21
Zobi
1 Olaṉa se Zobi,
2 “Avoso va leana mae koari na qua zinama;
asa sa vina manoto sapu tepa ia rau koa gamu.
3 Va malumau; maqu zama,
meke pana beto zama rau, mamu va sisire nono la.
4 Sa qua ninominomi si lopu koari na tie;
koa nana tu, gua ke soliṉi si rau.
5 Mu doṉo vilitia sa qua ginugua, mamu magasa nia;
kumuhia sa ṉuzumu, mamu hodahodaka.
6 Pana balabala ia rau sapu guahe, si matagutu qua tu;
neneqara tu sa tiniqu.
7 Na vegua sari na tie kaleadi ke toa va gelenae tu,
barogoso gorevura meke bokaboka nono latu?
8 Sari tudia si dogori rini noma sage meke toa va leana,
sari na koburu tadi na tudia ba dogori rini.
9 Koa va leana si arini pa dia vetu, meke lopu matagutu,
sa kolu sekesekeana te Tamasa si lopu raza koa rini.
10 Sari dia bulumakao si lopu makudo hira;
hoke podopodo va leana meke loke tinasuna kamoi.
11 Sari dia koburu si haqala na horu guana lami;
sari tudia hitekedi si peka lamae.
12 Kera turaṉae koari na mike si arini,
meke peka qetuqetu koasa mamalaiṉina sa ivivu.
13 Tiatamadia sapu kaleadi, ba koa va leana na tagotago dia,
meke mate va bulebulei dia.
14 Zama ia rini sa Tamasa, ‘Lopu sosoara gami;
gami lopu emami hiva gilani sari Mua tinarae.’
15 Esei sa Tamasa pu tagoi sari doduru ṉiniraṉira?
Na vea ke kote nabulu nia tu gami?
Na loke lineana kote vagi nia gami pana varavara la ia.
16 Turua rini sapu sa dia tinagotago si vurana pa dia binokaboka soti,
ba arau si koroqu tagoa sa binalabala gua asa.
17 Ba sa zuke*Sa zuke si na tinoa tanisa tie. tanisa tie kaleana si lopu hoke tava mate?
Vegua, hoke kamoi tugo tinasuna sari?
Totoso sa, hite bugoro ni Tamasa sari meke va kilasi?
18 Hoke ta givusu palae tugo sari, guana duduli?
Babe ta paleke taloa guana kavuru pa totoso hiru?
19 Sa vina kilasadi si kote vala Tamasa koari na dia koburu, gua si goi;
ba lokari, leana be va kilasi tugo Sa sarini pu tavete va sea, pude madi gilania;
20 madi dogoria sa tina huara pa matadia soti;
madi va nonoga ia sa tinaṉaziri tanisa Tamasa pu tagoi sari doduru ṉiniraṉira.
21 Lopu kote hiva gilania rini sa si ta evaṉa koari na dia koburu,
ura pa mudidia mate si lopu kote ari dia binalabala.
22 Ba esei boka va tumatumae ia sa Tamasa,
sina sa Tamasa ba pitui mo sari tie arilaedi?
23-24 Keke tie si lopu momoho meke kamo sa totoso mate;
mate va leana pa binule,
noboko meke toa va leana sa tinina.
25 Keke pule si mate pa minalaṉa,
lopu hite va liṉiliṉia sa sa kinoa va leana.
26 Karua arini si ta pomunae beto mo pa kavuru,
meke gani na uloso tinidia.
27 Ele tumae nia tu rau sa mia binalabala,
sapu vegua kote ṉovala guni nau gamu.
28 Kote nanasa si gamu, ‘Avei sa vetu tanisa palabatu lavata kamahire?
Avei sari ipi tadi na tie kaleadi?’
29-30 Na vegua ke lopu hoke nanasi gamu sarini pu ene sage gorea sa siraṉa?
Lopu hoke tozini gamu tu rini sa hinokara?
Sapu pana raza sari tinasuna si lopu hoke kamoi sari tie kaleadi.
31 Loke tie boka la zutui sari tie kaleadi,
babe tavete hobe lani gua sapu evaṉi rini.
32 Totoso ta paleke la rini pa popomunuana,
si na tie kopu tu si koa kopu ni sari lovu.
33 Noma hola sa tokele tie pu la koasa popomunuana,
soku si vata dogoro ni sari dia pinamaṉa,
sa pepeso ba noso meke va kamo valeani sari tinidia.
34 Ke sari mia zinama vina manoto si loke namudi!
Doduru mia vina bakala si kokohadi beto!”