1 Tbꞌajlinxiꞌ ikyjo, nliy jun kyaꞌj akꞌaj ex jun txꞌotxꞌ akꞌaj, quꞌn ajo tnejil kyaꞌj exsin tnejil txꞌotxꞌ otaq chi kubꞌ naj.✡Is. 65:17; 66:22; 2Pe. 3:13. Ex ntiꞌtaqljo ttxuyil aꞌ. 2 Ex nlijiꞌy tnam xjan, a akꞌaj Jerusalén, a tzaj te Dios toj kyaꞌj.✡Tchi. 3:12. Ajo tnam bꞌantnin tten tzeꞌnku jun txin otaq bꞌaj ok t-xbꞌalin, tuꞌn t-xiꞌ tukꞌa tchmil.✡Is. 52:1; 61:10. 3 Ex nbꞌiy jun tqꞌajqꞌojil kujxix tzaj toj qꞌuqbꞌil toj kyaꞌj, ex tqꞌma: A tnajbꞌil Dios ma tzul kyxolxjal jaꞌlin. Knajal kyukꞌa, ex ayetzin xjal kchi okil te Ttanim, ex axte k-okil te kyDiosxjal.✡Ez. 37:27. 4 Ex k-elil tsuꞌn taꞌl kywutz, a jaꞌ ntiꞌl kyimin ex oqꞌil ex labꞌil ex kyixkꞌoj, quꞌn tkyaqilxjo attaq nej ma tzikyꞌ.✡Is. 25:8; 65:19.

5 Tuꞌnpetziꞌn, a qꞌuqletaq toj tqꞌuqbꞌil tzaj tqꞌmaꞌn: ¡Kaꞌyinxa! Tkyaqilx ma tzꞌok te akꞌaj wuꞌn.

Ex ikyxjo tqꞌma: Tzꞌibꞌinkujiy lo, quꞌn ayetzin yol luꞌn, twutzqexix kyeꞌ, ex bꞌaꞌn tuꞌn tok qe kykꞌuꞌja kyiꞌj.

6 Tbꞌajlinxiꞌ ikyjo, tzaj tqꞌmaꞌntl weꞌy: Tkyaqil ma japin bꞌaj wuꞌn. Ayin weꞌ ẍin kubꞌ bꞌinchinte ojtxe, ex kbꞌajil tkyaqil wuꞌn. Ayin weꞌ atxix t-xe tnejil, ex tibꞌaj tkyaqil. Ankye teꞌ atx taj toj tanmin, kxel nqꞌoꞌn nyola te noq kukxjo, tzeꞌnku xlokꞌ aꞌ te chwinqil.✡Is. 55:1. 7 Ankye ma kubꞌ tiꞌj il tuꞌn, at toklin tiꞌj tkyaqiljo at weꞌy, ex kchin okila te tDios, ex k-okil te nkꞌwala.✡2Sa. 7:14; 1Cr. 17:13. 8 Me ankye te at t-xobꞌil tuꞌn t-xi lipe wiꞌja, junx kxele kyukꞌa jniꞌ nya nimil, ex aj ilqe, exqetziꞌn bꞌyol xjal, exqe aj pajil, exqetziꞌn yuẍ, ex ayetziꞌn nchi kꞌulin twutzjo twutzbꞌiyil, ex kykyaqiljo nikyꞌil yol; antza chi xeꞌle toj ttxuyil qꞌaqꞌ, a nkꞌant tukꞌa tkꞌokꞌjil tzꞌeꞌnaq. Atzin qꞌaqꞌ tkabꞌ kyimin te jun majx.

9 Ex nliy jun angel, a attaq kyxoljo wuq angel, ayeꞌ qꞌiꞌntaq wuq laq kyuꞌn, nojninqe kyukꞌa wuq kyꞌixsbꞌajil te bꞌisbꞌajil tyabꞌ twiꞌ Dios. Ex tzaj tqꞌmaꞌn weꞌy: Ku tzaja. Ex kxel nyekꞌinjiꞌy txin tey, a bꞌantnin tten tuꞌn tok meje, a t-xuꞌjiljo tal Tal rit.

10 Ex tzaj tipin Xewbꞌaj Xjan wibꞌaja, ex in xi tiꞌn angel twiꞌ jun ma tij wutz, ex tzaj tyekꞌin weꞌy tnam xjan, a Jerusalén, a tzaj te Dios toj kyaꞌj.✡Ez. 40:1-2. 11 Ajo tnam nqoptzꞌaj tukꞌa tqoptzꞌajiyil Dios, ex atzin kaꞌyin ikyxixjo tzeꞌnku jun tal abꞌj jaspe, wiꞌyilxix wen, at tqoptzꞌajiyil tzeꞌnku kaꞌybꞌil wutzbꞌaj. 12 Ajo tnam attaq jun tiꞌjile bꞌinchink ma tij tweꞌ, ex attaq kabꞌlajaj tjpel, ex tiꞌjjo tjpel, attaq kabꞌlajaj angel, ex tzꞌibꞌinktaqjo kybꞌi, a kybꞌi kabꞌlajaj tyajil Israel. 13 Ex tojjo plaj elnix attaq oxe tjpel, ex jawnix, ex oxe tjpel, ex kumnix, ex oxe, ex oknix, ex oxe.✡Ez. 48:30-34. 14 Ex atzin tiꞌjile bꞌinchink, attaq kabꞌlajaj tqꞌuqil. Ex kyibꞌajjo tqꞌuqil kabꞌlajaj bꞌibꞌaj, aye kybꞌi kabꞌlajaj tsanjiljo Jesús, a tal Tal rit.

15 Atzin a nyolintaq wukꞌiy, qꞌiꞌntaq jun ajlaj tuꞌn te malbꞌil, bꞌinchin tuꞌn qꞌanpwaq, tuꞌn tkubꞌ echitjo tnam, exqetziꞌn tjpel, exsin tiꞌjile bꞌinchink.✡Ez. 40:5. 16 Atzin tnam kyijnin bꞌinchin, junx malbꞌilte kyaje plaj. Ajo angel kubꞌ tmiloꞌnjo tnam tukꞌajo ajlaj, ex teyile junjun plaj, attaq 550 ajlabꞌ tnuqe. Ex ikyxjo tweꞌ, ex twutz, ex toj tẍkyin, junxtaq malbꞌinkye. 17 Ex kubꞌ tmiloꞌn a tiꞌjile bꞌinchink, ex attaq oxe ech tpimil, a tzeꞌnku kymalbꞌilxjal; ataqtzin n-okin tuꞌn angel. 18 Atzin tiꞌjile bꞌinchin tuꞌn abꞌj jaspe, ex atzin tnam bꞌinchin tuꞌn qꞌanpwaq, ikyxix kaꞌyin tzeꞌnku kaꞌybꞌil wutzbꞌaj. Ntiꞌ chꞌin tzꞌil tiꞌj. 19 Ex ayetzin tqꞌuqil tnam attaq nim abꞌj tok tiꞌj, a wiꞌyilxix wen. Atzin tnejil tqꞌuqil attaq jaspe tok tiꞌj, atzin tkabꞌ, tuꞌn zafiro, ex toxin tuꞌn ágata, ex tkyajin esmeralda, 20 ex tjweꞌyin ónice, ex tqaqin tuꞌn cornelina, ex twuqin crisólito, exsin twajxaqiyin berilo, ex tbꞌeljiyin topacio, ex tlajajin crisopraso, ex tjunlajajin jacinto, ex tkabꞌlajajin amatista. 21 Ex ayetziꞌn kabꞌlajaj tjpel, ayetziꞌn kabꞌlajaj perlas, tzeꞌnku a tzajnin toj ttxuyil aꞌ. Ex teyile junjun toktaq junjun perla tiꞌj. Atzin tbꞌeyiljo tnam toj nikyꞌjin, bꞌinchin junx te qꞌanpwaq, a nqoptzꞌaj tzeꞌnku kaꞌybꞌil wutzbꞌaj.✡Is. 54:11-12.

22 Ex mix nlay toj tnam jun ja te naꞌbꞌl Dios, quꞌn ate qAjaw, a Dios nimxix tipin, exsiꞌn tal Tal rit, ayetzin otaq chi okjo te ja te kꞌulbꞌil. 23 Ex anteꞌ tnam ntiꞌ tajbꞌin qꞌij te ex xjaw, tuꞌn kyqopin tibꞌaj, quꞌn ate tqoptzꞌajiyil Dios nqoptzꞌinte. Ex ajo tal Tal rit ma tzꞌok te tspikyꞌemil.✡Is. 60:19. 24 Tkyaqilxjal twutz akꞌaj txꞌotxꞌ kchi tzalajil tojjo tspikyꞌemil tnam, ex tkyaqil nmaq kawil kxel kyqꞌoꞌn jniꞌ kyqꞌinimil toj. 25 Ex aye tjpel, mi chi jpet, quꞌn ntiꞌ qnikyꞌin toj. 26 Ex ayetziꞌn jniꞌ nmaq kawil te tkyaqil twutz txꞌotxꞌ kxel kyqꞌoꞌn kyqꞌinimil ex kyqoptzꞌajiyil antza.✡Is. 60:11. 27 Ex mix jtojx tuꞌn tokx jun nya bꞌaꞌn toj, ex mix aꞌlx jun, tuꞌn tkubꞌ tbꞌinchin jun tiꞌ te txꞌixwejil, mo qa te sbꞌubꞌl;✡Is. 52:1. qalaꞌ oꞌkqex chi okixjo aye, a otaq tzꞌibꞌit kybꞌi toj Uꞌj te Chwinqil te tal Tal rit.