19
1 Tbꞌajlinxiꞌ ikyjo, xi nbꞌiꞌn jun tqꞌajqꞌojil nyakuj tqꞌajqꞌojil twiꞌ nimku xjal toj kyaꞌj. Nkyqꞌmaꞌn:
¡Aleluya! Nimxitjo tbꞌi qMan Dios; ajo kolbꞌil, ex tqoptzꞌajiyil ex nimxix tipin, quꞌn teqe te qMan Diosjo.
2 Quꞌn nkawin jikyinxix wen ex twutzxix.
Quꞌn ma kawin kujxix wen tibꞌajjo qya, a kyꞌaꞌjil, quꞌn ma chi najxjal tuꞌn, tuꞌnjo tkyꞌaꞌjbꞌin ex tkyaqil wiq il kubꞌ tbꞌinchin kyukꞌa.
Ma tzaj tqꞌoꞌn Dios t-xel tejo qya, tuꞌnjo otaq chi kubꞌ tbꞌyoꞌn aye taqꞌnil, noq tuꞌn tpajjo Tbꞌanil Tqanil.✡Deu. 32:43.
3 Ex jun paqx tzaj kyqꞌmaꞌn juntl majl:
¡Aleluya! Nimxitjo tbꞌi qMan Dios.
Quꞌn bꞌeꞌx xi qꞌoꞌn qya lo toj qꞌaqꞌ te jun majx,
ex ajo tsibꞌil nlayx kubꞌ qen.✡Is. 34:10.
4 Ex ayetziꞌn kyaje toj kaꞌwnaq*Kyaje toj kaꞌwnaq, 24 n-ele. nejinel, exqetziꞌn kyaje ajbꞌil twutz tqꞌuqbꞌil Dios, i kubꞌ mukꞌe tzmax twutz txꞌotxꞌ, ex i kꞌulin twutz Dios, ajo qꞌuqletaq toj tqꞌuqbꞌil. Ex kyqꞌma: Nimxit tbꞌiy. Ikyxitjo. ¡Aleluya!
5 Ex bꞌijte tzmax toj tqꞌuqbꞌil toj kyaꞌj, jun tqꞌajqꞌojil twiꞌ, a ntqꞌmaꞌn:
Kynimsinksa tbꞌi qDios, kykyaqila nchi ajbꞌiꞌn, ex at tchewil Dios kyiꞌja, exla qa nmaq xjal mo minaj.✡Sal. 115:13.
6 Ex xi nbꞌiꞌn nyakuj tqꞌajqꞌojil twiꞌ txqan xjal, mo tzeꞌnku ntinin nim aꞌ, mo tzeꞌnku qꞌankyaq npoqꞌle wen.✡Ez. 1:24. Ex tqꞌma:
¡Aleluya! Ma txi xkye tuꞌn tkawin te jun majx a qAjaw, a qDios nimxix tipin. ¡Nimxitjo tbꞌi!
7 Qo tzalajx, ex qo tzeꞌje, ex qqꞌonx nimbꞌil te.
Quꞌn ma kanin tqꞌijiljo mejebꞌlin te tal Tal rit.
Ex atzin t-xuꞌjil ma bꞌant tten.
8 Ex ma txi qꞌoꞌn ambꞌil te, tuꞌn tok t-xbꞌalin tzꞌumin ex tbꞌanilx wen, a saqxix ex nqoptzꞌaj wen. (Atzin xbꞌalin tzꞌumin ex tbꞌanilx wen, jun techil tiꞌjjo kybꞌinchbꞌin tzꞌaqle kyejo kykyaqil nimil, aye ma tzꞌel kypaꞌn kyibꞌ, tuꞌn kyajbꞌin te Dios.)
9 Ex ajo angel tzaj tqꞌmaꞌn weꞌy: Tzꞌibꞌinkujiy luꞌn: Kyꞌiwlinqexixjo aye ma txi txokle tojjo nintz qꞌij te mejebꞌlin tejo tal Tal rit.✡Mt. 22:2-3.
Ex tzaj tqꞌmaꞌn weꞌy: Ayetzin yol luꞌn twutzxix te Diosqe.
10 Bꞌeꞌx in kubꞌ mejeꞌy t-xe tqan angel, tuꞌn nkꞌulin te. Me tzaj tqꞌmaꞌn weꞌy: Mi kubꞌ tbꞌinchinjiy ikyjo, qalaꞌ kꞌuliꞌn twutz Dios. Quꞌn aqꞌnilqin weꞌ tzeꞌnkuxjo te, junx kyukꞌa termana, aye lipcheqek tiꞌjjo Tbꞌanil Tqanil Jesús. Quꞌn atzin Tbꞌanil Tqanil tiꞌj Jesús, atzin t-xilin kyyoljo tkyaqil nchi yolin tiꞌj tojjo uꞌj lo.
A chejil tibꞌajjo chej sjanin tiꞌj
11 Ex nliꞌy kyaꞌj jqoꞌntaq,✡Ez. 1:1. ex etz anqꞌin jun chej sjanin tiꞌj. Ex atzin nchejin tibꞌaj toktaq tbꞌi Tzꞌaqle ex Twutzxix, quꞌn tukꞌa tumilxix nkawine ex njyone qꞌoj. 12 Ex ayetzin tbꞌaqꞌ twutz nchi tilkꞌaj tzeꞌnku taqꞌ qꞌaqꞌ,✡Dan. 10:6. ex tokxtaq toj twiꞌ nimku yekꞌbꞌil te nmaq kawil. Ex attaq jun tbꞌi tzꞌibꞌink tiꞌj, a mi ojtzqiꞌn kyuꞌnxjal, qalaꞌ oꞌkxtaqte n-el tnikyꞌ te. 13 Ex toktaq jun t-xbꞌalin ukꞌtzin t-xe tqan tukꞌa kychkyꞌeljo tajqꞌoj. Ex atzin tbꞌi chejil lo, atzin Tyol Dios. 14 Ex lipcheqek tiꞌj txqan xoꞌl qꞌaqꞌ te toj kyaꞌj, toktaq kyxbꞌalin tzꞌumin ex tbꞌanilx, sjanin kaꞌyin, ex ntiꞌ chꞌin tzꞌil tiꞌj. Ex iteꞌkxtaq kyibꞌaj chej sjanin kyiꞌj. 15 Ex n-etztaq toj ttzi tnejil chejil jun kxbꞌil tzeꞌnku machet tbꞌanilx tste, tuꞌntzin kykyꞌixsbꞌaj tkyaqil nmaq tnam twutz txꞌotxꞌ tuꞌn. Ex kkawil kujxix kyibꞌaj tukꞌa jun var, a kxbꞌil.✡Sal. 2:9. Ex kꞌwel tyekꞌinxix tyabꞌ twiꞌ Dios, a nimxix tipin, noq tuꞌn tkawin Crist kyiꞌj aj il, tzeꞌnku jun xjal nkubꞌ tyitzꞌoꞌn taꞌl twutz uv tuꞌn tqan.✡Is. 63:3; Jl. 3:13; Tchi. 14:20. 16 Ex tzꞌibꞌinktaq tiꞌj t-xbꞌalin ex tiꞌj tkux a bꞌibꞌaj lo: A Kawil tibꞌaj tkyaqil kawil, ex a tAjaw Tkyaqil tibꞌaj tkyaqil tajaw.
17 Ex jun paqx nliꞌy jun angel waꞌltaq twutz qꞌij. Ex jaw ẍchꞌin kujxix wen kye tkyaqiljo pichꞌ, aye kꞌutzqe, a nchi lipin twutz kyaꞌj. Chiꞌ kyjaluꞌn: Ku kytzaja, ex kychmom kyibꞌa, tuꞌn kyula toj nmaq waꞌn te tkawbꞌil Dios, 18 tuꞌntzintla kywaꞌn kychibꞌjil nmaq kawil, ex jniꞌ nejinel kye xoꞌl qꞌaqꞌ, ex kye ichin nimxix kyipin, ex kychibꞌjil chej kyukꞌaxjo iteꞌkx chejil kyibꞌaj, ex kychibꞌjil tkyaqilxjal, exla qa aqꞌnil mo tajaw aqꞌuntl, mo qa nmaq xjal mo minaj.✡Ez. 39:17-20.
19 Ex nlijiꞌy tkabꞌ ma tij txuk exqetziꞌn nmaq kawil twutz txꞌotxꞌ kyukꞌax tkyaqiljo xoꞌl qꞌaqꞌ otaq bꞌaj kychmoꞌn kyibꞌ, tuꞌn kyqꞌojin tiꞌjjo Crist, a nchejintaq tibꞌaj tchej ex kyiꞌj kykyaqil tukꞌa. 20 Me anteꞌ ma tij txuk bꞌeꞌx xi tzyuꞌn junx tukꞌa a txuk, a yolil nikyꞌj yol, a otaq bꞌant nimku techil toj tbꞌi tkabꞌ txuk, noq tuꞌn kykubꞌ tsbꞌuꞌn txqan xjal, ayeꞌ otaq txi kyqꞌoꞌn kyibꞌ tuꞌn tok kyechil, a techiljo ma tij txuk, ex tuꞌn kykꞌulin twutzjo twutzbꞌiyil. Atzin ma tij txuk tukꞌaxjo txuk nikyꞌil yol, bꞌeꞌx xi xoꞌn itzꞌqe toj ttxuyil qꞌaqꞌ, a nkꞌant tukꞌa tkꞌokꞌjil tzꞌeꞌnaq.✡Tchi. 13:1-18. 21 Ex kykyaqiljo txqantl bꞌeꞌx i kubꞌ bꞌyoꞌn tukꞌa kxbꞌil tbꞌanilx tste, a etz toj ttzi Crist, a nchejintaq tibꞌajjo chej. Ex tkyaqil pichꞌ, ayeꞌ kꞌutzqe, i noj tuꞌn kychibꞌjil kyimnin.