1 Ke na sa si kote zama nia gita koasa guguana e Ebarahami, sa tamada gita na tie Ziu? Na sa si boka gilania gita koasa guguana sa nana rinaṉeraṉe koe Tamasa? 2 Be koari na tinavete leadi pu taveti sa si poza nia tie toṉoto Tamasa si asa, si kote boka vahesi pule nia pa nana zinama si asa. Ba lopu kaqu boka vahesi pule nia si asa pa kenuna sa Tamasa. 3 Ura zama guahe sa Kinubekubere Hope: “Raṉea Ebarahami sa Tamasa, meke koasa nana rinaṉeraṉe si poza nia na tie toṉoto Tamasa si asa.”*Zen 15:6; Qal 3:6

4 Totoso tavetavete sa tie koa keke tie si lopu na vinariponi si vagia sa, ba na tinabara tu padana sa tinavete. 5 Ego, sa tie pu lopu kalavarae pa nana tinavete leadi pu taveti sa, ba kalavarae koe Tamasa pu poza nia tie toṉoto Sa sa tie sea pa nana rinaṉeraṉe, si pa nana rinaṉeraṉe mo si vata evaṉae nia tie toṉoto Tamasa sa tie sana. 6 Kekeṉoṉo gua tugo asa sapu zama nia Devita, totoso tozia sa guguana sa tie tamanaena sapu vata evaṉae nia tie toṉoto Tamasa, ba lopu koari nana tinavete leadi pu taveti sa.

9 Vegua sa tinamanae sapu zama nia Devita hie? Tadi na tie Ziu pu ta magudi d mo? Lokari hokara! Tadi pu lopu ta magudi tugo. Ura ele tozia tu rau sapu gua koa pa Kinubekubere Hope: “Raṉea Ebarahami sa Tamasa, meke koasa nana rinaṉeraṉe si poza nia na tie toṉoto Tamasa si asa.” 10 Pa totoso sa, si ta evaṉa sapu gua asa? Pa totoso sipu lopu ele ta magu se Ebarahami, ba pa mudina tu sipu ele ta magu sa? Pa totoso sipu lopu ele ta magu tu sa. 11 Sa minagu si ta evaṉa mumudi mo, ke na vina gilagilana mo sa nana rinaṉeraṉe koe Tamasa si asa. Ele poza nia tie toṉoto tu Tamasa si asa, sipu lopu ele ta magu tu sa. Ke se Ebarahami si guana tamadia ri doduru tie pu raṉea sa Tamasa, meke ta pozae tie toṉoto koa Sa, be vea ta magudi babe lopu ta magudi.*Zen 17:10 12 Meke asa tugo sa tamadia rina tie Ziu pu ta magudi. Ba lopu koasa tinamagudi si ta evaṉae nia tamadia rini se Ebarahami, ba koasa dia tinoa raṉeraṉe tu totoso keha lulia rini sa rinaṉeraṉe te Ebarahami, sapu tagoa sa totoso lopu ele ta magu tu.

13 Lopu koasa vina tabena sa Tinarae te Mosese si vagi nia Ebarahami, meke rina tutina sa vina tatara sapu kaqu tagoa rini sa popoa pepeso. Ba sina raṉea Ebarahami sa Tamasa, ke vagia sa sa tinoṉoto koa Sa.*Zen 17:4-6, 22:17-18; Qal 3:29 14 Ego, be vagia rini sapu gua va tatara nia sa Tamasa, sina va tabea rini sa Tinarae te Mosese, si kote loke guguana sa dia rinaṉeraṉe koe Tamasa, meke sa vina tatara ba kote loke laena tugo.*Qal 3:18 15 Sa Tinarae te Mosese si va mae ia sa binugoro te Tamasa koa rini pu lopu va tabea si Asa, ba vasina sapu loke Tinarae, si loketoṉa tugo sa sineke Tinarae.

16 Gua asa ke koasa rinaṉeraṉe mo si ta vagi sa vina tatara, pude va sosode valeania sapu gua poni moka nia Tamasa koari doduru tie pu tuti lulia se Ebarahami pa rinaṉeraṉe. Ke sa vina tatara hie si lopu tadirini mo pu va tabea sa Tinarae te Mosese, ba tadirini tugo pu raṉea sa Tamasa, kekeṉoṉo gua tugo e Ebarahami. Ura se Ebarahami si na tamada gita doduru pu raṉea sa Tamasa.*Qal 3:7 17 Gua sapu zama nia sa Kinubekubere Hope: “Vata evaṉae nigo Arau na tamadia ri soku butubutu si goi.” Ke sa tamada gita si asa pa kenuna sa Tamasa, sa Tamasa sapu raṉea sa. Asa sa Tamasa sapu va toa puledi ri pu matedi, meke va podakadi sari doduru likakalae saripu lopu ele tava podaka.*Zen 17:5

18 Va hinokaria Ebarahami sa Tamasa, ba pa binalabala tadi na tie si tasuna pude ta evaṉa si asa. Gua asa ke ta evaṉae na tamadia ri soku butubutu si asa. Gua tugo sapu zama nia sa Kinubekubere Hope: “Kaqu soku gua tugo rina pinopino pa maṉauru sari na tudia rina tumu,” gua.*Zen 15:5 19 Koa sa totoso hie si ele tata keke gogoto vuahenina se Ebarahami, ba lopu hite malohoro sa nana rinaṉeraṉe koe Tamasa. Sa tinina si balabala gunia sa sapu tata matena, gua, meke gua tugo se Sera, sapu tige, gua.*Zen 17:17 20 Ba va hinokara sisigitia Ebarahami sa vina tatara te Tamasa, ke ṉiṉira lalanana sa nana rinaṉeraṉe, meke lopu hite nunala si asa, ba vahesia sa sa Tamasa. 21 Tumae valeana nia Ebarahami sapu kote boka va gorevura ia Tamasa sa Nana vina tatara koa sa. 22 Gua asa, ke “Ta pozae na tie toṉoto” koe Tamasa se Ebarahami koasa nana rinaṉeraṉe. 23 Ego, sa zinama sapu, “Ta pozae tie toṉoto si asa,” gua, si lopu ta kubere pa Kinubekubere Hope pude te Ebarahami eke mo, 24 ba pude tadigita tugo si asa. Ura gita ba kaqu pozani gita tie toṉoto tugo Tamasa pa nada rinaṉeraṉe, sina va hinokaria gita si Asa pu va toa pulena sa Baṉara Zisu Karisito pa minate. 25 Mate hobei Zisu Karisito sari nada sinea, meke tava turu pule si Asa pa minate pude tava toṉoto koe Tamasa si gita.*Ais 53:4-5