj toj kyaꞌj, ex tqꞌma:
Ku kyetza tojjo tnam lo, ayiꞌy ma chi oka te Ntanima, tuꞌntzin mi chi bꞌinchiniꞌy il kyukꞌa, ex tuꞌntzin mi pon kanin kyꞌixsbꞌajil kyibꞌaja, tzeꞌnku kye.✡Is. 48:20; Jer. 50:8.
5 Quꞌn atzin nim kyil nyakuj ma jaw chꞌuqit tzmax toj kyaꞌj.✡Jer. 51:9. Ex ma tzaj tqꞌoj Dios tiꞌj kyil.
6 Kyqꞌonxa t-xel kyejo xjal aj Babilonia, tzeꞌnku ma tzaj kyqꞌoꞌn kye txqantl.
Ex kychjonxa kabꞌe maj t-xel tzeꞌnkuxjo ntqanin.✡Sal. 28:4; 137:8; Jer. 50:29.
Ajo kyachbꞌil xi kysuqin kyexjal, ma tzꞌok te nim kyil, tzeꞌnku jun kꞌwabꞌj kꞌaxix wen.
Atzin jaꞌlin, kyqꞌonxa juntl kykꞌwaꞌ kabꞌe maj kꞌaxixtl tzeꞌnku xkubꞌ kybꞌinchin kye txqantl.
7 Kyqꞌonxa yajbꞌil, tuꞌn tikyꞌx kyuꞌn, tzeꞌnkuxjo otaq txi kyqꞌoꞌn kyibꞌ nej, tuꞌn kynimsin kyibꞌ, ex tuꞌn kytzeqin tiꞌj tkyaqil. Quꞌn ma kubꞌ kyximin toj kyanmin:
Loqin we qꞌuqleqiꞌn tzaluꞌn tzeꞌnku jun qya kawil, quꞌn nya o kyim we wukꞌa. Ex nlayxla chin bꞌisin weꞌ, chiꞌ.
8 Tuꞌnpetziꞌn, toj jun qꞌij, ktzajil kyꞌixsbꞌajil kyiꞌj: Aye kyimin, yajbꞌil kyiꞌj ex waꞌyaj.✡Is. 47:8-9.
Ex ajo kytanima ktzꞌeꞌyil tuꞌn qꞌaqꞌ.
Quꞌn ate Dios, a qAjaw, a Kawil kyibꞌaj, nimxix tipin.
9 Ayetziꞌn nmaq kawil twutz txꞌotxꞌ, ayeꞌ ẍi kyꞌaꞌjin ex ẍi ten tojjo tzeqbꞌil kyukꞌa xjal toj tnam Babilonia, okxla kchi oqꞌil, ex kchi labꞌil tiꞌj, aj t-xi kykaꞌyin tsbꞌeljo tnam, aj tbꞌaj tuꞌn qꞌaqꞌ. 10 Ex okla kchi kyjel ten najchaq tuꞌn kyxobꞌil tiꞌjjo kawbꞌil, ex ok kyqꞌmaꞌ:
Ay, bꞌisbꞌajilxla te tey, ay, nim tnam Babilonia, ajo attaq nim tipiꞌn. Quꞌn noq toj jun paqx s-ul tkawbꞌil Dios tibꞌaja.✡Ez. 26:16-18.
11 Ex ayetziꞌn kꞌayil twutz txꞌotxꞌ, ex okxla kchi oqꞌil, ex kchi labꞌil tiꞌjjo tnam lo, quꞌn mix aꞌl kxel laqꞌonte jniꞌ kykꞌaẍjil, a attaq: 12 Nim kyiqitz te qꞌanpwaq ex saqpwaq, tkyaqil wiq abꞌj ntzꞌiltzꞌin wen, tuꞌn tokx te kyuxjal, ex jniꞌ a wiꞌyil, a jatz toj ttxuyil aꞌ, a perlas tbꞌi, ex jniꞌ xbꞌalin tzꞌumin ex tbꞌanilx wen, ex seda, a ilaꞌ wiq kaꞌyin, tzeꞌnku kyaq, ex manyor wiꞌyilxix; ex nim kyiqitz te tzꞌlan tbꞌanilxix, ex kykyaqil wiq tiꞌ bꞌinchin tuꞌn tste ma tij txuk a tzajnin najchaq, ex tuꞌn tze tbꞌanil, ex tuꞌn qꞌankxbꞌil ex tuꞌn kxbꞌil; ex jniꞌ kyiqitz tbꞌanil abꞌj te bꞌinchbꞌil ja; 13 ex jniꞌ kyiqitz canela, ex tkyaqil wiq kꞌokꞌjsbꞌil, ex pon, ex jupsbꞌil, ex ilaꞌ wiq qꞌanbꞌil, ex qꞌeꞌn, ex aseyt, ex tukꞌax jarin cheꞌn wen, ex triy; ex ikyxjo tzaj kyiꞌn chej, a njax kyiqitz, ex rit, ex bꞌaꞌn chej, ex iqbꞌil qꞌinin, ex majqexpe tal xjal, tuꞌn kyxi kꞌayit, tuꞌn kyok te aqꞌnil te jun majx. 14 Ex kxel kyqꞌmaꞌn te tnam luꞌn:
Atzin jaꞌlin, ntiꞌ tkyaqiljo lobꞌj, a tbꞌanilx wen, a npontaq tkꞌuꞌja tiꞌj.
Ex tkyaqiljo tqꞌinimila, ex jniꞌ tzeqbꞌil, a attaq, ma naj te jun majx.
15 Ex ayetziꞌn kꞌayil, a ma chi suqin tkyaqiljo lo, bꞌeꞌx i qꞌinimix tuꞌn tpwaqjo tnam lo, okla kchi kyjel ten najchaq tuꞌn kyxobꞌil tiꞌjjo kawbꞌil, ex okla kchi oqꞌil, ex ok kchi labꞌil, 16 ex okla kyqꞌmaꞌ:
Ay, bꞌisbꞌajil tejo nim tnam Babilonia.
Ikytaqtziꞌn tzeꞌnku jun qya, toktaq t-xbꞌalin, tzꞌumin ex wiꞌyilxix, a kyaq kaꞌyin, ntilkꞌaj wen tuꞌn qꞌanpwaq ex tkyaqil wiq abꞌj ntzꞌiltzꞌin wen.
17 Ex te jun paqx ma najjo qꞌinimil lo.
Ex tkyaqiljo nejinel toj bark, exqetziꞌn xjal, a iqintaq kyuꞌn, ex jniꞌ nchi aqꞌnin toj, ex kykyaqiljo nchi kanbꞌin tibꞌaj ttxuyil aꞌ, kchi kyjel ten najchaq. 18 Ex aj t-xi kykaꞌyin tsbꞌeljo qꞌaqꞌ te yuchꞌbꞌil tiꞌjjo tnam, kxel kyẍchꞌiꞌn: ¿Ma attaqtzin juntl tnam attaq tzeꞌnku a nim tnam lo? 19 Ex jax kychtoꞌn quq tibꞌaj kywiꞌ te jun yekꞌbꞌil tiꞌjjo labꞌil, ex nchi oqꞌ, ex nchi jaw ẍchꞌin:
Ay, bꞌisbꞌajil tejo nim tnam. Tuꞌn nim tqꞌinimila, ma chi qꞌinimix tkyaqiljo a attaq kybark toj ttxuyil aꞌ.
Ex noq toj jun paqx, ma kubꞌ yuchꞌj te jun majx.✡Ez. 27:25-26.
20 Me chi tzalajxa tiꞌjjo yuchꞌbꞌil tiꞌjjo tnam lo, ayiꞌy toj kyaꞌj: Ayiꞌy nimil, ex ayiꞌy tsanjil Jesús, ex jniꞌ yolil Tyol Dios.
Quꞌn ma kawin Dios kyibꞌajjo xjal toj tnam lo, te t-xeljo tkyaqil otaq kubꞌ kybꞌinchin kyiꞌja.✡Jer. 51:48.
21 Ex tzaj jun angel nim tipin, ex ja tiꞌn jun ma tij abꞌj, tzeꞌnku jun abꞌj te chebꞌl triy, ex jun paqx xi t-xoꞌn toj ttxuyil aꞌ, ex tqꞌma te tnam:
Ex ikytzin kxela xoyiteꞌ tzma kumnix, ay tnam Babilonia, ex knajila te jun majx.✡Jer. 51:63-64; Ez. 26:21.
22 Ex nlayxla bꞌijte toja, ajo chnabꞌ arpa, ex xux, ex chun,✡Ez. 26:13. nixpe alkye jun aqꞌnil.
Ex nlayxla bꞌijte tqꞌajqꞌojil abꞌj chebꞌl triy.
23 Ex nlayxla kꞌantl tzaj toja.
Ex mix jtojx tuꞌn tbꞌijte chnabꞌ te mejebꞌlin,✡Jer. 25:10.
exla qa aye kꞌayil toja, i ok te nmaq xjal te twutz txꞌotxꞌ.
Quꞌn noq tuꞌnjo tyuẍbꞌiꞌn, i kubꞌ tsbꞌuꞌnejiy tkyaqilxjal twutz txꞌotxꞌ.
24 Quꞌn tojjo tnam lo ma knetjo kychkyꞌeljo yolil Tyol Dios, junx kyukꞌa jniꞌ nimil, ex kykyaqiljo i kubꞌ bꞌyoꞌn twutz tkyaqil twutz txꞌotxꞌ.✡Jer. 51:49.