Sam Kranzpnu-li-nrade-esz' (21)
Nzglqlz-ngrbz Nzaovxiokr Yawe
Nabz ne Devet.
King Devet Glqlzle Gct
Yawe, ninge king nem x abrtz-zlwzx murde nzrka-krme bange zmatq.
Bilvzx nzaovxio-krbzme enqmi rngeng.
Da amrlx kcng tqsuti drtwrnge, tqrlxtibo.
X sc tqkatimeng x alebzmeng amrlx.
Vzpeme bange mz nzrka-krme da kxmrlzting.
X alaome mz narnge kraon kx ngi gol.
Rlxtibo nzlungr bam,
X kapeme bange nzlungr lc tqboi.
Leplz kxkqlu nzxlrlr nrpa ngr drtqnge, murde okatr-zvzq ninge.
X nzamatqlr ninge, murde armyalzq ninge mz nzngini-krnge King.
Da kxmrlz kcng tqkatimeng bange, sa nayc-alomqng bange.
X abrtz-zvz-ngrne nzmnc-krme bange.
Yawe kc tqrninr, ninge king nem x abrtrpo drtwrnge bam,
Murde namnc-zpwxx mz nzaodu-krm kc tqyc tqyc.
Leplz Nzglqlzlr Gct
Yawe, aovxio-zvzq enqmi rmqng,
X lolvztiq krkcng amrlx tzpxtxpx-ngrdr nim.
X mz nzlolvzti-krm lc nidr, odatiq nidr, apule nyr kc tqangcle nrlc.
Yawe, milxtxo-zvzq nidr x ayrkrtxtrq nidr mz nyr.
10 Trpnzngr kx rlapx mz nqvi lrdr,
Murde nibqtiqng amrlx.
11 Mz nzyrlq-krdr drtwr ngr nzota-krmu badr mz vea,
Trna-angidalru drtwr lc tzyrlqlr.
12 Murde nzdwaszlr nim
Mz nzpnz-krm nidr mz nipna scmqng.
Leplz Amrlx
13 Yawe, glqlz-ngrgr nim nzxplr-esz'ngr-krm.
X angrlvzkr nim mz zmatq ngrm.