1 Pa vuahenina vina ṉeta koasa binaṉara te Saerasi pa Pesia, si ta poni nia e Daniela sapu ta pozae Belotesaza si keke dinogodogorae. Sa inavoso tanisa si hinokara meke keke vinaripera nomana hola si guni nia sa. Sa vina bakala koasa inavoso si kamo la koa sa pa keke dinogodogorae.

2 Koari ka ṉeta vuiki si koa kuliusu si arau, Daniela. 3 Lopu hena ginani arileadi si arau; sari beruqu si lopu tiqu la pa masa kurukuru babe pa vaeni; meke lopu lumulumu si arau osolae hola sari ka ṉeta vuiki.

4 Koasa rane vina hiokona made pa sidara kekenu pa vuaheni asa, sipu korapa turu qua pa taqelena sa ovuku lavata pa Taeqarisi d, 5 si doṉo sage si arau meke turu nana pa kenuqu si keke tie sapu pokopoko lineni, sapu va sagea nana pa kopetena si keke belete sapu ta tavetena pa qolo viana.*Rev 1:13-15, 2:18, 19:12 6 Sa tinina si guana patu ṉedala, sa isumatana si guana kapi, sari matana si gua rina zuke huruṉudi, sari limana meke nenena si guana boronizi ṉedalana, meke sa mamalaiṉina si guana mamalaiṉi tadi na kobi tinoni.

7 Arau, Daniela eke mo telequ dogoria sa dinogodogorae; saripu koa turaṉau lopu dogoria si asa, ba kamo va hodaki na minatagutu ke govete meke la tome si arini. 8 Ke koa eke telequ si arau, meke doṉo toto eko ia mo arau sa dinogodogorae variva magasana; loke ṉiniraṉira si koa koa rau, sa isumataqu si iliri guana tie matena meke malohoro va kaleana si arau. 9 Meke avosia rau sa zamana sa, meke sipu va avoso la si arau koa sa, si hoqa gore si arau meke puta, sa isumataqu si tia gore la pa pepeso.

10 Tiqu mae au keke lima si arau meke podalae neneqara sari limaqu meke tuṉutuṉuqu. 11 Zama si asa, “Daniela, agoi sapu arilaemu hola koe Tamasa, avoso va leana mae i sari zinama sapu kote zama atuni arau koa goi, mamu turu sage sina koa goi si ta garunu mae si arau.” Meke sipu zama mae gua si asa koa rau si neneqaraqu meke turu sage si arau.

12 Meke zama pule si asa, “Daniela, mu lopu matagutu. Podalae koasa rane kekenu sapu balabala vekoa goi pude vagi ginilagilana meke va pepekae pule nigo pa Kenuna sa Tamasa, si ta avoso sari mua vinaravara, meke pa inolaṉadi rini si mae si arau. 13 Ba sa mateana kaleana sapu ṉati hiniva nia sa butubutu baṉara pa Pesia si hukatau koari ka hiokona eke rane. Meke mae se Maekolo, keke ri ṉati mateana, meke toka nau, sina arau eke mo si koa vasina pude varipera koasa mateana kopu pa Pesia.*Rev 12:7 14 Ego, mae si arau pude va bakalia koa goi sapu kote ta evaṉa koari mua tinoni pa vugo na repere, sina sa dinogodogorae si pa guguana sa totoso sapu kote mae vugo repere.”

15 Sipu korapa zama mae ni sa mateana si gua hire koa rau, si va todoṉo ia rau sa isumataqu la pa pepeso meke lopu boka zama. 16 Meke qaqama mae si asa sapu doṉo guana tie meke tiqui sa beruqu, meke tukele ia rau sa ṉuzuqu meke podalae zama. Zama si arau koa sa sapu turu pa kenuqu, “Qua baṉara, malohoro nia rau sa dinogodogorae hie, meke lopu boka beto neneqara. 17 Qua baṉara, vea meke kote boka zama si arau, sa mua nabulu, koa goi? Loke qua ṉiniraṉira si arau meke lopu boka siṉo va leana.”

18 Meke tiqu pule au sa sapu doṉo guana tie meke ṉiṉira pule si rau. 19 Zama si asa, “Agoi sa tie sapu arilaemu koe Tamasa, mu lopu matagutu,” gua si asa. “Bule! Mu mataqara. Mu va ṉiṉirae,” gua si asa.

Totoso zama mae gua si asa koa rau si ṉiṉira pule si arau meke zama, “Qua Baṉara, zama mae, sina agoi poni nau sa ṉiniraṉira.”

20 Ke zama si asa, “Tumae nia goi vea ke mae si arau koa goi? Lopu seunae meke kote pule la si arau pude raza ia sa mateana pu kopu nia sa binaṉara pa Pesia, meke pana taloa arau vasina si kote mae sa mateana pu kopu nia sa binaṉara pa Qurisi; 21 ba kekenu si maqu tozi nigo sapu nasa si ta kubere pa korapana sa Buka tanisa Hinokara. Loke tie zuka au si arau koa ri na mateana kopu ba e Maekolo mo, sa mua mateana kopu.