1 Mosese meke sari na koimata pa Izireli si zama koari na tinoni, “Mi va tabei gamu doduru sari na vina tumatumae pu va tumatumaeni gamu rau pa rane ṉinoroi. 2-4 Meke sipu karovia gamu sa Ovuku Zodani, meke ele nuquria gamu sa popoa masuruna sapu sokua na ginani na zipale, sapu va tatara nia e Zihova, sa Tamasa tadi na tiatamamia pukerane; meke sipu ele nuquria gamu sa popoa sapu kaqu ponini gamu e Zihova sa mia Tamasa, si mi varihakehakei ni gamu si kaiqa patu lavata pa toqere Ebali, mamu tiqe va napiti nia palasita; mi kuberi vasina sari doduru tinarae na vina tumatumae hire.*Zos 8:30-32 5 Beto asa, si mamu tavetia keke hope, ba loke aeana si kaqu tavetavete ni gamu pude peqoi sari na patu.*Ekd 20:25 6 Ura sa hope te Zihova sa mia Tamasa, sapu kaqu tavetia gamu, si kaqu tavete nia patu lopu ta peqodi gamu. Vasina si kaqu taveti gamu sari na vina vukivukihi va uququ. 7 Taveti sari na vina vukivukihi hinenahena binaere vasina tugo, meke kaqu henahena qetuqetu si gamu pa kenuna e Zihova sa mia Tamasa. 8  Koari na patu lavata saripu napiti nia gamu sa palasita, si mamu kubere va bakali sari doduru tinarae koasa buka hie te Zihova,” gua si arini. 9 Beto asa si zama se Mosese meke sari na hiama tanisa butubutu Livae koari na tie Izireli, “Gamu doduru tinoni Izireli, mi va avoso mae! Pa rane ṉinoroi si ta evaṉae na tinoni te Zihova sa mia Tamasa si gamu, 10 ke mi va tabea na luli gamu sari na tinarae sapu ta poni koa gamu pa rane ṉinoroi,” gua si arini.

11 Beto asa si zama se Mosese koari na tinoni Izireli, 12 “Sipu karovia gamu sa Ovuku Zodani, sari na tinoni koari na butubutu hire si kaqu turu koasa toqere Qerizimi, meke kaqu zama vurani sari na minana koari na tinoni: Simione, Livae, Ziuda, Isaka, Zosepa meke Benisimane.*Diut 11:29; Zos 8:33-35 13 Sari na butubutu tie hire si kaqu turu koasa toqere Ebali, meke kaqu zama vurani sari na tinalevei koari na tinoni: Rubeni, Qadi, Asa, Zeboloni, Dani, meke Napitalai.

14 Sari na tie Livae si kaqu velavela va ululae ni koari na tie Izireli sari na zinama hire: 15 ‘Kaqu ta levei koe Zihova sa tie sapu tavetia si keke beku patu, huda, babe na qolo na siliva na gua, meke vahesi golomia; ura etulia e Zihova sapu gua asa,’ gua.

Meke kaqu olaṉa sari doduru tie, ‘Emeni!’*Emeni sa ginuana si “Uve gua tugo!”*Ekd 20:4, 34:17; Liv 19:4, 26:1; Diut 4:15-18, 5:8 16 ‘Kaqu ta levei koe Zihova sa tie sapu lopu va lavatia sa tamana meke tinana.’ Meke kaqu olaṉa sari doduru tie, ‘Emeni!’*Ekd 20:12; Diut 5:16 17 ‘Kaqu ta levei koe Zihova sa tie sapu va rizua sa voloso tinago tanisa turaṉana.’ Meke kaqu olaṉa sari doduru tie, ‘Emeni!’ 18 ‘Kaqu ta levei koe Zihova sa tie sapu turaṉa va sea ia pa siraṉa sa tie behuna.’ Meke kaqu olaṉa sari doduru tie, ‘Emeni!’*Liv 19:14 19 ‘Kaqu ta levei koe Zihova sa tie sapu ṉoṉovalia sa tie karovona, na tie eapana na tie nabonabokona koasa nana kinopuna sa tinoṉoto.’ Meke kaqu olaṉa sari doduru tie, ‘Emeni!’*Ekd 22:21, 23:9; Liv 19:33-34; Diut 24:17-18 20 ‘Kaqu ta levei koe Zihova sa tie sapu eko turaṉia sa sa barikaleqe tanisa tamana, ura na va kurekurea sa sa tamana.’ Meke kaqu olaṉa sari doduru tie, ‘Emeni!’*Liv 18:8, 20:11; Diut 22:30 21 ‘Kaqu ta levei koe Zihova sa tie sapu papaia si keke kurukuru made nenena.’ Meke kaqu olaṉa sari doduru tie, ‘Emeni!’*Ekd 22:19; Liv 18:23, 20:15 22 ‘Kaqu ta levei koe Zihova sa tie sapu eko turaṉia sa tasina vineki sapu votiki tinana, babe votiki tamana.’ Meke kaqu olaṉa sari doduru tie, ‘Emeni!’*Liv 18:9, 20:17 23 ‘Kaqu ta levei koe Zihova sa tie sapu eko turaṉia sa tinana hopehopena.’ Meke kaqu olaṉa sari doduru tie, ‘Emeni!’*Liv 18:17, 20:14 24 ‘Kaqu ta levei koe Zihova sa tie sapu va mate golomia sa turaṉana.’ Meke kaqu olaṉa sari doduru tie, ‘Emeni!’ 25 ‘Kaqu ta levei koe Zihova sa tie sapu ade vagia sa poata pude va matea si keke tie sapu loke nana ginugua sea.’ Meke kaqu olaṉa sari doduru tie, ‘Emeni!’ 26 ‘Kaqu ta levei koe Zihova sa tie sapu lopu va tabei babe taveti sari doduru tinarae na vina tumatumae te Zihova.’ Meke kaqu olaṉa sari doduru tie, ‘Emeni!’*Qal 3:10