32
Hinelahelae meke na Tinaleosae
(Keke kinera te Devita)
1 Tamanae tugo si asa sapu taleosae sari nana hahanana kaleadi,*Rom 4:7-8
meke tava murimuri koe Zihova sari nana sinea.
2 Tamanae tugo sa tie sapu lopu ta zutu koe Zihova koari nana kinaleadi,
meke loke sinekesekei pa maqomaqona.
3 Sipu tomei rau sari na qua sinea,
si malohoro sa tiniqu pa qua kinabokabo doduru rane.
4 Kei Zihova, rane na boṉi si va kilasau Goi si rau.
Gore taloa sa qua ṉiniraṉira,
guana ṉataṉata sapu vura taloa pa totoso rimata.
5 Ke tiqe helahelae atu ni rau koa Goi sari na qua sinea,
meke lopu tomei rau koa Goi sari na qua tinavete kaleadi.
Vizatia rau si pude helahelae atu ni koa Goi si arini,
meke ele taleoso ni Goi sari doduru qua sinea.
6 Gua asa ke sari na Mua tie madidi
si madi varavara atu koa Goi pa totoso tasuna.
Ke pana be raza mae sa tinasuna pu guana naqe,
ba lopu kamo koarini.
7 Agoi si na qua aqoroana,
kaqu va sare au Goi pa tinasuna.
Kera va ululae nia rau sa Mua tinaharupu,
sina aqoro si rau koa Goi!
8 Zama se Zihova, “Kaqu totoli nigo na va tumatumae nigo Rau sa siraṉa sapu leana pude lulia goi,
kaqu kopu totoko nigo Rau.
9 Mu lopu lulia mua hiniva soti guana hose,
babe na miulu sapu loke nana binalabala,
ba ta totolie mo koa keke iku sapu ta pusie pa ṉuzuna!
Be guana koromu pude luliau si lopu kaqu luli seunae koa Rau si goi.”
10 Sa tie kaleana si kaqu koa ta sigiti,
ba sarini pu kalavarae koe Zihova si kaqu ta kopue pa Nana tataru nabuna.
11 Gamu na tie toṉoto, mi koa qetuqetu koe Zihova.
Mi velavela pa qinetuqetu, gamu doduru tie toṉoto!