1 Gua ke, sina pa nada rinaṉeraṉe si tava toṉoto si gita, ke koa bule koe Tamasa si gita, pa korapana Zisu Karisito sa nada Baṉara. 2 Pa korapa nada rinaṉeraṉe koe Karisito si va kamo lani gita Sa koasa Nana tataru variharupi, sapu koa ia gita kamahire. Ke qetuqetu tugo si gita sina gilania gita sapu kote somana tagoa gita sa tinoa marilaena te Tamasa. 3 Lopu asa mo, ba mada qetuqetu tugo koari nada tinasuna. Ura koari nada tinasuna na tinasigiti tugo si kote va nonoga ia gita pude ṉoṉo meke soto va nabu pa rinaṉeraṉe. 4 Meke koasa nada tinuru va ṉoṉo meke va nabu si kote vagia gita sa hahanana sapu qetu nia Tamasa, totoso aqa va ṉoṉo si gita pa Nana vinatatara. 5 Meke totoso aqa va ṉoṉo si gita koasa Nana vina tatara si lopu kaqu hite kurekure si gita, sina ta zoropo vura koe Tamasa sa Nana tataru pa korapa buloda koasa Maqomaqo Hope sapu ele ponini gita Sa.

6 Pa totoso gotona sipu lopu boka harupu puleni gita si gita, si mae mate paeni gita Karisito, pude harupu gita koari nada kinaleana. 7 Tasuna hola si pude mate hobea keke tie si keke tie toṉoto; ba be leana sa tie, si hokara kote hiva mate hobea sa si keke tie. 8 Ba sipu korapa koa tie sea si gita si mate paeni gita Karisito, pude va dogoroni gita Tamasa sa Nana tataru lavata. 9 Gua asa ke gilana valeania gita sapu kaqu harupu puleni gita Zisu Karisito, koasa tinaṉaziri te Tamasa pa totoso varipitui, sina va toṉoto gita Tamasa si gita koasa eharana Sa. 10 Ura sipu korapa kana ia gita sa Tamasa si tavetia Sa sa vinariva bulei koa gita, koasa minate tanisa Tuna pa korosi. Ke koa gua sapu koa bule si gita koe Tamasa kamahire, ke mada tumae valeana nia sapu kaqu ta harupu si gita, sina toana se Karisito. 11 Ba lopu asa mo, mada qetu nia gita sa nada binaere leleana koasa Tamasa, sina ele tavetia Zisu Karisito, sa nada Baṉara, sa vinari bulei.

12 Gua ke, koa gua koasa tinavete tanisa keke tie si kamo sa sinea koasa kasia popoa, meke koasa sinea si kamo sa minate tanisa tie asa, meke sa minate asa si kamo la koari doduru tie, sina sea beto sari doduru tie.*Zen 3:6 13 Ura sipu lopu ele ta poni nia e Mosese koe Tamasa sa Tinarae, si ele koa nana tu sa sinea koasa kasia popoa, ba vasina sapu loketoṉa sa tinarae, si lopu kaqu ta zutu nia rini sa sinekena sa tinarae. 14 Gua, ba podalae koasa totoso te Adama d meke kamoa sa totoso te Mosese, sa minate si kamo la koari doduru tie. Sa minate si kamo la tugo koa rini pu tavete va sea ba lopu sekea rini keke tinarae gugua tavetia e Adama totoso sekea sa sa tinarae sapu avoso sotia sa koe Tamasa.

Ba se Adama si na kinehana mo e Zisu sapu luli mudi mae koa sa. 15 Ba sa tinoṉoto sapu poni moka nia Tamasa pa korapa Zisu Karisito si lopu kekeṉoṉo sa sinea te Adama. Hinokara sapu koa gua koasa sinea te Adama si mate nia ri soku tie; ba sapu arilaena hola si na tataru variharupi te Tamasa koari soku tie. Arini si vagi va sokua totoso pozani “Tie toṉoto” Sa si arini, koa gua koasa tataru variharupi tanisa keke tie sapu e Zisu Karisito. 16 Meke gua pule he: Sa vinariponi te Tamasa si lopu kekeṉoṉo gua sa sinea tanisa keke tie. Ura koasa sinea tanisa keke tie, sari doduru si ta zutu pude tava kilasa koari na dia sinea. Ba sipu tavete va sea sari soku tie, si poni moka nia Tamasa sa Nana tataru variharupi, meke pozani tie toṉoto Sa si arini. 17 Hinokara sapu koasa sinea tana keke tie, si mate nia ri doduru tie. Ba sapu arilaena hola si gua tu sapu evaṉia keke tie pule, sapu e Zisu Karisito! Ke sari doduru pu somana tagoa sa tataru variharupi te Tamasa, meke sa Nana vinariponi moka tanisa tinoṉoto, si kaqu somana tagoa sa tinoa hola koe Zisu Karisito.

18 Ura koasa sinea tanisa keke tie sapu e Adama si ta zutu sari doduru tie, ba koa sa tinavete toṉoto tanisa keke tie, sapu e Zisu Karisito si boka ta pozae tie toṉoto sari doduru tie, meke ponini Sa koarini sa tinoa. 19 Ke gua sapu koasa sineke tinarae tanisa keke tie si pozani tie sea Tamasa sari doduru tie, ba koasa vinatabe tanisa keke tie sapu Zisu Karisito, si boka tava toṉoto koe Tamasa sari doduru pu va hinokara.

20 Ta vala sa Tinarae te Mosese pude tumae valeana ni rini sari dia sinea, ba vasina sapu ta tumae valeana sa sinea si soku nono latu sa tataru variharupi te Tamasa. 21 Gua sapu sa sinea kamo la koari doduru tie meke kamo sa minate koari doduru, ke sa tataru variharupi si kamo koari pu ta pozae na tie toṉoto pa korapana Zisu Karisito sa nada Baṉara pude va kamoi pa tinoa hola.