9
Varavara Tokani Daniela sari na Tie Ziu
1 Pa vuaheni kekenu te Dariasi, tuna koreo e Zekisi, sa tie pa Media, sapu tava baṉara koasa butubutu baṉara pa Babiloni, 2 si arau, Daniela, si gilania koasa tinirona sa Kinubekubere Hope sapu zama nia Tamasa koe Zeremaea sa poropita, sapu kote koa ta huara eko mo sa popoa Zerusalema ka zuapa ṉavulu puta vuaheni.*Zer 25:11, 29:10 3 Ke varavara va ṉiṉira la si rau koe Zihova sa Baṉara, tepa sisigiti la koa Sa pa vinaravara, madi pa ginani, meke va sage poko baika meke habotu pa eba si rau. 4 Varavara la si rau koe Zihova sa qua Tamasa meke helahelae:
“Kei Zihova, Agoi sa Tamasa lavata sapu variva magasana, sapu kopu nia sa Mua vinariva egoi pude tataruni sarini pu va tabei sari Mua ginarunu, 5 gami si ele sea meke tavete va kaleana. Ele va karikari atu koa Goi; ele taliri taloa si gami koari na Mua ginarunu meke tinarae. 6 Lopu hite va avoso la si gami koari na Mua nabulu, sari na poropita, sapu zama pa Pozamu koari mami baṉara, mami koburu tavia, sari tamamami, meke koari doduru tiena sa pepeso.
7 Baṉara, Agoi si toṉoto, ba koasa rane hie si nobi gami na kinurekure si gami na tie pa Ziuda meke tiena sa vasileana Zerusalema meke pa doduruna sa butubutu Izireli, ari pa seu na tata, meke koari doduru popoa pu ta hurakatae lani gami Goi sina lopu luli Igo gami si Agoi. 8 Zihova, gami meke sari mami baṉara, mami koburu tavia meke sari tamamami si nobi gami na kinurekure sina ele va sea atu si gami koa Goi. 9 Agoi mami Baṉara mami Tamasa si tataru meke variva taleosae, be vegua va karikari atu gua koa Goi si gami; 10 lopu hite va tabe igo gami si Agoi Zihova mami Tamasa, babe kopuni sari na Mua tinarae sapu va mae i ri Mua nabulu, na poropita. 11 Doduru pa Izireli si ele sekei sari Mua tinarae, meke taliri taloa, korodia va tabe Igo.
Gua ke sari lineveleve meke sari vinilasa ta tokorodi koari na vinari pitui meke ta kuberedi koasa tinarae te Mosese, sa nabulu te Tamasa, si ele ta zoropo vura mae koa gami sina ele va sea atu si gami koa Goi. 12 Ele va gorevura i Agoi sari zinama sapu ta zamani gami meke sari mami baṉara koari na tinasuna nomadi sapu va razani gami Goi. Pa kauruna sa doduruna sa maṉauru si loketoṉa gugua sapu ta tavete la pa Zerusalema si ele ta evaṉa. 13 Gua mo sapu ta kubere pa Tinarae te Mosese, sari doduru vina kilasa si ele kamo koa gami, ba lopu hite taliri tu si gami koari mami sinea meke hata ia sa tataru na tinaleosae te Zihova mami Tamasa meke kopuni sari Mua zinama hinokaradi. 14 Lopu aqa hokara si Agoi Zihova pude va razani gami sari na tinasuna, sina Agoi Zihova mami Tamasa si toṉoto pa doduru tiṉitoṉa sapu taveti Goi; gua ba lopu hite va tabe igo gami si Goi.
15 Kamahire, Tamasa mami Baṉara, Agoi pu turaṉa vurani sari Mua tie pa Izipi koasa Mua ṉiniraṉira meke Agoi pu vata dogoro nia sa Pozamu telemu sapu koa hola kamo pa rane ṉinoroi, gami si ele sea, gami si ele tavete va kaleana. 16 Kei Baṉara, gua sapu taveti Agoi koari doduru Mua tinavete toṉotodi, si Mu va taliri taloa ia sa Mua binugoro meke tinaṉaziri pa Zerusalema, sa Mua vasileana lavata, sa Mua toqere hopena. Sa Zerusalema meke sari Mua tinoni si na vina sisireina kamahire tadi na tie pu koa vari likohaeni gami koa gua koari mami sinea meke sari mami tinavete kaleadi meke tadi na tamamami.
17 Ego, mami Tamasa, Mu avosi sari vinaravara na tinepatepa tanisa Mua nabulu. Pa laemu Goi, Baṉara, si Mu doṉo la pa tataru koasa Mua Zelepade ta huarana. 18 Va taliṉa mae, Tamasa. Mamu va avoso; tukeli Matamu, Mamu dogoria sa tinahuara tanisa vasileana lavata vasina sapu tavahesi sa Pozamu visoroihe. Lopu tepatepa atu si gami koa Goi sina toṉoto mami, ba na koa gua tu koasa Mua tataru variva taleosae. 19 Kei Baṉara, va avoso! Baṉara taleosoni gami! Baṉara va taliṉa mae, Mamu tavetavete! Pa laemu Goi, qua Tamasa, si Mu lopu va sasanae, sina sa Mua vasileana lavata meke Mua tinoni si ta poza nia sa Pozamu.”
Va Bakalia Qebireli sa Kinorokorotae
20 Sipu korapa zamazama si arau meke varavara, helahelae ni sari qua sinea meke gua tugo tadi na tinoni pa Izireli meke tepatepa la koe Zihova sa qua Tamasa pude kuri pulea sa Zelepade pa Zerusalema, 21 si tuturei tapuru kamo mae koa rau se Qebireli, sa tie sapu dogoria rau pa keke qua dinogodogorae visoroihe. Na totoso vukivukihi veluvelu sa totoso asa.*Lk 1:19,26 22 Zama si asa koa rau, “Daniela, mae si arau pude poni igo ginilagilana meke va dodogorae igo. 23 Sipu podalae varavara tugo agoi, si ta poni nia mo goi sa inolaṉa, asa sapu mae nia arau pude tozi nigo, ura na agoi si ta pamaṉaemu hola koe Tamasa. Gua ke mu vilitia sa inavoso, mamu va bakalia sa dinogodogorae:
24 Keke totoso gelena sapu zuapa totoso ka zuapa ṉavulu puta vuaheni si tava ego pude ta leosae sari na sinea meke ta vulasa palae sari kinaleana tadi mua tinoni meke tanisa vasileana pa Zerusalema pude va kamo ia sa tinoṉoto sapu koa hola, pude va gorevura i sari dinogodogorae meke kinorokorotae meke pude va madi ia sa Zelepade Hopena.
25 Mu tumae nia mamu va bakalia si hie: Podalae pa totoso sapu tozi vura nia sa poropita pude kuri pule ia sa popoa Zerusalema, osolae kamo pa totoso sapu mae sa Baṉara ta pozae Mesaea*Sa Baṉara ta pozae Mesaea si ta pozae Karisito koa ri na Kinubekubere Hope Vaqura. Sa Hiburu si zama “asa sapu ta zoropae oela” meke ta vizatana koe Tamasa., si kote pa ka zuapa totoso pa zuapa vuaheni (asa sa made ṉavulu sia vuaheni) meke kote hoda la kamo pa ka onomo ṉavulu rua totoso pa zuapa vuaheni pule, (asa si made gogoto toloṉavulu made vuaheni). Kote kuri pulea rini sa popoa Zerusalema, meke sari na siraṉa pa korapana meke sari na vetu hakehakei ṉiṉiradi, ba kote na totoso tasunadi si arini. 26 Mudina sa onomo ṉavulu rua totoso pa zuapa vuaheni sana, sa Baṉara ta pozae Mesaea si kote tava mate meke kote gua sapu loketoṉa tu kote tagoa si Asa. Sa qeto minate tana keke ṉati baṉara si kote mae huara ia sa vasileana lavata meke sa Zelepade. Sa vina betobeto si kote kamo guana naqe: Na vinaripera si kote nono lamo osolae kamo sa vina betobeto, ura sa tinahuara si ele ta korotaena. 27 Sa baṉara hie si kote tavetia si keke vinariva egoi koari soku tie pa zuapa vuaheni. Pa korapana sa zuapa vuaheni asa si kote va noso pani sa sari na vinukivukihi na vinariponi la koe Tamasa. Meke pa keke vasina ululuna pa Zelepade si kote va turu ia sa si keke beku variva malederena sapu vata kamo tinahuara pa popoa, meke kote koa vasina si asa osolae hokoto sa vina gorevurana sapu ta korotae sapu kote tava kamo la koa sa tie*Sa tie pu va turu ia babe sa vasileana. pu va turu ia sa beku.”*Dan 11:31, 12:11; Mt 24:15; Mk 13:14