1 “Piru ǥuntaan, pemineg ka, Israel is suluǥuen ku, kes menge etew he mibpilì ku, he menge kevuwazan ni Jacob. 2 Iyan a Nengazen, iyan a midlimbag kenikew wey midtavang kenikew. Kenè ka mahandek, is suluǥuen ku wey pinilì ku he menge etew. 3 Su ebeǥayan ku sikew te wahig he ebpekevawì te kegkemezahi nu wey edhames te memaza he tanè nu. Ebpeulinan ku te Mulin-ulin ku is menge kevuwazan nu wey edtuvazan ku sikandan. 4 Ed-uswag dan iring te merapung he menge sagbet diyà te wehiǥen etawa menge kayu ziyà te veyvey te dezeisey he menge wahig. 5 Duen egkaǥi te, ‘Gaked a te Nengazen,’ ne is duma egkaǥi te, ‘Kevuwazan a ni Jacob.’ Duen daan idsurat dan diyà te menge velad dan is ngazan te Nengazen, ne ed-isipen dan is keugelingen dan he ragkes sikandan te menge Israilihanen.

6 “Iyan heini egkeǥiyen te Nengazen, kes hadì wey Menluluwas te Israel, he Mekeǥeǥehem he Nengazen: Iyan a kes nehuna wey egkepengkusan te langun. Wazè en duma he Megbevayà gawas kediey. 7 Hentei is iring kediey? Ipekaǥi sikandin diyà te etuvangan ku ke hengkey is nehitavù puun te kedhimuwa ku te menge etew ku he sevaha he nasyun dutun te nehuna he timpu. Ne keǥiya zin daan ke hengkey is egkehitavù keuzemà. 8 Kenè kew mahandek wey kulbai. Kenè be impezayag ku en keniyu zengan is menge tuyù ku keniyu? Ne iyan kew mismu menge tistiǥus ku is menge Israilihanen. Duen pe be selakew en he Megbevayà gawas kedì? Wazè en! Wazè en netuenan ku he endilungà he vatu gawas kediey.” 9 Wazà pulus te langun he ebaal te menge ed-ezapen. Heini is menge ed-ezapen he mid-isip dan he mahal ne wazè din bali. Iyan mismu sikandan ebpekepengintutuu he wazà kayi vali. Su kenà heini ebpekaahà wey wazà netuenan din. Umbe và dà egkepeel-elezi is ed-azap kayi. 10 Tulebung is etew he ebaal te menge ed-ezapen su kenè man heini ebpulus diyà te kandin. 11 Pemineg kew! Egkepeel-elezan is langun he ed-azap te zuma he menge ed-ezapen, su is mibaal kayi menge etew zà daan. Ipetiǥum sikandan is langun para mepengelangi zan is keugelingen dan, ne egkahandek dan su egkepeel-elezan dan.

12 Is pandey te vulawan etawa pelata idsavuk din haazà diyà te vaǥa. Ne ebpendesdesenan din heini te ebmasu su para mepurma he ledawan he ed-ezapen. Edluhayan sikandin tenged te kegkevitil wey henduen be te egkevidtawan en tenged te kegkemezahi zin. 13 Is pandey te kayu edsukuzen din is sengetamped he kayu. Edtuusan din heini ne ebpurmahan din he etew pinaaǥi te menge himan din ne ebeelan din heini te mekempet he zagwey te etew ne ibpelastar zin diyà te simbahan. 14 Ne para zuen kayu he egkeǥamit din te kebaal kayi, edtamped sikandin te kayu he sidru, etawa ulayan he ibpetuvù din diyà te ketelunan. Ebpemula zaan sikandin te kayu he pinu, ne pinaaǥi te uzan edtuvù heini. 15 Ne egemiten din is duma he menge kayu he para te idtavun din, su wey sikandin mekehizazang, ne wey zaan mekehilutù te supas. Ne is duma zutun ebeelan din he ed-ezapen, ne edluhuzan din heini wey ed-ezapen. 16 Idtavun din is duma he menge kayu su wey sikandin meketuug te usa diyà te vaǥa kayi. Ne egkeenen din haazà is tinuug ne egkahantey sikandin. Edhizazang daan sikandin dutun te hapuy, ne ke sikandin te, “Meupiya su neinitan a.” 17 Ne is duma he menge kayu ebeelan din he ed-ezapen. Edluhuzan din wey ed-ezapen din heini he ed-ezapen, ne ebpengemuyù sikandin dutun he egkaǥi te, “Libriya a, su iyan ka megbevayè ku.”

18 Heini he menge etew wazà mesayud wey wazà mekesavut te ebeelan dan. Nesebpengan is menge mata zan umbe kenà sikandan ebpekaahà. Nesirahan is menge isip dan umbe kenè dan ebpekesavut. 19 Wazè en kandan ebpurung ed-isip-isip wey zin meisip te, “Intavun ku is duma zuen te menge kayu, ne midhilutù a te supas, ne midtuug a te usa diyà te vaǥa kayi, ne migkaan a. Ne ǥuntaan ebeelan ku ve he utew mezaat he vutang is nesamà he kayu? Ed-ezapen ku ve is sevaha he tamped te kayu?”

20 Iring dà sikandin te migkaan te avu. Is nerusireman he isip din iyan midtazin kandin, ne kenè din egkelibri is keugelingen din. Kenè din egkezawat he haazà is ed-ezapen he migewezan din ne kenà tutuu he megbevayà.

21 Migkaǥi is Nengazen te, “He Israel, tentenuzi nu heini, su suluǥuen ku sikew. Midlimbag ku sikew su wey a kenikew mesilbiyi, ne kenè ku sikew egkelipatan. 22 Id-awè ku en is menge salè nu iring te kivel etawa gapun. He Israel, likù ka kayi te kedì, su edlibriyen ku sikew.”

23 Megkanta tenged te kegkelipey, is langit! Habet ka pengulahì, is kelibutan! Kanta kew is menge vuvungan wey menge kayu ziyà te ketelunan, su ebeelan heini te Nengazen. Edlibriyen din is menge kevuwazan ni Jacob; ibpeehè din diyà te Israel is kegkemekeǥeǥehem din.

24 Iyan heini egkeǥiyen te Nengazen he Menluluwas niw, he midlimbag keniyu: Iyan a Nengazen he mibaal te langun he menge vutang. Iyan e zà midempas te langit wey mibaal te kelibutan. 25 Wazè ku mehimuwa he metuman is menge tagnà te teruen he menge ebpeneuven. Ne edhimuwen ku he menge tulebung is menge menenagnà. Edhimuwen ku he kenà medselir is ketau te menge uluwanen, wey edhimuwen ku he kenà ebpulus is netuenan dan. 26 Edtumanen ku is menge tagnà te suluǥuen ku wey menunudtulà. Migkaǥi a he egkeumanan egkeubpai is Jerusalem, ne ed-umanan ebenguna is menge inged diyà te Juda he nengevengkag. 27 Emun edsuǥuen ku is wahig he edtudà he mebpekemaza ne egkemezahan heini. 28 Migkeǥiyan ku si Cyrus te, “Iyan ka ed-elima te menge etew ku, ne veeli nu is langun he egkesuatan ku. Ne suǥù ka he ed-umanan ebenguna is Jerusalem wey is baley kayi.”