1 Piru ǥuntaan iyan heini egkeǥiyen te Nengazen, he midlimbag kenikew, He Israel: “Kenè ka mahandek su edlibriyen ku sikew, ngazan nu is in-umew ku kenikew, ne ǥaked ku sikew. 2 Emun ebayè ka ziyà te wahig, ne eduma a kenikew. Emun edlayun ka ziyà te zezekelà he menge wahig he edtudà ne kenè ka egkelened. Emun ebayè ka ziyà te hapuy, ne kenè ka egketutung; is regreg kayi ne kenà ebpekemenu kenikew. 3 Su iyan a, is Nengazen Megbevayè nu, he Waǥas he Megbevayà te Israel, ne iyan a menluluwas nu. Ibeǥey ku ziyà te zuma he nasyun is Ehipto, Etiopia wey Seba he ilis kenikew. 4 Ibeǥey ku is duma he menge etew ilis kenikew, tenged te mevali wey dungganen is ked-isipa ku kenikew, wey tenged te minahal ku sikew. 5 Kenè ka mahandek su zuma a kenikew. Edtiǥumen ku is menge kevuwazan nu puun te edsilaan wey edsenlepan. 6 Egkaǥi a ziyà te menge nasyun he ziyà te zizaya wey zivavà te vey-ani zan en is menge kevuwazan nu he edlikù diyà te tanè dan, ne ibpeulì en sikandan puun te meziyù he menge lugar. 7 Iyan sikandan menge etew he midtawag ku; midlimbag ku sikandan para meveǥayi a te zengeg.”

8 Migkaǥi zaan is Nengazen te, “Umawa is menge etew ku he zuen dan menge mata piru kenè dan ebpekaahà, duen dan menge telinga piru kenè dan ebpekezineg! 9 Sevahaa te kedtiǥum is langun he menge etew ziyà te nasyun. Hentei te menge ed-ezapen dan is ebpeketagnà te egkengehitavù te huziyan he timpu? Hentei kandan is nekepezayag dengan te nengehitavù guntaan? Ipezuma sikandan te menge tistiǥus he hustu is nekaǥi zan su para mezineg heini te zuma ne ebpekekaǥi zan te tutuu iyan. 10 Sikiyu is menge etew ziyà te Israel, iyan kew menge tistiǥus ku. Mibpilì ku sikiyu he menge suluǥuen ku wey a keniyu mekilala, ne edtuu kew kedì ne egkesavut niw he iyan e zà Megbevayà. Ne wazè en duma he Megbevayà he nehuna kedì etawa ebpeketinundug kedì. 11 Iyan e zà Nengazen, ne ǥawas kedì wazè en duma pa he Menluluwas. 12 Iyan e zà midtagnà he egkelibri kew, ne midtuman ku heini. Wazà duma he ed-ezapen he mibaal kayi ziyà te keniyu; iyan kew menge tistiǥus ku.”

Migkaǥi pa is Nengazen te, “Iyan a Megbevayà. 13 Puun pe zengan iyan e en Megbevayà. Wazà ebpekelingkawas puun te ǥehem ku. Wazà ebpekehimu he edhalin te menge vaal ku.”

14 Iyan heini egkeǥiyen te Nengazen, he menluluwas niw, he Waǥas he Megbevayà te Israel, “Para melibri kew, ibpesurung ku is Babilonia te menge sundaru te sevaha he nasyun, ne ebpemelaǥuy is menge tig-Babilonia ziyà te menge varku he ibpahambug dan. 15 Iyan a, is Nengazen, he Waǥas he Megbevayè niw, iyan a mibaal te Israel, iyan a hadì niw. 16 Iyan a, kes Nengazen he mibaal te veyeey ziyà te teliwazà te zaǥat. 17 Midtiǥum ku is menge kerwahi, menge kudà, wey menge sundaru te Ehipto, ne midezeetan sikandan diyà te zaǥat, ne kenè en sikandan ebpekeenew. Neiring sikandan te sulù he neevukan. 18 Piru kenè niw en siguduwi isipa is midlavey en, 19 su beǥu en is menge ebeelan ku. Ne neveelan en heini, wazè niw ve maahà? Ebaal a te zalan wey menge teheb diyà te disirtu. 20 Minsan is leew he menge langgam ebeǥey kedì te zengeg, ragkes is leew he menge asu wey is menge ekang, su mibeǥey a te menge teheb diyà te disirtu su para zuen meinum te menge etew he pinilì ku. 21 Iyan heini menge etew he midlimbag ku su para mehimu he kediey, wey para deliǥa e zan.

22 “Piru wazè ka mebuyù te tavang kayi te kediey, Israel, su midsemu ke en kediey. 23 Wazà a kenikew pemuhata te menge kerehidu he pemuhat he edtutungen. Wazà a kenikew beǥayi te zengeg pinaaǥi te menge pemuhat su wazè ku man sikew lisliseza wey ka bungasa pinaaǥi te kebuyù diyà te kenikew te menge pemuhat he para gasa wey menge veyewà. 24 Wazà a kenikew pemesahi te veyewà etawa wazà a kenikew pezaa te tavà te menge pemuhat nu. Piru mibpeveǥatan a hinuun kenikew wey midsamuk nu te menge salè nu.

25 “Iyan a mismu mid-awà te menge salè nu su para meveǥayi a te zengeg, ne kenè ku en heini edtentenuzan. 26 Ed-isipen ta is nenlavey en; ne edhusey ki. Ipahayag nu is ketezengan nu te kepengintutuu he wazè nu salà. 27 Nekesalà is nehuna he kepuun nu, wey midsupak kedì is menge pengulu nu. 28 Umbe mibpeel-elezan ku is menge memumuhat nu ne mibpezèdeetan ku sikew, Israel, wey mibpeel-elezan.