Buka Hope Zeremaea 25

Sa Kana Mae gua pa Kali Gede

1 Pa vina made vuahenina sa binaṉara te Zehoiakimi, sa tuna Zosaea sa baṉara pa Ziuda, asa sa vuaheni kekenu tanisa binaṉara te Nebukaneza pa Babiloni, si kamo sa zinama te Zihova koe Zeremaea pa guguadi ri doduru tiena sa popoa Ziuda.* 2 Ke zama i Zeremaea, sa poropita, sari doduru tinoni pa Ziuda meke koari doduru pu koa pa Zerusalema: 3 Ele ka hiokona ṉeta vuaheni kamahire, podalae pa vina manege ṉeta vuahenina sa binaṉara te Zosaea tuna Amoni sa baṉara pa Ziuda kamo pa rane ṉinoroi, si hoke kamo mae koa rau sa zinama te Zihova meke hoke tozi pilipulea rau koa gamu, ba lopu hite va avoso si gamu.

4 Meke garunu pilipule mae ni e Zihova sari Nana nabulu, sari poropita, koa gamu, ba lopu hite va avoso si gamu babe va taliṉa la i. 5 Zama guahe si arini, “Mi kekere kamahire, hopeke gamu, koari mia hahanana kaleadi meke koari na mia tinavete kaleadi, pude mi boka koa koasa pepeso sapu poni gamu e Zihova meke koari tiatamamia ninae rane. 6 Mi lopu luli sari kaiqa votiki tamasa pude nabulu ni meke vahesi; lopu va gevuru Au pude bugoro ni sari na beku pu taveti gamu pa limamia. Pude gua si lopu kote va kilasa gamu Rau,” gua si arini.

7 Zama vura pule se Zihova, “Lopu hite va avoso mae Au gamu si Arau, ba vata ṉaziri Au gamu koari na beku sapu taveti gamu pa limamia, ke va kamoi gamu telemia sari Qua vina kilasa.”

8 Gua ke hiera gua si zama nia e Zihova Tadi na Qeto Minate: “Sina lopu va avosi gamu sari Qua zinama, 9 kote tioko vagi Arau sari doduru tinoni pa kali gede meke sa Qua nabulu se Nebukaneza, sa baṉara pa Babiloni,” zama vura gua se Zihova, “meke kote turaṉa maeni Rau meke raza ia sa popoa hie meke sari tiena meke razai sari doduru butubutu pa vari kalina. Kote huara pani Rau si arini meke tavete guni na tiṉitoṉa variva matagutu meke variva hegere, na tinahuara sapu koa hola ninae rane. 10 Kote va rizu pani Rau koa rini sa mamalaiṉi qetu na hegere meke sa mamalaiṉidi ri na tie varihaba. Kote loke tie si tavete bereti babe va toa zuke veluvelu.* 11 Sa doduruna sa popoa hie si kote ta evaṉae popoa ta huarana, meke doṉo hikare, meke sari butubutu hire si kote koa nabulu koasa baṉara pa Babiloni ka zuapa ṉavulu puta vuaheni.*

12 Ba pana hokoto sari ka zuapa ṉavulu puta vuaheni, si kote va kilasia Rau sa baṉara pa Babiloni meke sa nana butubutu meke sa popoa pa Babiloni, koasa dia sinea, meke va evaṉae nia na popoa ta huarana ninae rane si asa,” zama vura gua se Zihova. 13 “Kote va kamo la nia Rau koasa popoa asa sari doduru tiṉitoṉa pu zama lani Arau koasa, meke doduru pu ta kubere koasa buka hie meke ta korotae koe Zeremaea la koari doduru butubutu. 14 Arini teledia si kote tava pinausu koari soku butubutu na baṉara lavata; kote tubehi Rau sari doduru gua sapu taveti rini pa limadia koari Qua tinoni.”

Pitui Zihova sari na Butubutu

15 Hiera gua si zama nia e Zihova, sa Tamasa pa Izireli koa rau: “Vagia sa kapa pa Limaqu sapu siṉia na vaeni tanisa Qua tinaṉaziri, mamu va napoi sari doduru butubutu pu kote garunu la nigo Rau. 16 Pana napoa rini si kote tedeve si arini meke pekipeki koa gua koasa vedara sapu kote garunu la nia Arau koa rini.”

17 Ke vagia rau sa kapa pa limana e Zihova meke va napoi rau sari doduru butubutu vasina pu garunu lani au Sa: 18 Pa Zerusalema meke sari vasileana pa Ziuda meke sari na dia baṉara, na koimata, pude vata evaṉa ni na tinahuara meke na tiṉitoṉa variva matagutu meke variva hegere meke na lineveleve, gua sapu kamo koa rini kamahire. 19-26 Va napoi tugo rau sari doduru hire:

se Pero, baṉara pa Izipi, nana nabulu, nana koimata meke doduru nana tinoni meke sari doduru tie karovodi vasina;

sari doduru baṉara pa Uzi;

sari doduru baṉara pa Pilisitia koari na vasileana pa Asikeloni, Qaza, Ekoroni, meke sari tie koa holadi pa Asidodi;

sari pa Edomu, Moabi, meke Amoni;

sari doduru baṉara pa Taea meke Saedoni. Va napoi tugo rau sari baṉara pa raratana kali karovo kolo lamana;

sari vasileana pa Dedani, Tema, Buzi meke doduru pa popoa seu;

sari doduru baṉara pa Arebia meke doduru baṉara tadi tie karovodi pu koa pa qega;

sari doduru baṉara pa Zimiri, Elami meke Media;

gua tugo sari doduru baṉara pa kali gede*, seu meke tata, vari luli, doduru binaṉara pa popoa pepeso.

Meke beto ari kasa doduru si kote napo tugo sa baṉara pa Babiloni.

27 Hiera gua si zama nia e Zihova Tadi na Qeto Minate, sa Tamasa pa Izireli: “Mamu tozini: ‘Napoa, mamu viviri meke lua, mamu hoqa meke lopu tekulu pule koa gua koasa vedara sapu kote garunu atu nia Rau koa gamu.’ 28 Ba pude korodia vagia sa kapa pa limamu meke napoa, si tozini, ‘Hiera gua si zama nia e Zihova Tadi na Qeto Minate: Kaqu napoa gamu! 29 Dotu, ele podalae va kamo tinahuara si Arau koasa vasileana lavata, sa vasileana lavata vasina koa sa Qua Zelepade, meke vegua si gamu si lopu kaqu tava kilasa tu? Kaqu tava kilasa si gamu, ura ele tioko gore nia Rau sa vedara pude la koari doduru pu koa koasa popoa pepeso, zama vura gua si Arau Zihova Tadi na Qeto Minate.’

30 Ego, mu kokorotae vurani sari doduru zinama hire koari kasa, mamu tozini si arini sapu guahe:

‘Se Zihova si kote kurumu guana laione mae gua panaulu;

kote lulusu mae gua pa Nana vasina hopena

meke kurumu ṉiṉira la koasa Nana popoa.

Kote kukili si Asa gua ari tie neti va munala qurepi,

meke kote avosia ri doduru pa popoa pepeso.

31 Sa vevehe si kote ta kokodala kamo la pa vina betona sa popoa pepeso,

sina e Zihova si kote turaṉa lani pa vinaripitui sari na butubutu;

kote pitui Sa sari doduru puku tinoni

meke vala ni pa vedara sari na tie kaleadi,’ ”

zama vura gua se Zihova.

32 Hiera gua si zama nia e Zihova Tadi na Qeto Minate:

“Dotu! Na tinasuna si korapa vari luli mae

pa butubutu la pa butubutu;

na raneboṉi nomana si korapa varivarigara

mae gua koari vinabetona sa popoa pepeso.”

33 Koasa totoso asa si sari pu ta seke va mate koe Zihova si kote pa ninae vasina mo, pa keke kalina sa popoa pepeso la pa keke kalina. Lopu kote ta kabo, babe ta veko varigara, babe ta pomunae, ba kote eko lamae mo pa pepeso guana remoremo.

34 Mi kabo na lukalukana, gamu na sepati;

topili pa kavuru, gamu na tie tuturaṉa tadi na sipi.

Ura mia totoso pude tava mate si ele kamo;

kote hoqa si gamu meke ilasa guana raro patu.

35 Sari sepati si kote loke vasina pude govete la,

sari tie tuturaṉa tadi na sipi si lopu kote boka tome.

36 Avosia sa kinabo tadi na sepati,

sa lukalukana tadi tie tuturaṉa koari na sipi,

ura se Zihova si korapa huari sari dia inuma duduli.

37 Sari popoa bulebuledi si kote eko ta huaradi

koa gua koasa tinaṉaziri te Zihova.

38 Guana laione si Asa sapu ta luarae pa Nana kokoana,

meke sari dia popoa si ta huara mo

koasa vedara tadi na kana

meke koasa tinaṉaziri nomana te Zihova.

*25:1 2 Baṉ 24:1; 2 Koron 36:5-7; Dan 1:1-2

*25:10 Zer 7:34, 16:9; Rev 18:22-23

*25:11 2 Koron 36:21; Zer 29:10; Dan 9:2

*25:19-26 Kali gede be tia la pa kali gasa rimata.