1 Tbꞌajlinxiꞌ ikyjo, tzaj tyekꞌin angel jun nim aꞌ ẍqiyin wen, a aꞌ te chwinqil, a tzajnin tiꞌj tqꞌuqbꞌil Dios ex tiꞌjjo teꞌ tal Tal rit.✡Ez. 47:1; Zac. 14:8. 2 Ex toj nikyꞌjin bꞌe, a at toj nikyꞌjin tnam, n-ajqelin aꞌ toj, ex toj junjun plaj ttzi aꞌ nchꞌiy jun Tze te Chwinqil,✡Gen. 2:9. a ntqꞌoꞌn twutz junjun xjaw, mo kabꞌlajaj maj toj abꞌqꞌe. Ex ayetzin t-xaqjo tze, nchi ajbꞌin te qꞌanbꞌil kye xjal toj tkyaqil twutz txꞌotxꞌ. 3 Atzin jaꞌlin ntiꞌx te aku kubꞌ tjaqꞌ tqanbꞌil Dios.✡Gen. 3:17. A tqꞌuqbꞌil Dios exsin te tal Tal rit kꞌwel ten tojjo tnam lo. Ex ayetzin taqꞌnil kchi kꞌulil te.✡Zac. 14:11. 4 Ex k-okil kykaꞌyin twutz, ex k-okil tqꞌoꞌn tbꞌi tiꞌj kyplaj. 5 Ntiꞌ qnikyꞌin ktenbꞌil antza; ayetziꞌn iteꞌ antza ntiꞌ tajbꞌin tqan tzaj kye. Ex ntiꞌ spikyꞌin te tqan qꞌij, quꞌn ate qAjaw Dios ktzajil qꞌoꞌnte tspikyꞌemil kye.✡Is. 60:19. Ex aye taqꞌnil kchi kawil te jun majx.✡Dan. 7:18.

6 Ajo angel tzaj tqꞌmaꞌn weꞌy: Ayejo yol lo twutzqexix, ex bꞌaꞌn tuꞌn tqe kykꞌuꞌja kyiꞌj. Quꞌn axte Dios, a qAjaw, a xi qꞌoꞌnte tumil kye yolil Tyol ojtxe, xi tsmaꞌn t-angel, noq tuꞌn tyekꞌinte kye taqꞌnil tiꞌ tuꞌn tbꞌaj.

7 ¡Kaꞌyinxa! Chꞌix tuꞌn wula juntl majl, chi Jesús. Kyꞌiwlinqexixjo a nkubꞌ kynimin Tyol Dios, a kyij tzꞌibꞌin tojjo uꞌj lo, a il tiꞌj tuꞌn tjapin bꞌaj.

8 Ayin weꞌ Juan; ma nbꞌiy ex ma nliy tkyaqiljo lo. Ex tej tbꞌaj nbꞌiꞌn ex bꞌaj nkaꞌyiꞌn, ex in kubꞌ mejeꞌy t-xe tqan angel, a otaq tzaj yekꞌinte, tuꞌn nkꞌuliꞌn twutz. 9 Me ante angel tzaj tqꞌmaꞌn weꞌy: Mi kubꞌ tbꞌinchinjiy ikyjo. Quꞌn aqꞌnilqin weꞌ te Dios tzeꞌnku te, ex tzeꞌnqeku termana, a yolil Tyol Dios, ex kykyaqiljo nkubꞌ kynimin a tzꞌibꞌin tojjo uꞌj lo. Qalaꞌ, kꞌuliꞌn twutz Dios.

10 Ex ikyxjo, tzaj tqꞌmaꞌn weꞌy, tuꞌn mi kubꞌ njpunjiy t-xilin Tyol Dios tzꞌibꞌinku tojxjo uꞌj lo, quꞌn tuꞌn chꞌix tjapin bꞌaj tqꞌijil tkyaqiljo twutz txꞌotxꞌ. 11 Tuꞌnpetziꞌn, ankye taj tuꞌn tkubꞌ tbꞌinchin nya wen, exsin kubꞌ tbꞌinchinkuꞌj. Ex ankye taj tuꞌn tkubꞌ tbꞌinchin il, in tkubꞌ tbꞌinchin. Me noqit aku tzaj tnaꞌn, qa il tiꞌj tuꞌn tok toj paꞌbꞌin twutz Dios. Tuꞌnpetziꞌn, ankye teꞌ, ma tzꞌel tpaꞌn tibꞌ, tuꞌn tkubꞌ tbꞌinchin wen, kukx tok tililjo tuꞌn, tuꞌn tbꞌant. Ex anteꞌ tzꞌaqle toj tchwinqil twutz Dios, bꞌaꞌn tuꞌn tok tzꞌaqle toj tkyaqil.✡Dan. 12:10.

12 Quꞌn loqiꞌn chin ul liwey, chi Jesús. Ex ktzajil wiꞌn chojbꞌil, a tuꞌn t-xi nqꞌoꞌn teyile junjun, a tzeꞌnkuxjo ntqanin kybꞌinchbꞌin, qa wen ex qa nya wen.✡Sal. 28:4; Jer. 17:10. 13 Ayin weꞌ ẍin kubꞌ bꞌinchinte ojtxe, ex kbꞌajil tkyaqil wuꞌn. Ayiꞌn intin, ex mibꞌin bꞌaj. Ayin weꞌ atxix te tnejil, ex tibꞌaj tkyaqilch.✡Is. 44:6; 48:12; Tchi. 1:8, 17; 2:8.

14 Kyꞌiwlinqexixjo aye ma txjet toj kyanmin, tzeꞌnku jun xbꞌalin sjanin wen. At kyoklin tiꞌjjo Tze te Chwinqil,✡Gen. 2:9; 3:22. ex tuꞌn kyokx tojjo Tnam te Dios. 15 Me ayetzin kye aj ilqe: Aye yuẍqe, exqetziꞌn jniꞌ kyꞌaꞌjil, exqetziꞌn bꞌyol xjal, ex tkyaqil nchi kꞌulin twutzjo twutzbꞌiyil, ex jniꞌqe sbꞌulqe ntiꞌ kyoklin tiꞌj tkyaqiljo bꞌaꞌn tukꞌa Ttanim Dios.

16 Ex ayin weꞌ Jesús. Ma txi nchqꞌonjiꞌy n-angela, tuꞌn t-xi tchikyꞌbꞌin tkyaqiljo lo te tkyaqil Ntanima. Ayin weꞌ tlokꞌil, a jaꞌ saje David. Ex tzaluꞌn twutz txꞌotxꞌ, antza ẍin tzajiꞌy tiꞌj.✡Is. 11:10; Tchi. 5:5. Ex ayin weꞌ cheꞌw nqoptzꞌaj wen, a nyekꞌinte qa chꞌixtaq ttzaj t-xe kyaꞌj. Ikytziꞌn, chꞌix tul nqꞌijila tuꞌn wula.

17 Tuꞌnpetziꞌn, a Xewbꞌaj Xjan ex ajo Ttanim Dios, a t-xuꞌjiljo tal Tal rit, ntqꞌmaꞌn kye nya nimil: Ku kytzaja nimilch. Ex ajo kxel bꞌinte yol lo, bꞌaꞌn tuꞌn t-xi tqꞌmaꞌn kye nya nimil, tuꞌn kyul nimil. Quꞌn ankye teꞌ at kꞌwaj tiꞌj toj tanmin, i tzaj nimil. Ex qa taj, bꞌaꞌn tuꞌn ttzaj ex tuꞌn tkꞌwan tiꞌjjo aꞌ te chwinqil, a nya loqꞌenaj.✡Is. 49:10; Jn. 4:13-14; Tchi. 21:6.

18 Twutzxix kxel nqꞌmaꞌn kye kykyaqiljo nbꞌin tiꞌjjo Tyol Dios, a tzꞌibꞌin tojjo uꞌj lo, qa at jun s-ok tzꞌaqtzin teꞌ jun yol tibꞌajjo lo, kxel nqꞌmaꞌn qa kxel ttzꞌaqtzin Dios tkyaqil kyꞌixsbꞌajil tibꞌaj, a kubꞌ tzꞌibꞌin tojjo uꞌj lo. 19 Ex qa at jun s-el qꞌinte jun tiꞌ tojjo Tyol Dios tojjo uꞌj lo, k-elil tiꞌn Diosjo toklin tiꞌjjo Tze te Chwinqil,*Toj junjun Tuꞌjil Tyol Dios ntqꞌmaꞌn nya tiꞌj Tze te Chwinqil, qalaꞌ tiꞌj Uꞌj te Chwinqil. ex tiꞌjjo xjan Tnam, a o kubꞌ tzꞌibꞌit tojjo uꞌj lo.✡Deu. 4:2; 12:32; 2Pe. 1:19-21.

20 Ayin weꞌ Jesús, a nxi nqꞌmaꞌn tkyaqiljo lo. Chin ula liweych.

Ikyxitjo qAjaw. Liwey tzaja tzaluꞌn twutz txꞌotxꞌ.

21 Noqit a qAjaw Jesús tzaj qꞌonte t-xtalbꞌil kyibꞌaja, a ayiꞌy Ttanim Dios. Ikyxitjo.