Sa Vina Ṉeta Vinari Vivinei
22
Zobi 22:1 kamo hinia 27:23
Elipazi
1 Meke zama se Elipazi na tie pa vasileana nomana pa Temani,
2 “Sa si boka tavetia sa tie pude toka nia sa Tamasa?
Vegua, boka arilaena koe Tamasa sa tie tumatumaena?*Zob 35:6-8
3 Vea pude na tie toṉoto si agoi, kote boka va qetua goi sa Tamasa pu tagoi sari doduru ṉiniraṉira?
Be na tie leamu si agoi, sa si kote ta tokae nia Tamasa?
4 Vea, na pamaṉa nia goi si Asa, ke zutu igo Sa,
meke turaṉa lani igo Sa pa vinaripitui?
5 Lokari! Na tie kaleamu hola si agoi;
na loke kokoina sa hahanana kaleana tamugoi.
6 Vagi paki poata sari tasimu koa goi,
si vagi pani tu goi dia poko, osolae hobei rini sari dia gale,
meke dododohodi mo meke koa.
7 Saripu memehadi si gina lopu va napoi goi,
meke saripu oviadi si koromu poni ginani.
8 Gina balabala ia goi sapu sa pepeso si dia rina tie ṉiṉiradi,
meke ari na tie bokabokadi mo boka koa ia.
9 Ba koromu poni goi sari nabonaboko, totoso tepa tinokae sarini.
Hiko si goi koari na koburu eapadi, meke hitu pani.
10 Gua ke vari likohae nigo na sipata si goi,
meke matagutu totoso raza va hodaka sari tinasuna.
11 Gua ke lopu boka dodogorae si agoi pa huporo,
meke lodu taloa totoso kamo sa naqe.
12 Ura koa panaulu sa Tamasa, ululu hola pa Maṉauru,
ululu hola ni sari na pinopino saripu nipuludi hola la tu.
13 Ba nanasa si goi, ‘Sa si gilania sa Tamasa?
Na paeria na lei si Asa, ke vea meke kote pitu gita Sa?
14 Opo adumia na lei huporona, ke lopu boka dogoro gita Sa,
hoi tu si Asa, enene Nana panaulu pa maṉauru,’ gua si goi.
15 Vegua, kaqu luli tu goi sari siraṉa pukeranedi,
vasina ene sari na tie kaleadi?
16 Arini si ta paleke taloa, sipu lopu ele kamo dia totoso mate,
guana vetu sapu paleke taloa nia na naqe.
17 Zama si arini koe Tamasa, ‘Veko gami!
Nasa kote boka taveteni gami sa Tamasa pu tagoi sari doduru ṉiniraṉira?’
18 Gua asa, ba va siṉi ni likakalae arilaedi Sa sari dia vetu,
gua ke lopu hiva ni arau sari binalabala gugua arini.
19 Sari tie ṉoṉo si kote qetu pana va kilasi Tamasa sari na tie kaleadi,
meke sari tie toṉoto si kote hegere meke va sisire ni.
20 Doduru pu tagoi ri tie kaleadi si ta huara ilasa,
meke saripu koa hola si kote ta sulu palae pa nika.
21 Ke mu va pepekae la koe Tamasa, pude tagoa goi sa binule,
meke kote mana nigo Sa si agoi.
22 Va avosi sari Nana vina turu,
mamu va naqiti pa bulomu.
23 Pana kekere pule la si goi koasa Tamasa pu tagoi sari doduru ṉiniraṉira,
si kote leamu pule si goi gugua tatasana;
pana va rizu pani goi sari kinaleana pa mua vetu;
24 pana luara pani goi sari mua inokoro poata,
meke gona pani goi sari mua qolo arilaedi pa lolomo popana,
25 si na Tamasa pu tagoi sari doduru ṉiniraṉira telena si kote na mua qolo,
Asa si kote na mua siliva arilaena.
26 Gua meke kote raṉea goi doduru totoso sa Tamasa pu tagoi sari doduru ṉiniraṉira,
meke kote dogoria goi sapu Asa sa mua qinetuqetu,
meke lopu kote kurekure si goi pa kenuna.
27 Kote varavara la si goi koa Sa meke kote olaṉigo Sa,
meke kaqu kopu ni goi sari na mua vina tatara la koa Sa.
28 Kaqu gorevura sari doduru pu hiva taveti goi,
ura na zuke si kote kalalasa koasa siraṉa pa kenumu.
29 Be kamoi na tinasuna sari na tie meke zama si goi, ‘Toka ni,’
si kote harupi sa Tamasa.
30 Sari na tie kaleadi pu kekere,
ba kote harupi mo Sa;
kote ta harupu si arini sina via sari na limamu goi.”