1 Piru wazà mesuat si Jonas, kekenà, utew sikandin neepes. 2 Ne mid-ampù sikandin diyà te Nengazen he ke sikandin te, “Nengazen, heini is kebpeseyluwa nu te menge tig-Nineve, ne zaan ku en he netueni zutun te aney he kedsuǥua nu kedì, umbe migaanggaan a mebpelaǥuy pehendiyà te Tarshish. Su netuenan ku he veliǥeǥawen ka wey hihizuwen he Megbevayà. Ne mepelevayen wey nepenù te hizu wey andam he kenà edlaus edsilut te menge etew he ed-iniyug te mezaat. 3 Ne ǥuntaan, deyzey ke edhimetayan ad kenikew, su meupiya pa ke ebpatey a kenà te uuyag a.” 4 Ne midtavak is Nengazen. Ke sikandin te, “Kenè ka engayan he egkepauk tenged kayi te mid-ulaula ku.”

5 Ne zutun midhipanew si Jonas pehendiyà te zapit te edsilaan dutun te inged he Nineve. Ne hein nekeuma zutun, midlelawig sikandin, ne zutun sikandin mebpimpinuu is edhelung. Su ebpeseseǥazen din ke hengkey is egkeulaula zutun te inged. 6 Ne mibpengelinteuwan te Nengazen he Megbevayà, he medtuvù dutun te uvey ni Jonas is tevayag he segugunà ebpenguyabpat su wey melembungi si Jonas. Ne haazà neketavang ki Jonas ne utew sikandin nelipey. 7 Iyan, te egkeriwaswas dutun te sunud he andew, duen tetaru he impeketket te Nengazen dutun te tevayag su wey meǥangu haazà.

8 Ne hein midsilè en is andew ne impepengeramag te Nengazen te meinit he keramag he ebpuun te edsilaan. Ne midluyahan si Jonas tenged te keinit te andew. Ne egkesuat en sikandin he ebpatey, ne ke sikandin te, “Meupiya pa ke ebpatey ad kenà te uuyag a.” 9 Iyan, migkaǥi is Megbevayà diyà te ki Jonas te, “Dait be he igkepauk nu is kegkeǥangu keniyan te tevayag?” Ne midtavak si Jonas te, “Uya, dait iyan he egkepauk a. Umbe meupiya pa ke ebpatey ad nasì.” 10 Ne migkaǥi is Nengazen te, “Heeyan is tevayag he midtuvù wey nenguyabpat seled te sengekezukileman dà, ne neǥangu te kegkesunud he andew ne wazà kenikew he vaal zutun, kenè ka iyan mibpetuvù duen, iyan, minsan pa zutun egkenuǥunan nu ǥihapun. 11 Ne iyan e pa kenà mehizu te Nineve, keniyan te inged he zuen duen subra he 120,000 he menge etew he wazè dan hanew zuen te kesuǥuan ku, ne zuen pa mahabet he menge uyaǥen?”