1 Ne migkeǥiyan en maan te Nengazen si Jonas te, 2 “Hendiyè kad human te zekelà he inged he Nineve, ne isangyew nu sikan is migkaǥi ku ziyà te kenikew.” 3 Ne human mebpezumazuma si Jonas, ne midhendiyà sikandin te Nineve. Ne is Nineve utew zekelà he inged; tetelu he andew is kedhipenawa zutun ne human ta egkepangkus.

4 Ne mibpuun medseled si Jonas dutun te inged, ne zutun te kebpuun din senga andew is kedhipanew zin. Midweliyan din is menge etew ziyà te Nineve he ke sikandin te, “40 dà he andew is keluǥayad ne edlimasen kew en te Megbevayà sumalà is migkaǥi zin kayi te kediey!”

5 Ne tenged dutun midtuu te Megbevayà is menge tig-Nineve. Mibpuasa sikandan, ne is langun kandan, dekelà se zeisey is pid-etawan din, ne mibivisti te saku wey mibpuasa he tuus te ed-engkezan dan en is mezaat he menge ulaula zan. 6 Ne hein netudtulan is hadì dan dutun te inged, ne mid-awè sikandin diyà te pinuuwè din te kedhadì. In-awè din is samput din te kedhadì, ne mibivisti sikandin te saku wey ziyà sikandin mebpinuu te avu. 7 Ne midhimu zutun te hadì is suǥù he edhenduen te, “Iyan suǥù te hadì wey te menge upisyal zin is: Kinahanglan he kenè dèpa megkaan wey med-inum is minsan hentei he nesakup dutun te ginhedian, wey kenè daan dèpa ibpekaan wey ibpeinum is langun he menge vaka, kerehidu, etawa kambing. 8 Is langun kinahanglan he mebivisti te saku, wey kinahanglan daan he ebelhenan te saku is menge uyaǥen. Kinahanglan he med-ampù diyà te Megbevayà is uman sevaha te ked-ampù he utew hustu. Ne kinahanglan daan he engkezi te uman sevaha is mezaat he menge ulaula wey kebpendaagdaag. 9 Su kela ke maawè ded is pauk te Megbevayà kenitew. Kela ke meilisi zed is pauk din te hizu ne kenè kiw zed egkengeǥerà.”

10 Ne hein naahà te Megbevayà is mid-ulaula zan he iyan is ked-engkezi zan te mezaat he menge ulaula, nehizuwan din sikandan ne wazè din sikandan leusi te edlimas.