1 Mi tataru nia se Zihova sa mia Tamasa, mi va tabei sari doduru Nana tinarae na vina tumatumae. 2 Pa rane ṉinoroi si mi balabala pulei saripu gilani na va nonogai gamu gua sapu dogoro soti gamu koa Sa. Lopu sari na tumia si gilani sari na vina nonoga hire, ba gamu tu. Dogoria gamu sapu na Tamasa Lavata se Zihova. Dogoria gamu sa Nana ṉiniraṉira, sa Nana vina tukana nomana hola, 3 meke sari Nana tinavete variva magasadi. Dogori tugo gamu sari na tinavete pu ele taveti Sa koasa baṉara pa popoa Izipi meke doduruna sa nana popoa lavata. *Ekd 7:8 kamo hinia 12:13 4 Dogoria gamu sapu gua evaṉi Sa koari na tie varipera pa popoa Izipi, sipu hadu luli gamu rini. Sari na dia hose na totopili varipera, si lodu mate beto pa korapa Kolo Ziṉara. *Ekd 14:28 5 Ele gilania gamu sa tinokae sapu tavetia e Zihova koa gamu pa korapa soloso qega, sipu lopu ele kamo tani, 6 meke gua tugo sapu ele taveti Sa koari karua tuna koreo e Eliabi, ari Datani meke e Abirami pa butubutu te Rubeni. Pa kenudia ri doduru tie si viqala rua sa pepeso meke onolo toai si arini, meke sari na dia tamatina, dia ipi, meke sari doduru dia nabulu, na pinausu kurukuru.*Nab 16:31-32 7 Uve, sari doduru ginugua nomadi arini saripu taveti e Zihova si ele dogoro betoi gamu.

8 Mi va tabei sari doduru tinarae saripu va tumatumaeni gamu rau pa rane ṉinoroi, pude boka karovia gamu sa Ovuku Zodani, meke la koa ia sa popoa sapu kaqu nuquru la ia gamu. 9 Meke kaqu koa va seunae hola si gamu koasa popoa masuruna, sapu sokua na ginani na zipale sapu gua ele va tatara nia e Zihova pude ponia koari na tiatamamia meke sari na dia sinage na sage. 10 Sa popoa sapu kaqu la koa ia gamu si lopu kekeṉoṉo gua sa popoa Izipi vasina koa gamu pukerane. Pana hiva lelete gamu vasina, si valavala kolo na tavetavete va ṉiṉira hola si gamu koari na mia inuma, 11 ba sa popoa sapu kaqu la nuquria gamu si na popoa toqetoqere na pezara sapu hoqa ia na ruku mae guana pa maṉauru. 12 Doṉo gore na kopu totoko nia e Zihova sa mia Tamasa sa popoa asa pa doduruna sa vuaheni.

13 Gua asa, ke mi va tabei sari doduru tinarae saripu ponini gamu rau pa rane ṉinoroi, mi tataru nia se Zihova sa mia Tamasa, meke nabulu va hinokara nia pa doduru bulomia.*Liv 26:3-5; Diut 7:12-16, 28:1-14 14 Be tavete gua asa si gamu si kote garunia Sa sa ruku pa mia popoa, pana hiva nia gamu, koari dia totoso garodi, pude kaqu ari gemi huiti, vaeni, meke na oela olive si gamu, 15 meke na duduli tadi mia bulumakao. Doduru totoso si kaqu ari gemi ginani si gamu. 16 Lopu va malumi sari na mia tinoa soti pude ta turaṉa va seu koe Zihova koari na ninabuludi ri kaiqa tamasa kokohadi. 17 Pana evaṉia gamu sapu gua asa, si kote bugoroni gamu e Zihova, meke lopu kaqu va rukua Sa sa popoa, meke lopu kote vua sari linetelete. Beto asa, si lopu kaqu sana mate si gamu vasina koasa pepeso masuruna sapu ponini gamu e Zihova.

18 Mi balabala pulei sari na qua zinama pa korapa bulomia meke maqomaqo mia, kubere goreni, mamu pusini pa limamia guana pizopizo, meke pa raemia pude va balabalani gamu doduru totoso. 19 Mi variva tumatumae ni koari na tumia. Mi vari vivinei ni totoso koa pa mia vetu, babe ene pa siraṉa, totoso magogoso, ba be tavetavete. 20 Mi kubere goreni koari na sasadadi rina barabara pa mia vetu. *Diut 6:6-9 21 Pana gua asa, si kaqu koa va gelenae hola si gamu meke sari na tumia koasa popoa, sapu va tatara nia e Zihova sa mia Tamasa, pude ponia koari na tiatamamia. Kaqu koa va seunae si gamu kekeṉoṉo guana maṉauru si koa panaulu koasa pepeso.

22 Mi kopuni sari doduru tinarae na vina tumatumae saripu ele poni gamu rau: Mi tataru nia se Zihova sa mia Tamasa, mi va tabei sari doduru Nana zinama, mi kalavarae va nabu koa Sa. 23 Be tavete gua asa si gami si kaqu hadu va seui Sa pa Nana ṉiniraṉira sari doduru butubutu pa kenumia, meke kaqu la koa ia gamu sa popoa tadi doduru butubutu lavata saripu ṉiṉira holani gamu si gamu. 24 Doduru pepeso saripu kote neti kamoi gamu si kaqu tamugamu beto. Sa kokoina sa mia kali popoa, si kaqu podalae koasa qega kali la pa Izipi meke kamo la gua koari na toqetoqere Lebanoni, meke retese la gua podalae koasa Ovuku Iuparetisi pa kali gasa rimata meke kamo la gua koasa kolo Meditareniani pa kali lodu rimata.*Zos 1:3-5 25 Koari doduru popoa pu la nuquri gamu, e Zihova sa mia Tamasa, si kaqu va matagutu beto atuni sari na tie koa gamu gua sapu ele va tatara nia Sa, sapu loke tie si kaqu boka hukata gamu si gamu.

26 Mi avoso mae, pa rane ṉinoroi si poni gamu rau sa totoso pude vizatia sa minana babe tinalevei. 27 Kaqu poni gamu rau ṉinoroi sa minana, be va tabei gamu sari na zinama te Zihova sa mia Tamasa. 28 Be lopu va tabei gamu sari na tinarae hire, meke kekere latu pa votiki vinahesidi ri kaiqa tamasa, saripu lopu hite vahesi gamu pukerane, si kaqu ta levei si gamu. 29 Pana va kamo gamu e Zihova koasa popoa sapu kaqu la koa ia gamu, si kaqu la tozi va ululae ni gamu sari na tinamanae koasa toqere Qerizimi, meke sa tinalevei koasa toqere Ebali. *Diut 27:11-14; Zos 8:33-35 30 Gilania gamu sapu sari karua toqere hire, si koa pa kali karovona sa Ovuku Zodani pa kali lodu rimata, vasina koa rina tinoni Kenani. Lopu seu si arini koasa huda hopena pa More sa vasina hopena, meke koa si arini koasa pezarana sapu lopu seu pa Qiliqali. 31 Lopu seunae meke kaqu la karovia gamu sa Ovuku Zodani, meke kaqu la koa ia gamu sa popoa, sapu kaqu ponini gamu e Zihova sa mia Tamasa. Pana vagia gamu meke koa vasina si gamu, 32 si mi va balau, mi va tabei sari doduru tinarae na vina tumatumae saripu ponini gamu rau pa rane ṉinoroi.